PA PAREHA CASA
3: Respet
LOKE ESAKI TA NIFICA
Parehanan casa cu tin respet pa otro ta mustra cariño na otro hasta ora nan tin un desacuerdo. E buki Ten Lessons to Transform Your Marriage ta bisa: “E parehanan aki no ta bira cabesura. Nan ta sigui papia cu otro tocante e problema. Nan ta scucha e punto di bista di otro cu respet y ta trata na yega na un solucion cumbiniente pa nan tur dos.”
PRINCIPIO DI BIJBEL: “Amor ... no ta busca su mes interes.”—1 Corintionan 13:4, 5.
“Segun mi, mustra respet pa mi casa ta encera cu mi ta balor’e y cu mi no kier haci nada cu ta causa ni e ni nos matrimonio daño.”—Micah.
DICON ESEY TA IMPORTANTE?
Si parehanan casa no tin respet pa otro, nan lo cuminsa papia cu otro na un manera critico, sarcastico y hasta cu desprecio, locual segun expertonan ta un di e prome indicacionnan cu e matrimonio probablemente lo termina den divorcio.
“Rebaha bo casa, insult’e na un manera fini of haci joke tocante dje lo pon’e perde balor propio y confianza den bo, y esaki lo por causa daño na bo matrimonio.”—Brian.
LOKE BO POR HACI
PUNTRA BO MES:
Prome, presta atencion na loke bo ta bisa y haci pa un siman. Despues, haci bo mes e siguiente preguntanan:
-
Cuanto biaha mi a critica mi casa y cuanto biaha mi a elogi’e?
-
Den ki manera specifico mi a mustra respet pa mi casa?
PAPIA CU OTRO RIBA LO SIGUIENTE:
-
Ki palabra y accion boso ta considera respetuoso?
-
Ki palabra y accion boso no ta considera respetuoso?
ALGUN SUGERENCIA
-
Traha un lista chikito di tres punto cu lo bo kier pa bo casa traha ariba pa mustra respet na bo. Y laga bo casa haci mescos. Intercambia boso listanan y traha riba e tres puntonan ey.
-
Traha un lista di e cualidadnan cu bo ta gusta di bo casa. Y despues, bisa bo casa con hopi bo ta gusta e cualidadnan ey.
“Segun mi, mustra respet pa mi esposo ta encera demostra pa medio di mi accionnan cu mi ta balor’e y cu mi kier p’e ta feliz. No ta semper mi mester haci algo grandi, hopi biaha ta e cosnan chikito cu mi ta haci p’e of bis’e ta demostra cu mi ta respet’e di berdad.”—Megan.
Pero al fin y al cabo, no ta un cuestion di si abo ta considera bo mes respetuoso sino si bo casa ta haya bo respetuoso of no.
PRINCIPIO DI BIJBEL: “Bisti tierno compasion, bondad, humildad, suavidad y pasenshi.”—Colosensenan 3:12.
You May Also Like
SPIERTA!
Con pa Mustra Aprecio
Ora un esposo cu un esposa ta haci esfuerso pa mira e bunita cualidadnan di nan casa y elogia nan casa pa esey, nan relacion ta mehora. Kico por yuda bo haya aprecio?
