Adalɛ edwɛkɛ: Gyihova Alasevolɛ ɛnli Easter ɔluakɛ bɛnle Keleseɛnema.

 Nɔhalɛ edwɛkɛ: Yɛdie yɛdi kɛ Gyisɛse Kelaese a le yɛ Ngoanedievolɛ a, na yɛbɔ mɔdenle kɛ “yɛbava ɔ gyakɛ.”—1 Pita 2:21; Luku 2:11.

 Adalɛ edwɛkɛ: Bɛnlie bɛnli kɛ bɛdwazole Gyisɛse bɛvile ewule nu.

 Nɔhalɛ edwɛkɛ: Yɛdie Gyisɛse ewudwazo ne yɛdi na yɛdie yɛto nu kɛ yemɔ a yɛ Keleseɛne anyelazo ne gyi zo a, na yɛtwe adwenle yɛsie zo wɔ yɛ edwɛkɛhanlɛ gyima ne anu.—1 Kɔlentema 15:3, 4, 12-15

 Adalɛ edwɛkɛ: Bɛndwenle anyelielɛ mɔɔ bɛ mra ɛnnyia ye wɔ Easter mekɛ nu la anwo.

 Nɔhalɛ edwɛkɛ: Yɛkulo yɛ mra ne mɔ—yɛbɔ mɔdenle wɔ bɛ ɛtetelɛ nu, na yɛboa bɛ yɛmaa bɛ nye die.—Taetɛse 2:4.

•   Easter ɛvoyialilɛ ne ɛngyi Baebolo ne azo.

•   Gyisɛse hanle kɛ yɛhakye ye ewule ne, tɛ ye ewudwazo ne. Ɛvolɛ biala, saa mekɛ mɔɔ ɔvale ɔwule la dwu zo a yɛkakye ye.—Luku 22:19, 20.

•   Yɛdie yɛdi kɛ Nyamenle anye ɛnlie Easter nwo ɔluakɛ ye amaamuo ne abo vi tete awozonle ɛzonlenlɛ nu. Nyamenle kpondɛ kɛ yɛsonle ɔ ngomekye ala yemɔti ɛzonlenlɛ mɔɔ nuhua nyɛleɛ ɛnzɔ ɔ nye la ka ye ɛya.— Adendulɛ 20:5; 1 Arelemgbunli 18:21.

 Yɛdie yɛdi kɛ kpɔkɛ mɔɔ yɛzi kɛ yɛtwe yɛ nwo yɛavi Easter nwo la gyi Baebolo ne azo; Baebolo ne tu yɛ folɛ kɛ yɛva “nrɛlɛbɛ nee adwenlenunwunlɛ” yɛli gyima tɛla kɛ yɛbali alesama amaamuo nzi. (Mrɛlɛbulɛ 3:21; Mateyu 15:3) Saa awie biza yɛ Easter nwo edwɛkɛ a yɛkilehile nu yɛkile ye, noko yɛze kɛ awie biala lɛ adenle si mɔɔ ɔbayɛ la anwo kpɔkɛ.—1 Pita 3:15.