Johane 16:23 e re “Ge e ba le kgopela Tate selo le ge e le sefe, o tla le nea sona leineng la ka.”

Mantšu a a Jesu, a bontšha gabotse gore Jehofa o nyaka re rapela yena feela. Le gona ga a nyake gore re mo rapele re diriša diswantšho, badimo, barongwa le bakgethwa, e lego batho bao go dumelwago gore ke bona ba re išetšago dithapelo go Modimo. Ge re rapela Modimo re diriša leina la Jesu, gona go ra gore re tla be re kwešiša gore Modimo o kwa dithapelo tša rena, ka gore Jesu o re hwetše. Jesu o itše: “Ga go yo a tlago go Tate ge e se ka nna.”—Johane 14:6.

Psalme 62:8 e re: “Tšhollang dipelo tša lena le le pele ga gagwe.”

Ge re rapela Jehofa, re swanetše go bolela le yena go no swana le ge re bolela le tate yo re tsebago gore o a re rata. Go e na le gore re mo rapele re bala ka pukwaneng ya dithapelo goba re boaboetša dithapelo tšeo re di swerego ka hlogo, re swanetše go mo rapela ka tlhompho le go mmotša seo se lego dipelong tša rena.

1 Johane 5:14 e re: “Go sa šetšwe seo re se kgopelago go ya ka thato ya Modimo, Modimo o a re kwa.”

Ka Beibeleng, Jehofa Modimo o re botša gore o tlo re direla eng, le gore rena re swanetše go mo direla eng. Bjale, e le gore a theetše dithapelo tša rena, re swanetše go rapela ‘go ya ka thato ya gagwe’ goba ka tsela yeo a e nyakago. E le gore re tsebe gore o nyaka re mo rapela bjang, re swanetše go ithuta Beibele gore re mo tsebe gabotse. Ge e ba re ka dira bjalo, dithapelo tša rena di tla mo thabiša gomme a di theetša.

Rapela Modimo Gore a go fe Dilo Tšeo o di Hlokago. O ka rapela Modimo gore a go fe dilo tšeo o di hlokago tša letšatši le letšatši, tše bjalo ka dijo, diaparo goba le lefelo la go dula. E bile o ka rapela Modimo gore a go fe bohlale bja gore o kgone go dira diphetho tše dibotse, goba wa mo kgopela gore a go fe matla a go go thuša go kgotlelela mathata. Le gona o ka mo rapela gore a go fe tumelo, a go lebalele dibe tša gago, le go go thuša.—Luka 11:3, 4, 13; Jakobo 1:5, 17.

Rapelela Batho ba Bangwe. Batswadi bao ba ratago bana ba bona, ba a thaba ge ba bona bana ba bona ba ratana. Jehofa le yena o a thaba ge a bona ka moka ga rena mo lefaseng re ratana, ka gore ka moka ga rena re bana ba gagwe. Ka gona, re swanetše go rapelela balekane ba rena, bana ba rena, malapa a gabo rena le bagwera ba rena. Ke ka baka leo Jakobo a ngwadilego gore: ‘Rapelelanang.’—Jakobo 5:16.

Botša Jehofa Gore o a mo Leboga. Modimo o re bopile. Ditiro 14: 17 e re, ‘Modimo o re diretše dilo tše dibotse, o re nea dipula go tšwa legodimong le dihla tše di enywago, a khoriša dipelo tša rena ka mo go feletšego ka dijo le lethabo.’ Ge re ka nagana ka dilo ka moka tšeo Modimo a re diretšego tšona, re tlo ikwa re nyaka go mo leboga ge re mo rapela. Le gona, re swanetše go mmontšha gore re a mo leboga ka go phela ka melao ya gagwe.—Bakolose 3:15.

Ka dinako tše dingwe re ka nyama ge re bona okare Modimo ga a arabe dithapelo tša rena ka pela, mola e le gore re di rapela go tšwa pelong. Na re swanetše go phetha ka gore Modimo ga a re rate? Aowa! Nagana ka mehlala ye e latelago, ye e bontšhago gore ka dinako tše dingwe, re tlo swanelwa ke gore re no tšwela pele re rapela ka go se fele pelo.

Steve, yo re boletšego ka yena sehlogong seo re thomilego ka sona, o re: “Ge nkabe e se ka thapelo, nkabe kgale ke lahletše toulo ka bophelo.” Ke’ng seo se mo thušitšego gore a fetoše tsela yeo a bego a ikwa ka yona? O ile a thoma go ithuta Beibele, gomme a ithuta gore o swanetše go dula a rapela ka go se fele pelo. O re: “Ke rapela Modimo gomme ka mo leboga gore o nthekga a diriša batho ba gagwe, gona bjale ke thabile kudu.”

Go thwe’ng ka Jenny, yoo a bego a ikwa a sa swanelege gore Modimo a ka kwa dithapelo tša gagwe? O re: “Ge ke be ke ikwa ke se na mohola, ke be ke rapela Modimo ka mo go tseneletšego gore a nthuše go kwešiša gore go re’ng ke ikwa ka tsela yeo.” Thapelo e mo thušitše bjang? O re: “Go bolela le Modimo go nthušitše gore ke itebelele ka tsela yeo a ntebelelago ka yona. Le ge pelo ya ka e dula e mpona molato, Modimo yena ga a dire bjalo. Le gona thapelo e nthušitše le gore ke se ke ka fela matla, ke no tšwela pele ke iteka le ge bophelo bo le boima.” Mafelelong Jenny o ile a holega bjang? O re: “Ke ile ka bona gore Jehofa o gona le gore o a nthata. E bile ke mo tšea e le tate wa ka le mogwera wa ka yo a tlago go dula a nthekga le go nthuša, ge feela ke šoma ka thata gore ke dule ke dira dilo tšeo a di nyakago.”

Nagana le ka mohlala wa mosadi yo a bitšwago Isabel. Ge a se no tseba gore o imile, dingaka di ile tša mmotša gore o tlo belega ngwana yo a golofetšego o šoro. O ile a hlakahlakana kudu. Ba bangwe ba ile ba ba ba mo eletša ka gore a ntšhe mpa yeo. O re: “Ke be ke ikwa eka go fedile ka nna.” Isabel o ile a dira eng? O re: “Ke ile ka rapela, ka ba ka rapela gore Modimo a nthekge.” Nako e ile ya ba ya fihla ya gore a belege. O ile a belega morwa yo a bitšwago Gerard, ka nnete o ile a tla a golofetše bjalo ka ge dingaka di boletše. Na Isabel o ile a ikwa eka Modimo ga se a araba dithapelo tša gagwe? Aowa, o re: “Morwa wa ka gona bjale o na le mengwaga e 14. Ge ke dutše ke mo lebeletše a ipshina ka bophelo le ge a golofetše, ke a lemoga gore ye ke karabo e botse e tšwago go Modimo, e lego tšhegofatšo e botse yeo Modimo a sa kago a mpha yona.”

Mantšu a a mabotse, a batho bao re sa tšwago go kwa ka bona, a re gopotša seo mongwadi yo mongwe wa dipsalme a se boletšego. O itše: “O tla kwa tšeo di kganyogwago ke ba boleta, wena Jehofa. O tla lokiša dipelo tša bona. O tla hlwaya tsebe.” (Psalme 10:17) Ka nnete re na le mabaka a mabotse a go tšwela pele re rapela Modimo ka go se fele pelo!

Ka Beibeleng, re hwetša dithapelo tše dintši tšeo di kilego tša rapelwa ke Jesu. Thapelo ya go tuma yeo batho ba bantši ba e tsebago ke yeo a ilego a e ruta barutiwa ba gagwe. Potšišo ke gore re ka ithuta eng go thapelo yeo? Ekwa sehlogo se se latelago.