Na o kile wa babja ka nakwana? Mohlomongwe o ile wa fola kapejana moo e lego gore o šetše o lebetše ka taba yeo. Eupša go llela motho yo a hwilego ga go bjalo. Dr. Alan Wolfelt o ngwadile ka pukung ya gagwe ya Healing a Spouse’s Grieving Heart gore: “Ga go na selo seo go thwego ke go fenya manyami.” Lega go le bjalo, o oketša ka gore: “Ge nako e dutše e eya, le ge batho ba bangwe ba go thekga, manyami a gago a tla fokotšega.”

Ka mohlala, nagana ka tsela yeo mopatriareka Aborahama a ilego a ikwa ka yona ge mosadi wa gagwe a be a hlokofetše. Beibele e re “Aborahama a tla a hlokofalela Sara le go mo llela.” Polelwana e rego “a tla a,” e bontšha gore go tšere nako e telele gore a tielele ka morago ga go hwelwa ke mosadi. * Mohlala o mongwe ke wa Jakobo, yoo a ilego a forwa gore a dumele gore morwa wa gagwe Josefa o be a bolailwe ke sebata. O ile a fetša “matšatši a mantši” a mo llela, gomme lapa la gagwe le be le palelwa ke go mo homotša. O be a sa dutše a nagana kudu ka lehu la Josefa le ka morago ga mengwaga e mentši.​—Genesi 23:2; 37:34, 35; 42:36; 45:28.

Se ke therešo ka batho ba bantši lehono bao ba nyamišitšwego ke lehu la motho yo ba bego ba mo rata kudu. Nagana ka mehlala e mebedi yeo e latelago.

• “Monna wa ka Robert o hlokofetše ka di-9 tša July, 2008. Letšatši leo monna wa ka a hlokofetšego ka lona le be le swana le matšatši a mangwe. Ka morago ga go ja dijo tša mesong, re ile ra atlana, ra gokarelana gomme ra botšana mantšu a rego ‘Ke a go rata,’ ka ge re be re tlwaetše go dira bjalo ge a eya mošomong. Le ge go fetile mengwaga e tshela monna wa ka a hlokofetše, ke sa dutše ke ekwa bohloko. Ga ke nagane gore nka tsoga ke lebetše gore Rob ga a sa phela.”​—Gail, yo a nago le mengwaga e 60.

• “Le ge go fetile mengwaga e 18 ke hwetšwe ke mosadi wa ka, ke sa mo gopola le go mo llela. Nako le nako ge ke bona selo sa tlhago seo se kgahlišago, ke a mo gopola gomme ke a tseba gore o be a tla thabela go bona seo ke se bonago.”​—Etienne, yo a nago le mengwaga e 84.

Go molaleng gore ke ga tlhago go kwa bohloko bjo bjalo le go ba le maikwelo a tšeago nako e telele. Motho yo mongwe le yo mongwe o lla ka tsela ya gagwe ge a hwetšwe ke motho yo a mo ratago gomme e ka se be gabohlale go ahlola ba bangwe ge ba lla ka tsela ya bona. Ka nako e swanago, go ka nyakega gore re pheme go ipea molato ge e ba re bona eka tsela yeo re nyamago ka yona ge motho a hlokofetše e feteletše. Re ka swaragana bjang le manyami a go hwelwa?