Ekisodo 15:1-27
15 Ka nako yeo Moshe le Baisiraele ba opelela Jehofa koša ye:
“Anke ke opelele Jehofa, ka gobane o fentše ntwa e kgolo kudu.
O lahletše pere le monamedi wa yona ka lewatleng.
2 Jah* ke yena yo a mphago matla e bile ke yena a ntšhireletšago, ka ge e le yena a mphološitšego.
Ke yena Modimo wa ka gomme ke tla mo reta, ke Modimo wa borakgolokhukhu ba ka gomme ke tla mo tumiša.
3 Jehofa ke mogale wa ntwa. Jehofa ke leina la gagwe.
4 O lahletše dikoloi tša Farao le mašole a gagwe ka lewatleng,Mašole a gagwe a bogalegale a nweletše ka Lewatleng le Lehwibidu.
5 Maphoto a magolo a lewatle a ba khupeditše, ba nwelela tlasetlase lewatleng go swana le leswika.
6 Wena Jehofa, seatla sa gago se setona se na le matla a magolo.Wena Jehofa, seatla sa gago se setona se ka pšhatlaganya lenaba.
7 O yo mogolo kudu moo e lego gore bao ba lwago le wena o ka ba lahlela fase.Kgalefo ya gago e swana le mollo, gomme e ba tšhuma go swana le mahlaka.
8 Mohemo wo o tšwago dinkong tša gago o ile wa kgobokanya meetse,A ile a ema go swana le leboto.Gare ga lewatle, maphoto a meetse a ile a ema tsii!
9 Manaba a rena a re: ‘Re tla ba kitimiša! Re tla ba swara!
Re tla tšea dilo tša bona tše bohlokwa, ra tšea dilo ka moka tšeo re di nyakago.
Re tla ba bolaya ka ditšhoša tša rena!’
10 O butšweditše moya wa gago ka lewatleng gomme la ba khupetša.Ba nweletše ka lewatleng le legolo bjalo ka tšhipi e boima.
11 Wena Jehofa, ke mang yo a swanago le wena mo gare ga medimo?
Ke mang yo e lego yo mokgethwa kudu go swana le wena?
Wena yo a swanetšego go hlomphiwa kudu le go tumišwa ka dikoša, Yo a dirago dilo tše di makatšago.
12 O otlolotše seatla sa gago se setona, gomme lefase la ba metša ka moka ga bona.
13 O bontšhitše botho bja gago bjo bogolo ge o be o eteletše pele batho ba gago bao o ba phološitšego.O tla ba iša lefelong la gago le lekgethwa ka matla a gago.
14 Ge ditšhaba di ekwa ka dilo tše, di tla ferekana.Batho bao ba dulago Filisita ba tla kwa bohloko kudu.
15 Ka nako yeo, matona a Edomo a tla ferekana,Ge e le dinkgwete tša Moaba di tla thothomela.
Badudi ka moka ba Kanana ba tla nyama kudu.
16 Ba tla tšhoga kudu ba ba ba boifa.
Ka baka la matla a gago a magolo ba tla ema tsii bjalo ka leswika,Go fihlela ge batho ba gago ba feta ka pele ga bona, wena Jehofa,Go fihlela ge batho ba gago bao o ba kgethilego ba feta ka pele ga bona.
17 Jehofa Modimo wa ka, ba hlahle e le gore ba dule thabeng ya gago,E lego lefelo leo o dulago go lona, leo o ikgethetšego lona.Lefelo le lekgethwa, leo o le theilego ka diatla tša gago, wena Jehofa.
18 Jehofa o tla buša e le kgoši go ya go ile.
19 Ge dipere tša Farao le dikoloi tša gagwe tša ntwa gotee le mašole a gagwe a go namela dipere a tsena ka lewatleng,Jehofa o ile a dira gore meetse a lewatle a boele godimo ga bona,Mola Baisiraele bona ba sepela mo go omilego ka gare ga lewatle.”
20 Ke moka moporofeta Miriamo, e lego sesi wa Arone, o ile a letša moropa, basadi ba bangwe ka moka ba mo latela ba letša meropa e bile ba bina.
21 Miriamo o be a opela ka go fetola banna a re:
“Opelelang Jehofa ka gobane o fentše ntwa e kgolo.
O lahletše pere le monamedi wa yona ka lewatleng.”
22 Ka morago Moshe a tloša Baisiraele Lewatleng le Lehwibidu ba ya lešokeng la Shuri gomme ba sepela moo lešokeng ka matšatši a mararo, eupša ba se hwetše meetse.
23 Mafelelong ba fihla Mara,* eupša ba se kgone go nwa meetse ao a tšwago Mara ka gobane a be a galaka. Ke ka baka leo a reetšego lefelo leo leina a re ke Mara.
24 Ke moka batho ba thoma go ngongoregela Moshe ba re: “Re tlo nwa’ng?”
25 Moshe a kgopela Jehofa gore a mo thuše. Ka gona Jehofa a mmontšha sehlašana se itšego, gomme Moshe a se lahlela ka meetseng ke moka meetse ao a ba bose.
Gona moo Modimo a ba beela molao e le gore ba tle ba phele ka wona. O be a nyaka go bona ge e ba ba nyaka go mo kwa goba go se mo kwe.
26 A re: “Ge e ba le ka theetša lentšu la Jehofa Modimo wa lena ka dipelo tša lena ka moka, gomme la dira dilo tšeo a rego di lokile, la kwa melao ya gagwe ka moka le ditaelo tša gagwe, gona nka se le otle ka bolwetši le ge e le bofe bjo ke ilego ka otla Baegepeta ka bjona, ka gobane nna Jehofa, ke tla dira gore le dule le phetše gabotse.”
27 Ka morago ga moo ba fihla Elima, moo go bego go na le didiba tše 12 tša meetse, le mehlare ya mepalema e 70. Ka gona ba hloma ditente moo kgauswi le meetse.
Mengwalo ya tlase
^ “Jah” ke tsela e kopana ya go bitša leina Jehofa.
^ Leina le le ra gore, “Kgalako.”
