Conta nos algo di bo mes. Den cua religion bo a lanta?

Mi tata a nace na India, y maske mi mama a nace na Uganda, e tambe tin mayornan hindu. Nan tabata sigui casi tur e custumbernan hindu. Nos ta tres ruman y ami ta esun di dos. Nos tabata biba na Nairobi, Kenia. Y tabatin hopi hindu den nos bario.

Kico a lanta bo interes den ciencia?

Semper mi tabata gusta bestia, y mi tabata bay cana of campa den mondi cu mi amigonan pa nos disfruta di e naturaleza impresionante. Prome mi kier a bira un ciruhano veterinario. Pero despues cu mi a gradua na un universidad tecnico na Nairobi, mi a bay Inglatera pa studia patologia na e Universidad di London. Despues mi a specialisa mi mes den investiga e celebro humano.

Bo estudio tabatin efecto riba bo creencianan?

Si. Mas conocemento mi a haya, mas dificil tabata pa kere den mitologia y tradicionnan hindu, entre otro adoracion di imagen y bestia.

Dicon bo tabata kere den evolucion?

Tempo mi tabata hoben, hopi hende rond di mi tabatin e pensamento cu evolucion a cuminsa na Africa, y hopi biaha nos tabata papia riba e topico aki na scol. Ademas, mi docente- y profesornan di universidad tabata duna nos di compronde cu tur cientifico respeta ta kere den evolucion.

 Dicon bo a cuminsa cuestiona e teoria di evolucion?

Ora mi tabatin algun aña ta studia biologia y anatomia, un compañero di klas tabata conta mi loke testigonan di Jehova tabata siñ’e for di Bijbel. Esaki a lanta mi interes y ora testigonan di Jehova a tene un asamblea den e aula di mi universidad na Nairobi, mi a dicidi di asisti. Despues di algun tempo, dos misionero testigo di Jehova a splica mi algun doctrina di Bijbel. Nan creencia den un Gran Diseñador kende ta contesta e preguntanan mas importante di bida no a zona manera mitologia. Esaki a lanta mi interes pasobra nan splicacion tabata zona logico.

Acaso bo conocemento medico a stroba bo di kere den creacion?

Al contrario! Segun cu mi tabata studia anatomia, mi a ripara con bon y complica e diseño di sernan bibo ta. Pesey, pa mi no tabata logico mas pa kere cu algo asina complica a bin pa casualidad.

Bo por duna nos un ehempel?

Mi a studia e celebro humano desde 1971, y cada bes e maraviyoso organo aki ta sorprende mi. Den e celebro tur nos pensamentonan y memorianan ta. Ademas, e ta dirigi gran parti di e funcionnan di e curpa. Tambe e celebro ta e centro di nos cinco sentidonan, ya cu e ta procesa informacion cu ta bin di paden y di pafo di e curpa.

E manera cu nos celebro ta funciona pa un gran parti ta debi na e procesonan kimico complica cu ta tuma luga eyden y debi na e red complica di neuron, esta, e celnan principal di e celebro. E celebro humano tin miles di miyones di neuron cu ta comunica cu otro pa medio di fibranan largo cu yama axon. For di e axonnan aki, un solo neuron por establece miles di conexion cu otro neuron via di fibranan ramifica cu yama dendrita. Como resultado, e cantidad di conexion den e celebro ta inmenso. Y loke ta mas asombroso ainda ta cu den e mondi cera di neuron y dendrita no tin caos sino precision. Ta trata aki di un “red di conexion” sumamente maraviyoso.

Bo por splica nos un tiki mas tocante esey?

E red di conexion aki ta forma den un secuencia hopi exacto ora un baby ta desaroya den bariga di su mama y e proceso aki ta sigui tambe despues cu e baby nace. E neuronnan ta manda fibra pa otro neuronnan cu ta keda algun centimeter for di otro. Den e mundo di cel, esey ta un distancia bastante grandi. Por cierto, un fibra por bay den direccion di un cel specifico, pero no ta esey so, e por bay tambe na un parti specifico di e cel ey.

Ora un fibra nobo ta sali for di un neuron, cierto kimico, na moda di papia, ta bis’e ki ora e tin cu “stop”, “sigui” of “bira” te ora e yega su destinacion. Si e fibranan cu ta creciendo no haya instruccion specifico, nan ta perde caminda. E proceso aki ta super bon organisa, y tur cos ta cuminsa cu e informacion cu ta skirbi den nos DNA.

Pero mi tin cu bisa si cu tin hopi cos pa siña ainda encuanto con e celebro ta desaroya y funciona, entre otro, con e ta crea recuerdo, sintimento y pensamento. Djis e echo cu e celebro ta funciona, sin papia mes di con bon e ta funciona y con bon e ta desaroya, ta un prueba pa mi cu mester tin un mente hopi superior cu esun di nos.

Dicon bo a bira testigo di Jehova?

Testigonan di Jehova a mustra mi cu Bijbel ta e Palabra di Dios. Por ehempel, Bijbel no ta un buki cientifico, pero ora e ta papia di topiconan cientifico semper e ta cientificamente exacto. Ademas, e tin profecianan cu a cumpli te den e minimo detaye. Y e ta mehora bida di esnan cu ta aplica su principionan. Esey ta asina den mi caso tambe. Desde cu mi a bira un Testigo na 1973, Bijbel ta mi guia den bida, y como resultado, mi ta feliz y mi bida tin proposito.