Bisikwiti z’Obubwa Bwangye
“OMU 2014, nkatandika kurabaraba omu kimwe aha kicweka ky’orurembo rwaitu nyine obubwa bwangye bubiri,” Nick orikutuura omuri Oregon, U.S.A nikwo yaahandiikire. “Abajurizi ba Yehova bakaba nibakira kwemerera aha rubaju rw’akagaari k’ebitabo aha gati omu rurembo. Bakaba nibajwara gye, barikuramutsya boona abarikuhingura kandi barikubamwenyera.
“Abajurizi ba Yehova abo bakaba batarikutwariza gye abantu bonka beitu n’obubwa bwangye. Eizooba rimwe, Elaine, owaabaire ayemereire haihi n’akagaari akaha obubwa bwangye bisikwiti. Bwanyima y’ekyo, buri kuraba aha mwanya ogwo embwa zikaba zinkurura kuhika aha Bajurizi ba Yehova kutunga bisikwiti.’
“Akahinguraho ameezi. Embwa zikaguma nizitunga bisikwiti z’okurya naanye ndikugaaniiraho kakye n’Abajurizi ba Yehova. Kwonka nkaba ntarikwenda kubeehitsya munonga. Nkaba nindeenzya omu myaka 70, kandi ntarikumanya ebi Abajurizi ba Yehova barikwikiriza. Nkaba ntamirwe amakanisa g’Abaporotesitanti, ncwiremu kweyegyesa Baibuli nyenka.
“Omu bwire obwo, nkareeba Abajurizi ba Yehova omu bicweka ebindi eby’orurembo barikubuurira aha bugaari. Nabo bakaba nibatwaza gye. Butoosha bakaba nibagarukamu ebibuuzo byangye barikukoresa Baibuli, kandi ekyo kikandeetera kubeesiga.
“Eizooba rimwe, Elaine akambuuza ati: ‘Noikiriza ngu enyamaishwa n’ekiconco kuruga ahari Ruhanga?’ Nkamugarukamu nti: ‘Eego, buzima niinyikiriza!’ Elaine akaanshomera Isaaya 11:6-9. Eizooba eryo rikambeera obuhindukiro, kwonka nabwo nkaba nintimwimwa kwikiriza ebitabo byabo.
“Omu biro ebyakuratsireho, nkaguma ningaaniira na Elaine na iba, Brent omu bugufu. Bakampiga kushoma ekitabo kya Matayo kuhika aha ky’Ebyakozirwe kumanya ekirikutwarirwa omu kutwaza nka Kristo. Nikyo naakozire. Omu bwire bukye, nkaikiriza Brent na Elaine kunyegyesa Baibuli. Ekyo kikabaho omu 2016.
“Nkaba mba nyine ekihika ky’okwegyesibwa Baibuli buri saabiiti n’okuza omu nteerane aha Kyombeko ky’Obukama. Nkashemererwa kandi naagureeba nk’omugisha kwega eki Baibuli buzima erikwegyesa. Bwanyima y’omwaka nka gumwe, nkabatizibwa naaba Omujurizi wa Yehova. Hati aha myaka 79, niimanya ngu ndi omu muhanda oguhikire. Yehova ampaire emigisha arikunyikiriza kuba omwe aha b’eka ye abeehaireyo.”
Noobaasa Kukunda n'Ebi
EBIBUUZO EBIRIKUKIRA KUBUUZIBWA
Omushomo gw’Okwegyesa Baibuli ogw’Abajurizi ba Yehova Niki?
Omu ntebeekanisa ya busha ey’okuhikaanisa ebiteekateeko ey’Abajurizi ba Yehova, noobaasa kukoresa envunuura ya Baibuli yoona. Noobaasa kwega n’eka yaawe yoona nari kweta banywani baawe.
