DANKI na e forma di kokolishi, e bestia ku ta biba den dje por wanta e preshon i e kondishonnan difísil ku tin den fondo di laman. E tremendo kapasidat akí ku e kokolishi tin di protehá su habitante a inspirá ingenieronan pa studia su forma i struktura pa nan logra diseñá outo i edifisio ku por protehá nan okupantenan.

Pensa un ratu riba lo siguiente: Ingenieronan a analisá dos tipo di kokolishi: esun ku tin forma di uster i esun spiral. Den kaso di esun ku tin forma di uster, nan a ripará ku e kurvanan parti pafó di e kokolishi ta manda e preshon na e skarnir i rant parti pafó. En kambio, e kurvanan parti pafó di e kokolishi spiral ta manda e preshon na e núkleo i parti mas hanchu ariba. Den ámbos kaso, e preshon ta bai na e parti mas firme di e kokolishi. Esei ke men ku si e kokolishi sufri daño, e bestia ku ta biba den dje ta keda bon protehá.

E investigadónan a hasi un tèst tambe pa wak kiko ta e diferensia entre kokolishi real i imitashon di kokolishi (traha ku prenter 3-D) ku tin forma simpel di bala i di silinder. Kiko tabata e resultado? E kaska kompliká di kokolishi por wanta kasi dos biaha mas tantu preshon ku e imitashon di  kokolishi ku forma simpel.

Papiando di implementashon di e investigashon akí, e revista Scientific American a bisa: “Si algun dia bo ta koriendo den un outo ku tin forma di kokolishi, sigur lo e ta elegante i diseñá spesialmente pa protehá e kurpanan frágil di su okupantenan.”

Kiko bo ta pensa? E forma di kokolishi a bini di evolushon òf di kreashon?