“Mi ta sinti mi comodo cu mi grupo di amigo y ta hopi dificil pa mi bay busca mas amigo.”​—Alan.

 “Mi grupo di amigo ta hopi chikito y mi gust’e asina. Mi no ta e tipo di hende cu ta bay busca mas amigo y papia cu hende cu mi no conoce.”​—Sara.

 Bo ta pensa mescos cu Alan y Sara? Bo tin un grupo di amigo cu bo ta hopi cera cu ne y bo ta sinti bo incomodo pa busca amigo nobo?

 Si ta asina, e articulo aki ta pa bo.

•  E problema cu grupo di amigo

•  Loke bo por haci

•  Loke otro hobennan ta bisa

 No tin nada malo di tin un grupo di amigo cu bo ta hopi cera cu ne. Esey por duna bo e sintimento cu bo ta pertenece eynan y cu bo amigonan ta acepta bo pa e persona cu bo ta, aunke bo ta imperfecto.

 “Ta dushi ora bo ta parti di un grupo di amigo cu ta gusta asocia cu bo. Ora bo ta jong, bo kier pa otro hende acepta bo.”​—Karen, 19 aña.

 Bo tabata sa? E 12 apostelnan di Hesus tabata parti di su grupo grandi di amigo, pero tres di e apostelnan, Pedro, Santiago y Juan, tabata su amigonan di mas intimo.​—Marco 9:2; Lucas 8:51.

 Pero, asocia cu solamente un grupo di amigo specifico y cera porta pa otro hende, por trece problema. Por ehempel:

•   Bo por perde e oportunidad di haya otro bon amistadnan.

   “Si solamente bo tin amigonan cu ta mescos cu bo, bo ta perde e oportunidad di tin experencianan nobo y di conoce hendenan leuk.”​—Evan, 21 aña.

•   Bo por parce di ta sinti bo mas cu otro hende.

   “Si bo tin solamente un grupo di amigo cu bo ta asocia cu ne, bo por duna e impresion cu bo no kier papia cu otro hende.”​—Sara, 17 aña.

•   Bo por cuminsa ter otro hende.

   “Kisas individualmente lo bo no ter un hende, pero si bo grupo di amigo ta hacie, e ora ey por parce normal, te hasta pret pa hacie.”​—James, 17 aña.

•   Bo por haya bo den problema, specialmente si bo kier pertenece na un cierto grupo cueste loke cueste.

   “Ta un mal hende so mester tin den e grupo pa pone henter e grupo haci cos malo.”​—Martina, 17 aña.

•   Pensa riba kico ta bo norma- y balornan.

   Puntra bo mes: Ki norma- y balornan mi tin? Mi amigonan ta hacie mas facil of mas dificil pa mi biba di acuerdo cu mi norma- y balornan? Mi ta dispuesto pa keda nan amigo cueste loke cueste?

   Principio di Bijbel: “Mal compania ta daña bon custumber.”—1 Corintionan 15:33.

   “Si bo grupo ta consisti di hende cu no tin e mesun norma- y balornan cu bo, bo por haci cosnan cu hamas lo bo a haci.”​—Ellen, 14 aña.

•   Pensa riba kico ta mas importante pa bo.

   Puntra bo mes: Mi ta sinti mi asina uni cu mi amigonan cu mi ta dispuesto pa laga mi norma- y balornan cay basta mi keda bon cu mi amigonan? Kico lo mi haci si un di mi amigonan haci algo cu ta robes?

   Principio di Bijbel: “Mi ta reprende y disciplina tur esnan cu mi tin cariño p’e.”​—Revelacion 3:19.

   “Si un di bo amigonan haci algo cu ta malo y bo no sa sigur na ken bo mester ta leal, podise bo por pensa cu bo ta traiciona bo amigo si bo bisa algo.”​—Melanie, 22 aña.

•   Busca mas amigo.

   Puntra bo mes: Lo ta bon pa mi busca mas amigo y asina conoce otro hende?

   Principio di Bijbel: “No busca boso mes interes so, ma tambe interes di otro hende.”​—Filipensenan 2:4.

   “Tin biaha muchanan cu no ta popular kisas tin un bida di famia dificil. Unabes bo conoce nan, casi semper lo bo haya sa cu di berdad nan ta great.”​—Brian, 19 aña.

 E punto ta: No tin nada malo di tin un grupo di amigo cu bo ta cera cu ne. Pero na mes momento, lo bo beneficia si bo busca mas amigo. Bijbel ta bisa: “Esun cu duna alivio, ta haya alivio.”—Proverbionan 11:25, BPK