OBU Yesu yaabaire ari omu nsi, akooreka gye emitwarize nk’eya Ishe n’omuringo ogu arikukoramu ebintu. Akagira ati: “Ebi nkora tinyeragiira, kureka ngamba nk’oku Tata yaanyegyeise . . . Ahabw’okuba obutoosha nkora ebimushemeza.” (Yohaana 8:28, 29; Abakolosai 1:15) N’ahabw’ekyo, twayetegyereza oku Yesu yaabaire naatwariza abakazi n’emiteekateekyere ei yaabaire abaineho, nitumanya oku Ruhanga arikubatwara n’eki arikubenza.

Oku Yesu yaabaire naatwariza abakazi nikutaana aha ku baabaire nibatwarizibwa obu ebitabo by’Engiri byabaire nibihandiikwa. Mu muringo ki? Ekikuru munonga, enyegyesa ezo na hati nizibaasisa abakazi kutunga obugabe bwabo?

Yesu akaba nk’ekikoreso ky’okuteerana. Abeebembezi b’ediini y’Ekiyudaaya bakaba nibamanya ngu okwemanyiiza omuntu ou otarikushushani nawe obuhangwa nikirugamu okumurigira. Ahabw’okugira ngu abakazi bakaba nibareebwa nk’abarikureeta okwohibwa, bakaba batarikwikirizibwa kugamba n’abashaija omu rweteeraine, nari kugyenda batajwaire eky’okwetwekyerera. Kwonka, Yesu akarabura abashaija kutegyeka enyehurira zaabo kandi bakatwariza abakazi omu muringo gw’ekitiinisa omu mwanya gw’okubashoroora aha bandi.—Matayo 5:28.

Kandi Yesu akagira ati: ‘Omuntu weena orikushenda omukazi we, akashwera ondiijo, biri naaba ashambaine.’ (Mako 10:11, 12) N’ahabw’ekyo, akanga kushagika enyegyesa y’Ekiyudaaya eyaabaire neebaasisa omushaija kutaana n’omukazi we “yaaba aine eki arikumutura kyona.” (Matayo 19:3, 9) Abayudaaya abarikukira obwingi bakaba nibataana bakazi baabo n’obu bakuba batashambaine. Abeebembezi baabo bakaba nibeegyesa ngu omushaija we tashambana, ngu abakazi nibo barikushambana! Ekitabo kimwe ekirikushoboorora ahari Baibuli nikigira kiti: “Yesu okutaho omutindo ogurikukwata aha bashaija n’abakazi hamwe, akatunguura omutindo gw’abakazi n’ekitiinisa kyabo.”

Oku turikukwatwaho enyegyesa egi hati: Omu kibiina Ekikristaayo eky’Abajurizi ba Yehova, abashaija n’abakazi nibaramiza hamwe omu nteerane. Kwonka, baine kwetantara kubareeba omu muringo ogutashemeire, nari kubeemanyiiza, ahakuba abashaija Abakristaayo nibeegyendesereza kutwariza ‘abakazi bato n’abaishiki nka banyaanyobo, babaineho omutima ogushemeire.’—1 Timoseo 5:2.

Yesu akakoresa obwire bwe kwegyesa abakazi. Yesu okutaana n’Abayudaaya abaabaire nibareeba abakazi nk’ab’ahansi, we akabeegyesa kandi yaabareetera kugamba batatiinire. Yesu okwikiriza Mariamu kuhurira ebi yaabaire naayegyesa, akooreka ngu abakazi tibashemereire ab’okuteeka kyonka. (Luka 10:38-42) Mariza murumuna wa Mariamu nawe akagasirwa omu kwegyesa kwa Yesu, nk’oku kirikureeberwa aha muringo gw’obwengye ogu yaagarukiremu Yesu bwanyima Laazaaro kufa.—Yohaana 11:21-27.

Eki abakazi baabaire nibateekateeka ngu ni kikuru ahari Yesu. Obu Yesu yaabaire ari omu nsi, abakazi Abayudaaya bakaba nibateekateeka ngu waazaara omwana na munonga yaaba ari nabi nikyo kirikureeta okushemererwa. Omukazi omwe ku yaagambire n’eiraka rihango ati: ‘Enda eyaakuzaire eine omugisha’ nari okushemererwa! Yesu akatunga omugisha gw’okumugambira ekintu ekirikukira oburungi. (Luka 11:27, 28) Yesu okumugambira ngu okworobera Ruhanga nikyo kikuru munonga, okukira okukuratira emigyenzo erikukwata aha bakazi.—Yohaana 8:32.

Oku turikukwatwaho enyegyesa egi hati: Abaine obujunaanizibwa bw’okwegyesa omu kibiina Ekikristaayo nibaikiriza abakazi kugarukamu baba bari omu nteerane. Ni baaha ekitiinisa abakazi abakuzire ahabw’okwegyesa “ebirungi,” barikuba eky’okureeberaho kirungi. (Tito 2:3) Kandi nibabeesiga ahabw’okugambira abandi amakuru marungi g’Obukama bwa Ruhanga.—Zaaburi 68:11; reeba akabokusi “Mbwenu Shi Entumwa Paulo Akaba Naazibira Abakazi Kugamba?” aha rupapura 9.

Yesu akaba naafayo aha bakazi. Omu bwire bwa Baibuli, abaishiki bakaba batarikufuubwaho nk’aboojo. Eki nikigambwaho omu kitabo ky’Abayudaaya ngu, “aine okushemererwa n’ogwo oine abaana b’aboojo, kandi oine abaana b’abaishiki aine enaku.” Abazaire bakaba nibareeba omwishiki nk’omugugu n’ahabw’ekyo bakaba bamusherurira omushaija kugira ngu abahe enjugano, reero bataija kumwesiga kuba niwe yaabahwera omu myaka yaabo ya bukuru.

Yesu akooreka ngu omwana w’omwojo n’ow’omwishiki bombi n’ab’omugasho obu yaazoora omuhara wa Yairo na mutabani w’efaakazi omuri tauni ya Naini. (Mako 5:35, 41, 42; Luka 7:11-15) Bwanyima ya Yesu kukiza omukazi owaabaire amazire “emyaka ikumi na munaana ariho daimoni,” akamweta “muhara wa Abrahamu,” ebigambo ebitari mu bihandiiko by’Ekiyudaaya. (Luka 13:10-16) Okukoresa ebigambo ebi omu muringo gw’ekitiinisa kandi ogw’embabazi, akooreka ngu omukazi ogwo n’ow’omuhendo nk’abandi bantu, kandi ngu nawe aine okwikiriza kwingi.—Luka 19:9; Abagalatia 3:7.

Oku turikukwatwaho enyegyesa egi hati: Enfumu ya b’Asia neegira eti: “Okworora omwana w’omwishiki ni nk’okwitirira omusiri gwa mutaahi waawe.” Abazaire Abakristaayo tibarikushagika emiteekateekyere egyo, nibareeberera abaana boona, aboojo n’abaishiki. Abazaire Abakristaayo nibahamya ngu abaana boona baatunga obwegyese burungi n’obujanjabi.

Yesu naayesiga abakazi. Omu ishengyero ry’Ekiyudaaya, obwamushinja bw’omukazi bukaba nibwingana n’obw’omuhuuku. Josephus, omunyabyafaayo omu kyasha ky’okubanza, akarabura ati: “Obwamushinja bw’abakazi tibushemereire kwikirizibwa, ahabw’okugira ngu obuhangwa bwabo tuburikuheebwa kutiinisa.”

Okutaana n’ekyo, Yesu akatoorana abakazi kuba nibo baagambira abandi ngu azookire. (Matayo 28:1, 8-10) Abakazi abo abeesigwa bakareeba okwitwa n’okuziikwa kwa Mukama waabo, kwonka kikagumira entumwa kwikiriza ebi babagambira. (Matayo 27:55, 56, 61; Luka 24:10, 11) Kwonka, Kristo okubanza kweyoreka abakazi aherize kuzooka, kikooreka ngu nabo bahikire kuba baakareebi be nk’abeegi be abandi.—Ebyakozirwe 1:8, 14.

Oku turikukwatwaho enyegyesa egi hati: Omu bibiina by’Abajurizi ba Yehova, abashaija abaine obujunaanizibwa nibafayo kuhurikiza ebitenso bya banyaanyazi-itwe. Kandi abashaija Abakristaayo, ‘nibaha ekitiinisa’ abakazi baabo barikubahurikiza n’obwegyendesereza.—1 Petero 3:7; Okutandika 21:12.

Abashaija baatooreza Kristo, nibaha abakazi ekitiinisa n’obugabe nk’oku Ruhanga yaabaire naayenda. (Okutandika 1:27, 28) Omu mwanya gw’abashaija Abakristaayo kwereeba nk’abarikukira abakazi, nibagyendera aha misingye ya Baibuli, reero obushwere bwabo bwongyera kubamu okushemererwa.—Abaefeso 5:28, 29.

Obu Yelena yaatandika kwega Baibuli, iba akaba naamutuuntuza. Akaba akuriire omu mbeera y’obushaarizi kandi okuhamba abakazi n’okubateera bikaba biri ebikorwa bya butoosha. “Ebi naayegire omu Baibuli bikampa amaani,” nikwo Yelena arikugira. “Nketegyereza ngu hariho omuntu orikunkunda munonga kandi orikunfaho. Kandi nketegyereza ngu ibanyi yaayega Baibuli, naija kuhindura oku arikuntwariza.” Ekirooto kye kikahikiirira obu iba yaikiriza kwega Baibuli reero akabatizibwa akaba Omujurizi wa Yehova. “Akaba eky’okureeberaho kirungi omu kuba omwerinzi n’okwetegyeka,” nikwo Yelena arikugira. “Tukeega kusaasirana tutataireho bushonshorekye.” Yelena naahendera ata? “Buzima emisingye ya Baibuli empweraire kwereeba nk’ow’omugasho n’okugira oburinzi omu bushwere bwangye.”—Abakolosai 3:13, 18, 19.

Yelena tiwe wenka orikwehurira atyo. Abakazi Abakristaayo baine okushemererwa omu bushwere ahabw’okugira ngu boona nk’eka nibateeraho kugyendera aha misingye ya Baibuli. Nibaheebwa ekitiinisa, okuhuumurizibwa, n’obugabe buringaniire omu kibiina Ekikristaayo.—Yohaana 13:34, 35.

Abashaija n’abakazi Abakristaayo nibamanya ngu bombi tibahikiriire, kandi ngu ni bamwe aha bihangirwe bya Ruhanga ebirikutegyekwa “ebitaine mugasho.” Kwonka, baagira omukago murungi na Ruhanga, Yehova Tataitwe nibagira amatsiko g’okwija ‘kucungurwa, barekye kuba ab’okujunda, kureka baheebwe obusingye bw’abaana ba Ruhanga obw’ekitiinisa.’ Abashaija n’abakazi boona ka baine amatsiko g’omuhendo barikureebererwa Ruhanga!—Abarooma 8:20, 21.