Bijbel no ta un buki medico. Pero e tin conseho cu por yuda un persona cu ta lucha cu problema di salud mental. Wak algun ehempel.

“Hende bon di salud no tin mester di dokter, ma hende malo si.”—MATEO 9:12.

Bijbel ta reconoce cu kisas nos mester busca tratamento medico. Hopi hende a haya alivio ora nan a busca informacion tocante nan enfermedad mental for di fuente confiabel y ora nan a haya yudansa for di dokter.

“Entrenamento fisico ta yuda.”—1 TIMOTEO 4:8.

Ora nos haci cos pa mehora nos salud fisico, e por yuda mehora nos salud mental tambe. Esey ta inclui haci ehercicio regularmente, sigui un dieta saludabel y drumi suficiente.

“Alegria ta un bon remedi; verdriet ta caba cu hende.”—PROVERBIONAN 17:22.

Ora nos lesa relato animante di Bijbel y pone meta rasonabel cu nos por logra, esey por yuda nos sinti nos feliz. Un punto di bista positivo di futuro por yuda bo trata cu bo emocionnan segun cu bo ta lucha cu problema di salud mental.

 “Sabiduria ta compañero di un persona modesto.”—PROVERBIONAN 11:2.

Kisas bo ta ripara cu bo no por haci tur loke bo kier riba bo mes, pues sea dispuesto pa acepta yudansa di otro hende. Muy probablemente bo famia- y amigonan kier yuda bo. Pero kisas nan no sa con pa yuda bo. Laga nan sa kico nan por haci pa yuda bo. Sea realistico den loke bo ta verwacht di nan y mustra aprecio pa cualkier yudansa cu nan duna bo.

“Mi a sinti cu algo no tabata bon cu mi, pues mi a bay dokter. El a logra diagnostica mi. Esey a yuda mi compronde e situacion cu mi tabata aden y ki tratamento medico tabatin disponibel pa yuda mi.”—Nicole, a kende ta sufri di trastorno bipolar.

“Mi a ripara cu lesa Bijbel regularmente cu mi esposa ta yuda mi cuminsa cada dia cu pensamento positivo y animante. Hopi bes, riba dia cu mi ta lucha cu mi emocionnan, mi ta topa un texto cu ta consola mi.”—Peter, kende ta sufri di depresion.

“Tabata dificil pa mi conta otro hende tocante mi maleza, pasobra mi tabatin hopi berguensa. Pero un bon amiga di mi a scucha mi, y el a haci tur su esfuerso pa compronde con mi tabata sinti. El a echt yuda mi sinti mihor, y el a laga mi compronde cu mi no ta mi so.”—Ji-yoo, kende ta lucha cu trastorno di comemento (eating disorder).

“Bijbel a yuda mi ta balansa y rasonabel ora ta trata di trabou y descanso. Su sabiduria a yuda mi trata cu e lucha constante cu mi tin cu mi emocionnan.”—Timothy, kende ta sufri di trastorno obsesivo-compulsivo (OCD).