“Aneɛ ngakyile” ɛhanlɛ le tumi bie mɔɔ ɛvoya mɔɔ limoa la anu Kilisienema bie mɔ nyianle bɛvale bɛhanle aneɛ fofolɛ mɔɔ bɛtɛsukoale ye ɛlɛ la. (Gyima ne 10:46, New International Version) Ɛnee awie biala mɔɔ te aneɛ mɔɔ tendɛvolɛ ne ɛlɛfa ali gyima la te ɔ bo. (Gyima ne 2:​4-8) Aneɛ ngakyile ɛhanlɛ boka ahyɛlɛdeɛ ngakyile mɔɔ Nyamenle sunsum nwuanzanwuanza ne maanle ɛvoya mɔɔ limoa Kilisienema bie mɔ nyianle la anwo.​—Hibuluma 2:4; 1 Kɔlentema 12:4, 30.

•  Nienwu yɛɛ mekɛ boni a aneɛ ngakyile ɛhanlɛ ne bɔle ɔ bo a?

•  Bodane boni ati a bɛhanle aneɛ ngakyile a?

•  Ɛnee ɔwɔ kɛ aneɛ ngakyile ɛhanlɛ ne toa zo dahuu ɔ?

•  Mekɛ boni a aneɛ ngakyile ɛhanlɛ rale awieleɛ a?

•  Na aneɛ ngakyile mɔɔ bɛka ye ɛnɛ la noko ɛ?

•  Kɛ ɔkɛyɛ na wɔanwu nɔhalɛ Kilisienema ɛ?

 Nwanwane deɛ ɛhye limoale zile nwonlomɔ nu wɔ Gyɛlusalɛm, wɔ mekɛ mɔɔ Dwuuma ɛlɛdi Pɛntekɔso Ɛvoyia ne wɔ ɛvolɛ 33 Y.M la. Ɛnee Gyisɛse ɛdoavolɛma kɛyɛ 120 ɛyia “na sunsum nwuanzanwuanza ne yile bɛ muala tetɛkɛɛ na bɛbɔle ɔ bo bɛhanle aneɛ ngakyile.” (Gyima ne 1:​15; 2:​1-4) Ɛnee menli dɔɔnwo “mɔɔ vi maanle biala anu” la ɛrayia na “bɛ nuhua ko biala dele kɛ bɛlɛka ye sua zo aneɛ.”​—Gyima ne 2:​5, 6.

1.   Amaa bɛanwu kɛ Nyamenle gyi Kilisienema anzi. Wɔ tete ne, Nyamenle luale nwanwane ninyɛne mɔɔ ɔyɛle la azo ɔhilele kɛ ɔgyi nɔhavoma le kɛ Mosisi anzi. (Adendulɛ 4:1-9, 29-31; Ɛdianlɛ 17:10) Aneɛ ngakyile ɛhanlɛ lile bodane ko ne ala anwo gyima, Nyamenle luale zo hilele kɛ ɔgyi Kilisiene asafo ne mɔɔ ɛnee bɛhyehyɛ ye fofolɛ la anzi. Ɛzoanvolɛ Pɔɔlo hɛlɛle kɛ: “Aneɛ ngakyile ɛnle sɛkɛlɛneɛ ɛmmaa diedima, ɔle sɛkɛlɛneɛ ɔmaa bɛdabɛ mɔɔ bɛnle diedima la.”​—1 Kɔlentema 14:22.

2.   Ɔmaanle Kilisienema holale lile daselɛ bɔkɔɔ. Menli mɔɔ diele Gyisɛse ɛdoavolɛma ne ɛdendɛlɛ ne wɔ Pɛntekɔso kenle ne la hanle kɛ: “Yɛte kɛ bɛlɛfa yɛ sua zo aneɛ bɛaha ninyɛne mgbole mɔɔ Nyamenle ɛyɛ la anwo edwɛkɛ.” (Gyima ne 2:​11) Yemɔti, bodane titili bieko mɔɔ ɔti bɛhanle aneɛ ngakyile la a le kɛ bɛfa ‘bɛali daselɛ bɔkɔɔ’ na bɛamaa ‘maanle maanle kɔsɔɔti anu menli arayɛ ɛdoavolɛma’ kɛ mɔɔ Gyisɛse zele bɛ la. (Gyima ne 10:42; Mateyu 28:19) Menli kɛyɛ 3,000 ne mɔɔ nwunle nwanwane deɛ zɔhane na bɛdele daselɛ mɔɔ bɛlile la yɛle ɛdoavolɛma wɔ kenle ko ne ala.​—Gyima ne 2:​41.

 Kyɛkyɛ. Ɛnee ahyɛlɛdeɛ ngakyile mɔɔ sunsum nwuanzanwuanza ne maanle bɛnyianle mɔɔ aneɛ ngakyile ɛhanlɛ boka nwo la bayɛ mekɛ ezinraa nu debie. Baebolo ne hanle dole ɛkɛ kɛ: “Saa ngapezo nwo ahyɛlɛdeɛ wɔ ɛkɛ a, bɛbaye bɛavi ɛkɛ; saa aneɛ ngakyile wɔ ɛkɛ a, ɔ bo bapɛ.”​—1 Kɔlentema 13:8.

 Ɛzoanvolɛ ne mɔ maanle Kilisienema gyɛne nyianle sunsum nwuanzanwuanza ahyɛlɛdeɛ ne bie ɔlua bɛ sa mɔɔ bɛvale bɛguale bɛ mediema diedima anwo zo la azo. (Gyima ne 8:​18; 10:44-​46) Ɔzɔho kɛ bɛdabɛ mɔɔ bɛnyianle sunsum ne ahyɛlɛdeɛ ne mɔ bɛvile ɛzoanvolɛ ne mɔ ɛkɛ la anva ammaa awie gyɛne. (Gyima ne 8:​5-7, 14-​17) Kɛ neazo la, arane gyima nu kpanyinli bie bahola ava kale ɛhanlɛ nwo tumi kɛlata (driver’s license) amaa awie, noko zɔhane sonla ne ɛnlɛ mɛla adenle zo tumi kɛ ɔbava license yeamaa awie gyɛne. Ɔda ali kɛ, aneɛ ngakyile ɛhanlɛ rale awieleɛ wɔ mekɛ mɔɔ ɛzoanvolɛ ne mɔ yɛɛ menli mɔɔ bɛmaanle bɛ ahyɛlɛdeɛ ne bie wule la.

 Ɔda ali kɛ aneɛ ngakyile ɛhanlɛ nwo ahyɛlɛdeɛ ne rale awieleɛ wɔ kɛyɛ ɛvoya mɔɔ limoa Y.M. la awieleɛ. Ɛnɛ, awie biala ɛnrɛhola ɛnrɛha kɛ Nyamenle tumi ne a ɔfa ɔka aneɛ ngakyile a. *

 Gyisɛse hanle kɛ tunwomaa ɛlɔlɛ yɛɛ ɔbamaa bɛanwu ye ɛdoavolɛma a. (Dwɔn 13:34, 35) Zɔhane ala noko a ɛzoanvolɛ Pɔɔlo hilehilele kɛ ɛlɔlɛ a bayɛ debie titili mɔɔ bamaa bɛanwu nɔhalɛ Kilisienema a. (1 Kɔlentema 13:​1, 8) Ɔhilele kɛ, Nyamenle sunsum ne bamaa Kilisienema anyia subane ngakyile mɔɔ ka bɔ nu yɛ “sunsum ne ma” la, na nuhua ne mɔɔ limoa la a le ɛlɔlɛ.​—Galeehyeama 5:22, 23.