“Ge ba kgopo ba hloga go etša dimela, le ge bohle bao ba tlwaetšego go dira tšeo di gobatšago ba hloga, ke ka morero wa gore ba tle ba fedišetšwe sa ruri.”—PSALME 92:7.

Ka ge re kwele sehlogong se se fetilego, dilo tše mpe di tšwela pele di oketšega. Dilo tše ga se tša swanela go re makatša. Ka baka la’ng? Ka gobane Beibele e boletše e sa le pele go 2 Timotheo 3:1-5 gore “mehleng ya bofelo” batho e tla ba ba babe le go feta. Ke bofelo bja eng? Ke bofelo bja ge Modimo a tla be a fediša batho bao ba sa nyakego go mo kwa. E se kgale, Modimo o tlo fediša batho bao ba sa nyakego go fetoša mekgwa ya bona e mebe. Eupša a ka se fediše bao ba lokilego, e lego bao ba mo kwago. “Baloki bona e tla ba beng ba lefase, Ba tla dula mo go lona ka mo go sa felego.”—Psalme 37:29.

“Modimo yo a neago khutšo yena, o tla pšhatlaganya Sathane.”—BAROMA 16:20.

Ge dilo tše mpe di se sa le gona, go akaretša le Sathane  le batemona ba gagwe, lefaseng ka moka go tlo ba le khutšo. Mmopi wa rena o re tshepiša gore: “Go ka se be le yo a [re] tšhošago.”—Mika 4:4.

“Tente ya Modimo e bathong . . . O tla phumola megokgo ka moka mahlong a bona gomme lehu le ka se hlwe le sa ba gona, le ge e le manyami goba sello goba bohloko di ka se hlwe di sa ba gona.”—KUTOLLO 21:3, 4.

Tlaišego le bolwetši di tlo fela ka gobane Modimo o tlo lokiša dilo tšeo di sentšwego ke Sathane, Adama le Efa gotee le diphetho tša rena tše mpe. Ka gona, le “lehu le ka se hlwe le sa ba gona.” Batho bao ba ratago mmopi wa rena le go mo kwa, ba tlo phela ka mo go sa felego. Eupša ba tlo phela kae?

“Lešoka le tikologo e se nago meetse di tla hlalala gomme leganata le tla thaba la khukhuša go etša letšoba la safrona.”—JESAYA 35:1.

Ge Modimo a tla be a fedišitše batho ba babe, lefase ka moka e tla ba paradeise! Le tlo ba le diphaka tše dintši tše dibotse le dirapa tše dibotse e bile go tlo ba le dijo tše dintši. (Psalm 72:16) Mawatle a tlo boela a hlweka, go akaretša le matsha le dinoka e bile go tlo boela gwa ba le diphedi tše dintši tša ka meetseng tšeo di phelago mawatleng, matsheng le dinokeng. Lentšu “tšhilafalo,” re ka se sa le gopola. Batho ba tlo dula ka dintlong tšeo ba ikagetšego tšona e bile go ka se sa ba le motho yo a hlokago legae, yo a hlokago dijo goba yo a diilago.—Jesaya 65:21, 22.

“Go tla ba le tsogo.”—DITIRO 24:15.

Na o ka rata go bona batho bao o bego o ba rata ba tsošitšwe bahung? Modimo Ramatlaohle o tlo ba tsoša bahung gomme ba phela Paradeiseng mo lefaseng. O tlo ba tseba le bona ba tlo go tseba. Nagana gore le tlo ba le thabile bjang! Ke ka baka la’ng re ka tshepa gore kholofetšo ye e tlo phethagala? Ka gobane Beibele e re botša ka batho ba bagolo le ba banyenyane bao ba ilego ba tsošwa bahung gomme ba kopana le ba malapa a gabo bona. Le gona, gantši Jesu o be a tsoša bahu go na le batho bao ba lebeletšego.—Luka 8:49-56; Johane 11:11-14, 38-44.