Singa amin lan kakaarom et walay social media account da, tan atan lan lanang so bungay sangi da. Sika balet, anggapoy account mo kanian kakantiawan da ka. Antoy gawaen mo ey? Tan antoy dapat mon naamtaan tungkol ed social media?

 Aliwan sika labat so ontan. Dakel ya ananak so agmet papayagan na atateng da ya mangusar na social media. Amta na dakel ya atateng ya saramay manguusar na social media et nayarin:

•   na-depresss tan manka-problema ed mental health.

•   na-expose ed pornograpiya, sexting, tan cyberbullying.

•   makapikolkol ed kakaaro da.

 Dakel ya tinedyer so nandesisyon ya agla mangusar na social media. Desisyon dan mismo itan, ta imbes ya maong so epekto ed sikara, napapahamak laingen ira. Nia ray pigaran eksperiensya:

•   A-realize nen Priscilla ya nauupot so oras to ed satan imbes ya usaren to la komon ed mas importante iran kimey.

•   Agnagugustoan nen Jeremy iray ona-appear ed social media feed to, tan agto kontrolado iratan.

•   Apansin nen Bethany ya lapud social media, masyado lan akapokus ed bilay na arum.

 “In-delete ko lay social media app ko, tan duga iman ya ginawak. Agak manhihinayang ta mas nauusar ko lay oras ko parad mas importante iran bagay.”​—Sierra.

 “Makapaadik so social media, tan aburido ak ed no antoy reaksion na totoo ed saray post ko. Agko labay lan nalikna iman. Aminen ko, ngalngali agko kaya ya i-delete so account ko, pero nainawaan ak nen a-delete ko la itan. Mas mareen la natan so isip ko.”​—Kate.

 Unor mo ray rules na atateng mo. No agka onsyodot odino manreklamo ed saray rules na atateng mo, ipapanengneng mo ya makalakal tan matured ka.

 Prinsipyo ed Biblia: “Say makulangkulang et ibebesngaw toy amin a nalilikna to, balet samay marunong et kalmadon mangokontrol ed satan.”​—Proverbio 29:11, Balon Mundo a Patalos.

 Ompan walay man-advise ed sika ya pasekreto kan mangusar na social media odino manggawa kay secret account mo. Agmon balot komon gagawaen itan! No iyamot mo itan ed atateng mo, na-guilty ka labat. Sakey ni, ompan napahamak ka tan naekal so tiwala da ed sika.

 Prinsipyo ed Biblia: “Labay mi manbilay a matua ed amin a bengatla.”​—Hebreo 13:18.

 Dapat kombinsido ka ed desisyon mo. Singa saray kabataan ya abitla niman, ompan wala ni ray rason ya naisip mo no akin ya iwasan moy social media. No kombinsido ka ya talagan makapuy so epekto na satan ed sika, i-delete mo itan lapud atan so desisyon mo, aliwa labat ya lapud atan so labay na atateng mo. Kanian no tepetan ka na saray kakaarom, confident ka tan agda ka la kantiawan.

 Importantin tandaan: Unor mo ray atateng mo, tan manpokus ka ed pankasunduan yo tungkol ed social media pian pareho kayo na desisyon. Di ba, agmo met ipatey no anggapoy account mo?