Temblor ... horcan ... atake terorista ... tiroteo na scol ... Tur ora nos por lesa e palabranan ey den titularnan di noticia. Ta claro cu bo ta haya miedo ora bo lesa tocante un desaster; pero ta full un otro cos ora bo mes pasa aden. Kico bo por haci prome, durante y despues di un calamidad pa bo tin mas chens pa sobrevivi?

TUR hende por haya nan mes den un calamidad. Pesey, preparacion ta sumamente importante pa scapa bida di hende. Ki medidanan bo tin cu tuma?

• Prepara mentalmente. Acepta cu un desaster por tuma luga y cu abo cu bo famia por pasa den uno algun dia. Prepara p’e prome cu ta laat.

• Busca informacion tocante desaster cu por tuma luga caminda bo ta biba. Investiga na unda lo bo por sconde. Wak si e structura di bo cas y caminda e ta situa ta suficiente bon. Elimina tur loke por causa candela. Instala aparato cu por detecta huma, y cambia su bateria por lo menos un biaha pa aña.

• Zorg pa bo tin articulonan di prome necesidad. Por tin interupcion di coriente, awa, comunicacion y transportacion. Si bo tin un auto, yena por lo menos mitar di bo tanki di gasolin. Y percura pa semper bo tin cuminda, awa y un tas cu tur loke ta necesario.—Wak e lista “ Bo Tin Tur Loke Bo Mester?”

• Zorg pa bo tin number di telefon di tanto amigonan cu ta biba cerca como di esnan cu ta biba leu.

• Traha un plan di escape y test si e ta bon. Averigua unda den bo edificio e salida di mas cerca ta, y tambe kico ta e plan di siguridad di e scol di bo yiunan of si nan scol no tin uno ainda, palabra cu bo yiunan kico nan mester haci si tin un emergencia. Palabra cu bo famia unda boso por topa otro cerca di cas y tambe leu di boso bisindario, manera na un scol of un centro di bario. Autoridadnan ta conseha pa cana bay na pia na e luganan cu bo a plania pa topa otro.

• Prepara pa yuda otro hende, por ehempel, esnan di edad y esnan enfermo.

Joshua, kende nos a menciona na principio, a bisa: “Ora e luga a pega candela, mayoria di hende no a drenta panico; nan a tarda. Tin di nan a paga nan computer of a yena nan boter di awa. Un meneer a bisa: ‘Kisas nos mester warda.’” Aunke mayoria  di su coleganan no tabata sa kico pa haci, Joshua a grita: “Nos mester sali awor!” Ta e ora ey nan a bin bij, anto nan a siguie y a cuminsa baha trapi. Joshua tabata grita: “Si un hende cay, lant’e y sigui cana. Nos tur ta logra sali!”

• Den caso di un candela. Gatia bay rapidamente na e salida mas cerca di bo. Huma por stroba bo di mira. Y mayoria di hende ta perde nan bida durante candela pasobra nan a inhala huma. No coy ningun di bo pertenencianan; un par di seconde por salba bo bida.

• Den caso di un temblor. Bay bou di, por ehempel, un mesa firme of para banda di un muraya parti paden di un edificio. Por spera aftershock, pues ta bon pa sali pafo mas pronto posibel y keda leu for di edificionan. Y como cu kisas lo dura basta ora prome cu un ekipo di rescate yega, purba di salba otro hende si ta posibel.

• Den caso di un tsunami. Si diripiente bo mira cu awa di lama ta hala bay for di costa, core bay un caminda cu ta mas halto y keda eynan pasobra olanan grandi ta na caminda.

• Den caso di un warwaru of horcan. Bay di biaha na un luga di refugio (shelterbox).

• Den caso di inundacion. No drenta den un edificio cu ta bou di awa. No cana ni pasa cu auto den awa. Por tin awa di pos y otro peligernan scondi den awa, manera glas kibra, pida metal skerpi, clabo, buraco y waya di coriente.

• Bo tabata sa? Coriente di awa cu subi 60 centimeter halto por lastra un auto bay cu ne. Mayoria di morto ocasiona durante un inundacion ta pa motibo cu chauffeurnan a purba di pasa den coriente di awa.

• Si autoridad bisa cu mester evacua, haci esey di biaha! Avisa bo amigonan na unda bo ta pa nan no risca nan bida pa bay busca bo.

• Bo tabata sa? Tin mas chens cu un hende lo ricibi bo mensahe skirbi via bo celular cu bo yamada di telefon.

• Si autoridad bisa cu bo mester keda cas of den un shelterbox, obedece. Si un accidente of atake kimico, biologico of nuclear tuma luga, keda paden, paga ventilacion y seya tur bentana y porta pa radiacion no pasa. Den caso di un explosion nuclear, drumi plat abou den e edificio caminda bo ta pa bo evita radiacion mas tanto posibel. Wak noticia na television of scucha radio. Y keda paden te ora autoridad bisa cu e peliger a pasa.

Ata algun sugerencia pa evita maleza y peliger:

• Keda cerca amigonan, si ta posibel, en bes di keda den un campamento.

• Tene e luga caminda bo ta biba limpi.

• Uza ekipo di proteccion ora bo ta limpia e sushedad cu a keda atras. Si ta posibel uza handschoen, un sapato cu no ta kibra lihe, helm y mask. Tene cuidou cu wayanan di coriente y pida palo of piedra cayente cu bo no ta mira

• Mantene boso rutina mas tanto posibel. Ta importante pa boso yiunan mira cu boso ta trankil y cu boso no a perde speransa. Sigui haci les di scol, hunga y adora Dios como famia. No wak noticia di e tragedia constantemente y no baha bo nervio riba bo famia. Acepta yudansa y yuda otro hende.

• Corda cu bo por perde hopi cos den un calamidad. Tanto gobierno y otro teamnan di rescate ta enfoca riba scapa bida di hende y no riba reemplasa tur loke hende a perde. Pa un hende sobrevivi, e mester di awa limpi, cuminda, paña y un luga di sconde durante mal tempo.—1 Timoteo 6:7, 8.

• Si bo ser afecta emocionalmente, busca yudansa. Hopi biaha esey ta sali na cla despues di tempo. Algun sintoma ta ansiedad, depresion, beis ta cambia y problema pa concentra, traha y drumi. Ta bon pa papia cu bon amigo.

Aunke Joshua no a perde su bida durante e candela, hopi di su conocinan si no a scapa. El a haya yudansa di hombernan cristian cu ta spiritualmente maduro y di profesionalnan di salud mental. Joshua a bisa: “Nan a splica mi cu ta normal cu mi ta sinti mi tristo, y cu esey ta parti di e proceso di recuperacion. Despues di seis luna, mi tabata haya menos nachtmerrie. Pero tabatin otro sintomanan cu a tuma mas tempo pa kita.”

Un calamidad ta lanta nos sentido di husticia. Pesey, tin hende incorectamente ta culpa Dios. Y hopi otro hende, mescos cu Joshua, ta sinti nan culpabel pasobra nan a scapa pero otronan no. Joshua a bisa: “Te ainda mi ta pensa cu mi por a salba mas hende. Pero loke ta consola mi ta e echo cu mi sa cu pronto Dios lo zorg pa tin husticia rond mundo y cu e lo drecha tur e daño cu a ser causa. Mientrastanto, mi ta gradici Dios pa cada dia di bida y mi ta haci tur loke ta den mi alcance pa cuid’e.”—Revelacion 21:4, 5. *