MOALƐ MAA ABUSUA
Kɛzi Ɛbaboa Ɛ Ra Wɔamaa Yeabɔ Mɔdenle Wɔ Sɔnea Nu La
Ɔzɔho kɛ ɛ ra ne anye ɛnlie sukulu ɛhɔlɛ nwo, ɔnzukoa debie na yeayɛ ye homework. Boni a ɛvi nu ɛra a? Ye mɔdenlebɔlɛ ɛlɛka aze na ɛhye ɛmaa ye subane ne akee ɛlɛsɛkye bɔkɔɔ. Kɛzi ɛbaboa ɛ ra ne wɔamaa yeabɔ mɔdenle wɔ sukulu sɔnea nu ɛ?
Mɔɔ ɔwɔ kɛ ɛnwu ye la
Saa ɛtinlitinli ɔ nwo zo a ɛbazɛkye edwɛkɛ ne. Saa ɛtinlitinli ɛ ra ne kɛ ɔyɛ dɔɔnwo a, ɔbamaa adwenleadwenle adɔ ɔ nwo wɔ sukulu nu nee sua nu! Amaa yeade adwenleadwenle ne azo la, ɔbabɔ adalɛ, yeava ye result ne yeavea, yeava ɔ sa yeawula ye sɔnea nwo amaneɛbɔlɛ kɛlata ne abo kɛ asɛɛ ɛdawɔ a ɛyɛle a, anzɛɛ ɔnrɛhɔ sukulu fee. Ngyegyelɛ ne bayɛ kpole.
Ahyɛlɛdeɛ ɛnrɛboa. Selɛ bie mɔɔ bɛfɛlɛ ye Andrew la ka kɛ, “Amaa yeamaa yɛ ra raalɛ ne anwosesebɛ la, saa ɔbɔ mɔdenle wɔ ye sɔnea nu a, yɛkyɛ ye debie, noko ɛhye maanle ɔvale ye adwenle ɔziele ahyɛlɛdeɛ ne azo. Saa yeambɔ mɔdenle a, ɔyɛ ye nyane, tɛ kɛ yeampɛ ye sɔnea ne la ati ɔ, emomu kɛmɔ ɔnrɛnyia ahyɛlɛdeɛ la ati.”
Ɛbɔ kilehilevolɛma ne somolɛ a, ɔnrɛboa ɛ ra ne. Ɛ ra ne badwenle kɛ ɔngyia kɛ ɔbɔ mɔdenle na yeayɛ deɛ wɔ sɔnea nu. Ɔbazukoa kɛ ɔbabɔ awie mɔ somolɛ wɔ ye nvonleɛ nwo na ɔ nye ala kɛ bɛbali ye ngyegyelɛ nwo gyima bɛamaa ye. Ye sikalɛ nu, ɛ ra ne baminli ndetelɛ kpalɛ mɔɔ ɔbahyia nwo wɔ ye mgbanyifoa la—kɛ ɔbalie mɔɔ vi ye nyɛleɛ nu ba la anwo ɛzonle yeado nu.
Mɔɔ ɛbahola wɔayɛ la
Sɔ ɛ nwo. Saa ɛnea na wɔva ɛya a, mmaka ɛ ra ne sɔnea ne anwo edwɛkɛ ɛkɛ ne ala. Selɛ bie mɔɔ bɛfɛlɛ ye Brett la ka kɛ, “Saa me nee me ye kendɛ kɔkpula mekɛ mɔɔ yɛ ɛya ne ɛha aze na yɛbade ye edwɛkɛ bo la a, ɔboa kpalɛ.”
Baebolo ngyinlazo: “Ɔwɔ kɛ awie biala yɛ ye ndɛ tie edwɛkɛ, ɔmmapele ɔ nwo ɔtendɛ, yɛɛ ɔmmafa ɛya ndɛndɛ.”—Gyemise 1:19.
Kpondɛ ngyegyelɛ ne abo. Fane dɔɔnwo ne ala, apo ɛbɔlɛ, sukulu ɛhakyilɛ, sɔnea nwo adwenleadwenle, abusua nu ngyegyelɛ, nafelɛ kpalɛ mɔɔ bɛnnyia ye, ngyehyɛleɛ kpalɛ mɔɔ bɛnyɛ anzɛɛ bɛ adwenle mɔɔ bɛngola bɛnva bɛnzie debie zo kpalɛ la bahola amaa awie mɔdenlebɔlɛ wɔ sɔnea nu aha aze. Mmadwenle kɛ ɛ ra ne le mgbovonle.
Baebolo ngyinlazo: “Ɔbawie sonla mɔɔ da nwunu ali wɔ edwɛkɛ nu la boɛ.”—Mrɛlɛbulɛ 16:20, New World Translation.
Mmamaa ɔyɛ se kɛ bɛbazukoa debie. Yɛ ngyehyɛleɛ maa homework nee debiezukoalɛ. Maa ɛ ra ne ɛyɛ ye homework wɔ ɛleka mɔɔ debie ɛndwehwe ye adwenle la (ninyɛne le kɛ television nee mobaele fonu boka nwo). Kyehyɛ mekɛ mɔɔ ɛ ra ne bava ayɛ ye homework la anu ngyikyi ngyikyi amaa yeahola yeava ye adwenle yeazie zo. Hector, selɛ bie mɔɔ ɔwɔ Germany la ka kɛ, “Saa bɛlɛba bɛarayɛ sɔnea bie a, yɛngendɛ yɛmmaa ɔndwu zo kolaa na yɛazukoa, yɛbɔ ɔ bo yɛsukoa ye ngyikyi ngyikyi.”
Baebolo ngyinlazo: “Debie biala lɛ ye ɛlobɔ.”—Nolobɔvo ne 3:1.
Maa debiezukoalɛ nwo anwosesebɛ. Saa ɛ ra ne nwu ye kɛ ɔnyia sukulu zo nvasoɛ ɛnɛ a, ɔbamaa ye anwosesebɛ yeamaa yeazukoa debie. Kɛ neazo la, mgbondabulɛ baboa ye yeamaa yeanlea ye ezukoa zo boɛ.
Baebolo ngyinlazo: “Nwu nrɛlɛbɛ na nyia ndelebɛbo. Kulo nrɛlɛbɛ.”—Mrɛlɛbulɛ 4:5, 8.
Nzuzulɛ: Boa ɛ ra ne maa ɔyɛ ye homework, noko mmayɛ ɛmaa ye. Andrew ka kɛ, “Yɛ ra raalɛ ne vale ɔ nwo dole yɛ adwenle ne azo na ɔdole ye ɛdeɛ ne anu.” Kile ɛ ra ne kɛzi ɔdaye mumua ne ɔbayɛ ye homework la.