Mrɛlɛbulɛ 14:1-35
14 Raalɛ nrɛlɛbɛvolɛ kyekye ye awuke,+Noko raalɛ koasea fa ɔ sa bubu ye ɛdeɛ ne gua aze.
2 Sonla mɔɔ fa tenleneyɛlɛ dua la sulo Gyihova,Noko mɔɔ ye ndenle nu le mɛlɛbɛla* la ɛmbu Ye.
3 Koasea anwomemaazo ɛdendɛlɛ le kɛ anzohwenlɛ baka la,Noko nrɛlɛbɛvolɛma anloa babɔ bɛ nwo bane.
4 Saa nlankɛ ɛnle ɛkɛ a, nyɛmoa adidilɛka nu te,Noko ɛnlankɛ nyinli anwosesebɛ maa bɛnyia ma dɔɔnwo.
5 Dasevolɛ nɔhavo ɛnrɛbɔ adalɛ,Noko mɔɔ di dasewia la bɔ adalɛ mekɛ biala.+
6 Sonla mɔɔ memaa ɔ nwo zo la* kpondɛ nrɛlɛbɛ noko ɔnnyia bie,Noko adwenle ɛnyianlɛ ɛnyɛ se ɛmmaa sonla mɔɔ lɛ ndelebɛbo la.+
7 Twe ɛ nwo fi koasea nwo,Ɔluakɛ ɛnrɛde nrɛlɛbɛ edwɛkɛ biala wɔ ɔ nloa anu.+
8 Nrɛlɛbɛ maa sonla mɔɔ anye gyi ɔ ti anwo la nwu ye adenle nu boɛ,Noko ahoasea ngoaseade bɛlɛbɛla bɛ.*+
9 Ahoasea bu fɔlɛlilɛ* kɛ ɛzelekɛ debie,+Noko tenlenema lɛ ɛhulolɛ kɛ bɛbaziezie bɛ avinli.*
10 Ahonle ne a ze ɔdaye ye nyanelilɛ* a,Yɛɛ ɔlɛdi fɛlɛko a awie gyɛne ɛnli bie.
11 Bɛbazɛkye amumuyɛma awuke,+Noko tenlenema ɛdanlɛsua bakpazi.
12 Adenle ne bie wɔ ɛkɛ ne a ɔle kpalɛ wɔ sonla nye zo,+Noko ye awieleɛ wie ewule nu.+
13 Ɛzelekɛ nu bɔbɔ, ahonle kola di nyane,Yɛɛ fɛlɛkolilɛ kola wie nyanelilɛ nu.
14 Sonla mɔɔ ɛde atua wɔ ahonle nu la banyia ye ndenle nwo ahatualɛ,+Noko sonlakpalɛ banyia ye nyɛleɛ ne mɔ anwo ahatualɛ.+
15 Sonla mɔɔ ye adwenle ɛtɛtinli* la die edwɛkɛ biala di,Noko mɔɔ anye gyi ɔ ti anwo la dwenle ɔ gyakɛ biala mɔɔ ɔlɛtu la anwo.+
16 Nrɛlɛbɛvolɛ anye la ɛkɛ* yɛɛ ɔtwe ɔ nwo ɔfi ɛtane nwo,Noko koasea ɛndwenle* yɛɛ ɔdie ɔ nwo ɔdi somaa.
17 Sonla mɔɔ ɛngyɛ na yeava ɛya la yɛ ye debie koasea nu,+Noko bɛkpɔ sonla mɔɔ dwenle ninyɛne nwo* la.
18 Sonla mɔɔ ye adwenle ɛtɛtinli* la bayɛ koasea,Noko mɔɔ anye gyi ɔ ti anwo la abotile a le adwenle.+
19 Ɛtanevolɛma babɔ bɛ ti aze wɔ kpalɛma anyunlu,Yɛɛ amumuyɛma babɔ bɛ ti aze wɔ tenlenema nlenkɛ mgbole ne mɔ anloa.
20 Ehyianli agɔnwo mɔ bɔbɔ kpɔ ye,+Noko sukoavolɛ lɛ agɔnwolɛma dɔɔnwo.+
21 Sonla mɔɔ ɛmbu ɔ gɔnwo la yɛ ɛtane,Noko anyelielɛ a le sonla mɔɔ ɔ kunlu yelɛyela ye maa koahweabanema la.+
22 Asoo bɛdabɛ mɔɔ bɛbɔ adwenle ɛtane la ɛnrɛminli ɔ?
Noko bɛdabɛ mɔɔ bɛbɔ kpɔkɛ kɛ bɛyɛ kpalɛ la banyia ɛlɔlɛ kpundii nee nɔhalɛlilɛ.+
23 Gyima ɛsesebɛ biala azo lɛ nvasoɛ,Noko ɛdendɛlɛ mgbane maa bɛdi ehyia.+
24 Nrɛlɛbɛvolɛma abotile a le bɛ anwonyia;Noko ahoasea ngoaseade le ngoaseasɛm ngome.+
25 Dasevolɛ nɔhavo die ngoane,*Noko mɛlɛbɛla sonla bɔ adalɛ mekɛ biala.
26 Sonla mɔɔ sulo Gyihova la anwodozo le kpole,+Na ɔbayɛ ɛvealeka yeamaa ɔ mra.+
27 Gyihova ɛzulolɛ le ngoane nzubula,Ɔtwe sonla ɔfi ewule ngane ne mɔ anwo.
28 Belemgbunli anyunlunyia a le ye menli dɔɔnwo ne,+Noko tumivolɛ mɔɔ ɛnlɛ maanlema la bɔ aze.
29 Sonla mɔɔ kyɛ na yeava ɛya la lɛ adwenlenunwunlɛ kpole,+Noko mɔɔ ɛnlɛ abotane la da ye ngoaseade ne ali.+
30 Ahonle mɔɔ le bɛlɛvo la maa sonlabaka ne nyia ngoane,*Noko nungule ɛhwenlɛ kpɔlɔ mbowule.+
31 Sonla mɔɔ sisi koahweabane la bɔ ye Bɔvolɛ ne aholoba,+Noko mɔɔ ɔ kunlu yelɛyela ye maa ehyianli la wula Ye anyunlunyia.+
32 Amumuyɛnli ɛtaneyɛlɛ bamaa yeadɔ aze,Noko tenlenenli banyia ɛvealeka wɔ ye nɔhalɛlilɛ* nu.+
33 Nrɛlɛbɛ die ɔ menle wɔ sonla mɔɔ lɛ ndelebɛbo la ahonle nu,+Noko wɔ ahoasea avinli ɛdeɛ, ɔda ɔ nwo ali.
34 Tenleneyɛlɛ kpogya maanle zo,+Noko ɛtane gua menli nyunlu aze.
35 Belemgbunli anye die sonvolɛ mɔɔ fa nwunu di gyima la anwo,+Noko ye ɛya wɔ mɔɔ yɛ anyiemgba ninyɛne la anwo zo.+
Ɔbodwɛkɛ
^ Anzɛɛ “kyeɛhyea.”
^ Anzɛɛ “Agolobɛnwonli.”
^ Anzɛɛ ɔkola ɔkile, “ahoasea bɛlɛbɛla awie mɔ.”
^ Anzɛɛ “nzenzaleɛyɛlɛ.”
^ Anzɛɛ “lɛ ɛlolɛ wɔ ɛkɛ.”
^ Anzɛɛ “ye ɛkɛla ne nyanelilɛ.”
^ Anzɛɛ “mɔɔ ɛnlɛ anwubielɛ.”
^ Anzɛɛ “anye gyi ɔ ti anwo.”
^ Anzɛɛ “fa ɛya.”
^ Anzɛɛ “sonla mɔɔ lɛ adwenlenubukelɛ.”
^ Anzɛɛ “mɔɔ ɛnlɛ anwubielɛ.”
^ Anzɛɛ “ɛkɛla.”
^ Anzɛɛ “kpɔkɛdelɛ kpalɛ.”
^ Anzɛɛ “munlililɛ.” Nea Edwɛkɛbohilelɛ.
