NAKONG e telele pele ga ge Sanel yo monyenyane a ka belegwa, dingaka di ile tša botša batswadi ba gagwe gore ge e ba a ka phela ge a belegwa, gona o be a tla ba le mathata a magolo a tša maphelo. O ile a swanelwa ke go dirwa ophareišene letšatšing la pele feela a belegwe. Batswadi ba gagwe, bao ba bego ba dula Abkhazia, e lego tikologo yeo e bego e ipolela gore ga e sa bušwa ke Georgia, ba be ba sa kgone go hwetša ngaka yeo e bego e ka ophareita Sanel ntle le go mo tšhela madi.

Batswadi ba gagwe ba ile ba ikgokaganya le Komiti ya go Hloma Kwano le Dipetlele (Hospital Liaison Committee [HLC]) ya lefelong la gabo bona. * Ba ile ba imologa kudu ge bana babo rena bao ba šomago HLC kapejana ba hwetša ngaka yeo e nago le tirišano kua Tbilisi, yeo e lego motsemošate wa Georgia. Eupša mmago Sanel o be a se a tšwa a fola ka morago ga go belega, gomme o be a ka se kgone go tšea leeto la go ya moo. Ka gona go ile gwa phethwa ka gore bomakgolo ba Sanel, bao ka bobedi e bego e le Dihlatse, ba iše ngwana yoo wa ngwanenyana sepetleleng sa kua Tbilisi.

Ophareišene yeo ya go dirwa ka šedi e ile ya atlega. Ka moragonyana ga moo, bomakgolo ba Sanel ba ile ba ngwala gore: “Re dutše sepetlele matšatši a fetago a 20. Nakong yeo, bana babo rena ba bantši le dikgaetšedi ba Georgia ba be ba re etela le go re thuša. Ba bantši ba be ba re kwela bohloko. Re be re ile ra bala ka lerato leo le bontšhwago ke bana babo rena, eupša ga bjale re iponetše lona ka noši.”