Nen Marso 2019, impanalo na Korte Suprema na Cassation diad Bulgaria, say sankatageyan ya korte diman, so taloran kaso ed saray agagi tayo. Sarayan impanalo so magmaliw a basiyan pian naprotektaan so karapatan na saray agagi ed interon Bulgaria ya mandayew ed si Jehova.

Say duaran kaso et walay koneksion to ed panagpauges ya ginawa na sakey a dyaryo tan sakey ya istasyon na TV. Nen 2012, im-publish na dyaryo ya Vseki Den so sakey ya artikulo ya napnoy tila nipaakar ed saray papanisiaan tayo. Ontan met, nen 2014, impalabas na istasyon ya SKAT TV iray palson balita nipaakar ed organisasyon tayo. Aglabay ya aminen ed publiko na satan ya dyaryo tan istasyon na TV ya aliwa iray imbaga da. Kayari na pigaran kaso tan inyapela ed korte, akasabi iratan diad Korte Suprema. Nen Marso 18, 2019, nandesisyon so Korte Suprema ya sumlang ed ganggan so ginawa na SKAT TV. Nen Marso 26, inusar na Korte itan ya desisyon bilang basiyan pian panmultaen so Vseki Den lapud impantila da.

Say komatlon kaso et lapud maruksan impamairap ed saray agagi tayo na sakey a grupo na politika ya tatawagen a VMRO-Bulgarian National Movement. Nen Abril 17, 2011, nantitipon iray agagi tayo pian selebraan so Memoryal na impatey nen Jesus. Balet walay grupo na 60 a totoo, ya inorganisa na lider na VMRO ya si Georgi Drakaliev, ya anggapoy panangasin inmataki ed saray agagi tayo. Kanian nandemanda iray agagi tan akasabi so kaso ed Korte Suprema. Nen Marso 20, 2019, nandesisyon so Korte sumpa ed si Mr. Drakaliev, kanian natan et kaukolan ton bayaran na danyos iray agagi.

Maliket tayo ed sarayan taloran impanalo. Nausar irayan desisyon bilang basiyan pian naprotektaan so karapatan na saray agagi tayo, diad ontan et ‘makapantultuloy iran manbilay a maligen tan mareen a walaay sigpot a debosyon ed Dios.’​—1 Timoteo 2:2.