1, 2. Batho ba bantši ba lebelela mešomo ya bona bjang?

GANTŠI batho ba rata go tsebja ka mešomo ya bona. Ba bantši ba ipona ba le bohlokwa ka mešomo ya bona goba maemo ao ba nago le ona. Ditšong tše dingwe, ge o itsebiša bathong ba bangwe, e nngwe ya dipotšišo tšeo ba go botšišago yona ke gore: “O šoma go dira’ng?”

² Beibele le yona go na le mo e hlalosago batho ka mešomo yeo ba bego ba e dira. E bolela ka “Mateo molekgetho”; “Simone yo e lego mošogi wa matlalo”; le “Luka ngaka e rategago.” (Mat. 10:3; Dit. 10:6; Bakol. 4:14) Le gona batho ba bangwe ba tsebja ka ditokelo goba mešomo yeo Jehofa a ilego a ba nea yona. Re bala ka Kgoši Dafida, moporofeta Eliya le moapostola Paulo. Banna ba ba ile ba tšeela mešomo ya bona godimo kudu. Ge e ba le rena Jehofa a re neile maikarabelo a itšego, re swanetše go a tšeela godimo kudu.

3. Ke ka baka la’ng bao ba godilego ba swanetše go tlwaetša bao e sa lego ba bafsa? (Bona seswantšho se se lego ka mo godimo.)

³ Ba bantši ba rena re rata mešomo yeo re e dirago, e bile ga re nyake go kgaogana le yona. Eupša ka maswabi, ga e sa le go tloga mehleng ya Adama, moloko o mongwe le o mongwe o a tšofala gomme wa tšeelwa legato ke o mongwe. (Mmo. 1:4) Morago bjale, phetogo ye e baketše rena Bakriste ba therešo mathata. Mošomo wa rena o oketšegile kudu  e bile o nyaka mo gontši. Mešomo yeo ga bjale re e dirago e re gapeletša go šomiša mekgwa e mefsa, yeo gantši e akaretšago go dirišwa ga thekinolotši yeo e fetofetogago gantši. Bana babo rena ba bangwe bao ba godilego ba ka thatafalelwa ke go sepedišana le diphetogo tše. (Luka 5:39) Eupša bana babo rena bao e sa lego ba bafsa ba kgona dilo tše, e bile ba sa na le matla go feta bao ba godilego. (Die. 20:29) Ka gona, bana babo rena bao ba godilego ba swanetše go tlwaetša bao e sa lego ba bafsa gore ba tle ba phethe maikarabelo a phuthego.—Bala Psalme 71:18.

4. Ke ka baka la’ng ba bangwe ba dikadika go nea ba bangwe mešomo? (Bona lepokisi le le rego, “ Mabaka ao ba Bangwe ba Dikadikago go Nea ba Bangwe Mešomo.”)

⁴ Bana babo rena bao ba etelelago batho ba Modimo pele ba ka dikadika go nea bao e sa lego ba bafsa mešomo. Ba bangwe ba tšhaba gore bao e sa lego ba bafsa ba tlo ba tšeela mešomo ya bona. Ba bangwe ba tšhaba gore ba ka se sa ba le matla a taolo, e bile ba ipotša gore bana babo rena ba bafsa ba ka se dire dilo gabotse go swana le bona. Ba bangwe ba fahlela ka gore ga ba na nako ya go tlwaetša ba bangwe. Ka lehlakoreng le lengwe, bana babo rena bao e sa lego ba bafsa ga se ba swanela go fela pelo ge ba sa newe mešomo e oketšegilego.

5. Re tlo ahlaahla dipotšišo dife sehlogong se?

⁵ Anke re ahlaahleng taba ye ya go nea ba bangwe mešomo go tšwa mahlakoreng a mabedi. Sa pele, bana babo rena bao ba godilego ba ka thuša bjang bao e sa lego ba bafsa gore ba rwale maikarabelo a oketšegilego ka mokgatlong, gona ke ka baka la’ng thušo yeo e nyakega? (2 Tim. 2:2) Sa bobedi, ke ka baka la’ng go le bohlokwa gore bana babo rena bao e sa lego ba bafsa ba be le pono e botse ge ba dutše ba thuša bana babo rena bao ba godilego le go ithuta go bona? Anke re thomeng ka go bona kamoo Kgoši Dafida a ilego a tlwaetša morwa wa gagwe go amogela boikarabelo bjo bogolo.

6. Ke’ng seo Kgoši Dafida a bego a nyaka go se direla Jehofa, gona Jehofa o ile a re’ng?

⁶ Ka morago ga gore Dafida a fetše mengwaga e mentši a tšhaba Saulo, o ile a ba kgoši gomme a dula ntlong ya maemo. Ka ge a be a nyamišitšwe ke gore Jehofa yena ga se a agelwa “ntlo,” goba tempele, o ile a phetha ka gore o tla mo agela yona. Ka gona o ile a botša moporofeta Nathane a re: “Šefa nna ke dula ka ntlong ya metsedara, eupša areka ya kgwerano ya Jehofa e ka tlase ga tente.”  Nathane o ile a araba Dafida a re: “Dira se sengwe le se sengwe seo se lego pelong ya gago, gobane Modimo wa therešo o na le wena.” Eupša Jehofa o ile a se dumelele Dafida gore a mo agele ntlo. O ile a botša Nathane gore a yo botša Dafida gore: “E ka se be wena o tlago go nkagela ntlo yeo ke tla dulago go yona.” Le ge Jehofa a be a tshepišitše Dafida gore o tla dula a mo šegofatša, o ile a laela gore morwa wa Dafida e lego Solomone e be yena a tlago go mo agela tempele yeo. Dafida o ile a arabela bjang?—1 Dikor. 17:1-4, 11, 12; 29:1.

7. Dafida o ile a arabela bjang ge Jehofa a be a laela gore tempele e agiwe ke Solomone?

⁷ Dafida ga se a ka a dikadika go thekga Solomone, e bile ga se a ka a ikopiša hlogo ka taba ya gore ge tempele e agilwe go ka se retwe yena. Ge e le gabotse, ka morago ga gore tempele yeo e agiwe, ga se ya ka ya bitšwa tempele ya Dafida, eupša e ile ya bitšwa tempele ya Solomone. Le ge Dafida a ka ba a ile a nyamišwa ke gore ga se a dumelelwa go phetha seo a bego a se naganne, o ile a thekga ka pelo ka moka modiro wa go agiwa ga tempele. O ile a rulaganya bašomi ka mafolofolo, a kgoboketša tšhipi, koporo, silifera le gauta, gotee le dikota tša metsedara. Go oketša moo, o ile a kgothatša Solomone ka gore: “Bjale morwa wa ka, anke Jehofa a be le wena, o atlege gomme o age ntlo ya Jehofa Modimo wa gago, feela bjalo ka ge a boletše mabapi le wena.”—1 Dikor. 22:11, 14-16.

8. Ke ka baka la’ng Dafida nkabe a ile a ipotša gore Solomone a ka se kgone go agela Jehofa tempele, eupša ke’ng seo a ilego a se dira?

⁸ Bala 1 Dikoronika 22:5. Dafida nkabe a ile a ipotša gore Solomone ga a swanelege go okamela mošomo wo o mogolo. Go oketša moo, tempele yeo e be e tlo ba e “kgolo kudu,” e bile ka nako yeo Solomone e be e sa le “yo mofsa e bile a sa tekateka,” goba a se na maitemogelo. Lega go le bjalo, Dafida o be a tseba gore Jehofa o be a tlo thuša Solomone go phetha mošomo woo a mo neilego wona. Ka gona Dafida o ile a dira seo a ka se kgonago go thuša Solomone, gomme a kgoboketša ditlabakelo tše dintši tša go aga tempele yeo.

9. Ke’ng seo se ka thušago bana babo rena bao ba godilego gore ba thabišwe ke go nea ba bafsa mešomo yeo ba bego ba e dira? Nea mohlala.

⁹ Bana babo rena bao ba godilego ga se ba swanela go nyama ge maemo a gapeletša gore ba nee bao e sa lego ba bafsa mešomo ya bona. Go e na le moo, ge ba tlwaetša bao e sa lego ba bafsa, ba tla thuša gore mošomo o tšhabe diatla. Bana babo rena bao ba etelelago pele ba swanetše go thaba ge ba bona bafsa bao ba ba tlwaeditšego ba kgona go phetha mešomo ya ka mokgatlong wa Jehofa. Ka mohlala, nagana ka tate yo a rutago morwa wa gagwe go otlela koloi. Ge morwa yoo e sa le ngwana, o no bogela tatagwe ge a otlela. Ge e šetše e le mošemanyana, tatagwe o mo hlalosetša kamoo koloi e otlelwago ka gona. Ke moka ge mošemane yoo a godile, o thoma go otlela koloi ya gabo ge tatagwe a dutše a mo nea tlwaetšo e oketšegilego. Ka dinako tše dingwe ba ka šiedišana go otlela, eupša mafelelong morwa yoo e ka ba yena a otlelago ka mehla, mohlomongwe ka nako yeo tatagwe o tla ba a tšofetše. Tate yoo o tla thaba kudu ge koloi e šetše e otlelwa ke morwa wa gagwe, e bile a ka se ipotše gore le yena o swanetše go otlela. Ka mo go swanago, bana babo rena bao ba  godilego ba thaba kudu ge ba kgonne go tlwaetša bao e sa lego ba bafsa go phetha mešomo ya ka mokgatlong wa Jehofa.

10. Moshe o be a lebelela bjang go retwa le go ba moetapele wa setšhaba?

¹⁰ Lena bao le godilego, le swanetše go phema go ba le mona. Bona kamoo Moshe a ilego a arabela ka gona ge batho ba itšego mešašeng ya Isiraele ba be ba thoma go itshwara bjalo ka baporofeta. (Bala Numeri 11:24-29.) Mohlanka wa Moshe e lego Joshua o be a nyaka go ba thibela. Mohlomongwe o be a nagana gore batho bao ba be ba tla dira gore setšhaba se thome go nyatša Moshe le go se sa mo lebelela e le moetapele wa sona. Eupša Moshe o ile a araba Joshua a re: “A o a nkhufegela? O se ke wa dira bjalo, ke duma ge nkabe batho ba Jehofa ka moka e be e le baporofeta ka gobane Jehofa o be a tla tsenya moya wa gagwe go bona!” Moshe o ile a bona gore Jehofa ke yena a bego a dira gore batho bao ba itshware ka tsela yeo. Ka ge a be a sa nyake go retwa, o ile a bolela gore o duma eka bahlanka ka moka ba Jehofa ba ka ba le mpho yeo ya go porofeta. Go swana le Moshe, re swanetše go thaba ge ba bangwe ba hwetša ditokelo tšeo nkabego di hwetšwa ke rena.

11. Ngwanabo rena yo mongwe o itše’ng mabapi le go nea ba bangwe mošomo wo a bego a o dira peleng?

¹¹ Lehono, re na le mehlala e mentši ya bana babo rena bao ba hlanketšego Jehofa ka mafolofolo ka mengwaga e mentši, bao ba tlwaeditšego ba bangwe go rwala maikarabelo a oketšegilego ka mokgatlong wa Jehofa. Ka mohlala, ngwanabo rena Peter o bile tirelong ya nako e tletšego ka mengwaga e fetago e 74, gomme e 35 ya yona o e feditše a hlankela ofising ya lekala kua Yuropa. O be a dutše a hlankela e le molebeledi wa Lefapha la Tirelo. Eupša gona bjale, ngwanabo rena Paul, yoo e sa lego yo mofsa e bile a šomile kgauswi le Peter ka mengwaga e mmalwa, o neilwe boikarabelo bjoo e bego e le bja Peter. Ge Peter a be a botšišwa gore o ikwa bjang ka diphetogo tšeo o itše: “Ke thabišwa ke gore go na le bana babo rena bao ba neilwego tlwaetšo ya go dira mešomo ye ya bohlokwa le bao ba e dirago gabotse kudu.”

12. Re swanetše go ithuta thuto efe pegong ya Beibele ya mabapi le Rehoboama?

¹² Ka morago ga gore Solomone a hwe, morwa wa gagwe e lego Rehoboama o ile a ba kgoši. Ge Rehoboama a be a nyaka keletšo ya kamoo a ka phethago kabelo ye ka gona, o ile a thoma ka go kgopela thušo go banna ba bagolo. Eupša o ile a gana keletšo ya bona! Go e na le gore a e amogele, o ile a diriša keletšo ya masogana ao a gotšego le ona ao e bego e le bahlankedi ba gagwe. Dilo di ile tša senyega. (2 Dikor. 10:6-11, 19) Re ithuta’ng tabeng ye? Re ithuta gore go bohlokwa go tsoma keletšo ya bana babo rena ba godilego le bao ba nago le phihlelo, gotee le go naganišiša ka keletšo ya bona. Gaešita le ge bao e sa lego ba bafsa ba sa swanela go ikwa ba gapeletšwa go dira dilo ka tsela ya kgale, ga se ba swanela go kitimela go gana keletšo ya bao ba godilego.

13. Bana babo rena ba bafsa ba swanetše go dirišana bjang le bao ba godilego?

¹³ Go ka direga gore gona bjale bana babo rena bao e sa lego ba bafsa ba okametše mešomo yeo go yona go nago le bana babo rena bao ba godilego. Ka gona, pele bana babo rena ba bafsa ba dira diphetho, ba ka holega kudu ge ba ka boledišana le bana babo rena bao ba godilego bao ba nago le phihlelo. Ngwanabo rena Paul, yoo go boletšwego ka yena pejana, yoo a neilwego mošomo wo o bego o dirwa ke Peter wa go okamela lefapha la Bethele, o itše: “Ke feditše nako e telele ke kgopela keletšo go Peter, e bile ke be ke kgothaletša ba bangwe lefapheng la rena go dira se se swanago.”

14. Re ithuta’ng tseleng yeo Timotheo le moapostola Paulo ba bego ba dirišana ka yona?

¹⁴ Timotheo, yoo e bego e sa le yo mofsa, o ile a šoma kgauswi kudu le moapostola Paulo ka mengwaga e mentši. (Bala Bafilipi 2:20-22.) Paulo o kile a ngwalela Bakorinthe gore: “Ke [romela] Timotheo  go lena, ka ge e le ngwanaka yo a rategago le yo a botegago Moreneng; o tla le gopotša mekgwa ya ka mabapi le Kriste Jesu, go etša ge ke ruta kae le kae phuthegong e nngwe le e nngwe.” (1 Bakor. 4:17) Mantšu a a makopana a bontšha gore Paulo le Timotheo ba be ba šomišana gabotse kudu. Paulo o ile a ipha nako ya go tlwaetša Timotheo “mekgwa ya [gagwe] mabapi le Kriste Jesu.” Timotheo o ile a amogela tlwaetšo ka diatla tše pedi gomme Paulo a mo rata kudu. Le gona Paulo o be a kgodišegile gore Timotheo o be a tla kgona go thuša phuthego ya Bakorinthe. Ruri wo ke mohlala o mobotse woo bagolo ba ka o ekišago lehono ge ba dutše ba tlwaetša banna ba bangwe gore ba tle ba etelele pele phuthego!

15. Keletšo yeo Paulo a ilego a e nea Bakriste ba kua Roma e swanetše go re thuša go dira’ng ge re lebane le diphetogo?

¹⁵ Re phela dinakong tše di kgahlišago kudu. Karolo ya lefaseng ya mokgatlo wa Jehofa e gola ka ditsela tše dintši tše di fapafapanego, eupša kgolo yeo e tla le diphetogo. Ge diphetogo tšeo di lebane rena, anke re ikokobetšeng, re etiše dikgahlego tša Jehofa pele, e sego tša rena. Go dira bjalo go re thuša gore re dule re na le botee. Paulo o ile a ngwalela Bakriste ba kua Roma gore: “Ke botša yo mongwe le yo mongwe gare ga lena gore a se ke a ikgopola kudu go feta kamoo go nyakegago gore a nagane ka gona; eupša a nagane e le gore a be le monagano o hlaphogetšwego, yo mongwe le yo mongwe kamoo Modimo a mo abetšego tekanyo ya tumelo ka gona. Gobane go etša ge mmeleng o tee re na le ditho tše dintši, eupša ditho tšohle di se na modiro o swanago, ka gona, rena gaešita le ge re le ba bantši, re mmele o tee boteeng le Kriste.”—Baroma 12:3-5.

16. Ke’ng seo bao ba godilego le bao e sa lego ba bafsa, gotee le basadi ba bona, ba ka se dirago go thuša gore ka mokgatlong wa Jehofa go dule go na le khutšo le botee?

¹⁶ Ka gona go sa šetšwe gore maemo a rena ke afe, anke ka moka ga rena re šomeng ka thata go tšwetša pele mošomo o mogolo wa Jehofa. Lena bana babo rena ba godilego, rutang bao e sa lego ba bafsa mešomo ya lena. Lena bao le sa lego ba bafsa, amogelang mešomo yeo, ebang le boipoetšo gomme le dule le hlompha bao ba godilego. Lena basadi ba nyetšwego, ekišang mosadi wa Akhwila e lego Perisila, yoo a ilego a dula a thekga Akhwila ka potego ge maemo a bona a be a fetoga.—Dit. 18:2.

17. Ke’ng seo Jesu a bego a kgodišegile gore barutiwa ba gagwe ba be ba tla se dira, gona o ile a ba nea tlwaetšo ya go dira eng?

¹⁷ Mohlala o mobotsebotse wa motho yoo a ilego a tlwaetša ba bangwe gore ba tle ba phethe maikarabelo a oketšegilego ke wa Jesu. Jesu o be a tseba gore e se kgale o be a tlo boela legodimong le gore go be go tlo nyakega gore ba bangwe ba šale ba tšwetša pele mošomo wo a bego a o dira. Le ge barutiwa ba gagwe ba be ba sa phethagala, o be a ba tshepa gomme a ba botša gore ba be ba tla dira mediro yeo e fetago ya gagwe. (Joh. 14:12) O ile a ba nea tlwaetšo e botse kudu, gomme ba bolela ditaba tše dibotse bathong ka moka ba mehleng ya bona.—Bakol. 1:23.

18. Ke’ng seo re se letetšego, gona ke’ng seo ga bjale re ka se dirago?

¹⁸ Ka morago ga gore Jesu a hwe lehu la sehlabelo, Jehofa o ile a mo tsošetša legodimong gomme a mo nea mešomo e mengwe le matla a “ka godimodimo ga mmušo o mongwe le o mongwe, bolaodi, matla [le] borena.” (Baef. 1:19-21) Ge re ka hwa re botega pele ntwa ya Haramagedone e fihla, Jehofa o tlo re tsoša gore re phele lefaseng le lefsa la go loka, moo re tlago go ba le mošomo o montši wo o thabišago. Eupša gaešita le gona bjale go na le mošomo o bohlokwa kudu woo ka moka ga rena re ka tsenyago letsogo go wona, e lego mošomo wa go bolela ditaba tše dibotse le go dira barutiwa. Anke ka moka ga rena, ba bagolo le ba banyenyane, re dule ‘re na le mo gontši mo re go dirago modirong wa Morena.’—1 Bakor. 15:58.