PARAD SARAY KABATAAN
12: Goal
NO ANTOY LABAY YA IBAGA NA SATAN
Say goal et aliwa labat ya pangarap—say labay mon nagawad bilay mo. No labay mon nagawa so goal mo, kaukolan moy manplano, dapat marunong kan man-adjust, tan pansagpotan mo itan.
Wala ray goal ya magano labat a nagawaan (nayarin pigaran agew o simba labat), saray arum et medyo mabayag (pigaran bulan), tan saray arum et diad arapen ni (sakey taon o mas masulok ni). Pian nagawaan mo ray goal mo diad arapen, nayarin kaukolan mo ni manggawa na goal ya nasumpal mod pigaran simba o bulan.
NO AKIN YA IMPORTANTE
No nagawaan mo ray goal mo, mas walay kompiyansam ed sarilim, mas onapit kad saray kakaarom, tan mas maliket ka.
Kompiyansa ed sarili: No manggawa kay melag ya goal tan naabot mo itan, mas nawalaan kay kompiyansa ya manggawa na mas baleg iran goal. Naaruman met so kompiyansam ya arapen iray subok ed inagew-agew—singa say pressure na arum ya kabataan.
Pikakaaro: Mas labay na totoo so miulop ed saray walaan na goal—saramay amta day labay da tan mabulos dan pankimeyan itan. Ontan met, say sakey ed saray sankaabigan ya paraan pian onelet so pankakaaro et no pankikimeyan dan aboten so parehon goal.
Liket: No manggawa ka na saray goal tan naabot mo iratan, maliket ka ed agawaan mo.
“Labalabay koy manggawa na goal. Ta lapud satan et busy ak ya lanang tan walay rason kon pankimeyan itan. Tan no nagawaan ko lay goal ko, balibali liknaan ko tan ibagak, ‘Wow, talagan asumpal ko may labay kon nagawa!’”—Christopher.
PRINSIPYO ED BIBLIA: “Say toon manalagar na maung a siplug na dagem tan maung a panaon et anggapoy nitanem ton antokaman a tanaman tan anggapon balut so naani to.”—Eclesiastes 11:4, Maung a Balita.
NO ANTOY NAYARIN GAWAEN MO
Tumbok mo iraya pian makapanggawa ka na saray goal tan naabot mo iratan.
Manpili. Manggawa na listaan na saray goal mo, tan pantutumbokan mo iratan base ed labay mon iyuna. Pilim no dinan so unaan, komadua, komatlo, tan arum ni.
Manplano. Diad kada goal et gawaen iraya:
-
Mangi-set kay deadline.
-
Iplanom iray gawaen mo.
-
Isip mo ray nayarin problema tan no panon mon nasolusyonan iratan.
Onkiwas. Agmo la aalagaren ya aka-ready ya amin so kaukolan mo antis kan onggapo. Tepetan moy sarilim, ‘Antoy sankaunaan ya dapat kon gawaen pian naabot koy goal ko?’ Insan kiwas ka. Nengneng mo no anto la ray nagagawaan mo.
PRINSIPYO ED BIBLIA: “Saray plano na makuli et seguradon ontalona.”—Proverbio 21:5.
Ompan Nagustoan Mo Met
NO ANTOY IBABAGA NA ARUM YA KABATAAN
Talagan Maliket so Bilay Ko
Labay mon sulit tan maliket so bilay mo? Dengelen so istorya nen Cameron no panon ton nalmo so maliket a bilay diad nikadkaduman lugar.
TEPET NA SARAY KABATAAN
Panon Ak ya Manpili na Maong ya Alimbawa?
No walay maong ya alimbawan aligen mo, ontulong itan pian naiwasan mo ray problema, nagawaan moy goal mo, tan nawalaan kay maliket ya bilay. Pero siopay dapat mon aligen?
