4 Eliminá Bo Dudanan

“Abo, hende di poko fe, pakiko bo a duda?”​—Mateo 14:31.

KIKO TA E OPSTÁKULO? Tabatin biaha ku asta Hesus su disipelnan a duda. (Mateo 14:30; Lukas 24:​36-39; Juan 20:​24, 25) De echo, Beibel ta deskribí falta di fe komo “e piká ku ta mara nos asina fásil.” (Hebreonan 12:1) Apòstel Pablo a skirbi: “No ta tur [hende] tin fe.” (2 Tesalonisensenan 3:2) Esei no ta nifiká ku algun hende no ta kapas pa ehersé e kualidat akí. Mas bien, hopi hende no ta hasi esfuerso pa kultiv’é. Dios ta bendishoná esfuerso di esnan ku sí ta hasi esei.

KON BO POR VENSE E OPSTÁKULO? Identifiká e kosnan ku ta pone bo duda. Por ehèmpel, disipel Tomas a duda ku Hesus a ser resusitá, ounke e otro disipelnan a bisa ku nan a mira Hesus. Tomas tabata ke prueba. Kiko tabata e resultado? Hesus a dun’é e prueba ku e tabatin  mester pa hasi su fe mas fuerte.​—Juan 20:​24-29.

Pa medio di Beibel, Yehova Dios a perkurá e kontestanan ku nos tin mester pa eliminá nos dudanan. Por ehèmpel, hopi hende ta pèrdè fe den Dios pasobra sea direktamente òf indirektamente nan ta kulp’é pa guera, violensia i miseria ku ta afligí humanidat. Kiko Beibel ta bisa tokante e asuntu akí?

Dios no ta goberná mediante gobièrnunan humano. Hesus a referí na e spiritu invisibel ku yama Satanas komo “e prens di e mundu akí.” (Juan 14:30) Satanas a ofresé Hesus outoridat riba tur e reinonan di tera pa un akto di adorashon, bisando: “Lo mi duna bo henter e dominio akí i su gloria; pasobra esei a wòrdu entregá na mi, i mi ta dun’é na esun ku mi kier.” Hesus no a nenga ku Satanas tabatin e outoridat ei. En bes di esei, el a bisa: “Ta pará skirbí: ‘Adorá [Yehova] bo Dios i sirbi e so.’” (Lukas 4:​5-8) Ta Satanas i e gobièrnunan humano ta responsabel pa tur e sufrimentu na mundu, i no Dios.​—Revelashon 12:​9, 12.

Pronto Yehova Dios lo kita tur loke ta kousa sufrimentu. El a hasi areglo kaba pa un Reino, òf gobièrnu, den man di su Yu, Hesukristu, pa goberná humanidat. (Mateo 6:​9, 10; 1 Korintionan 15:​20-28) Komo kumplimentu di profesia bíbliko, e bon nobo tokante e Reino akí ta ser prediká aktualmente riba henter e tera. (Mateo 24:14) Pronto e Reino akí lo eliminá tur esnan ku ta opon’é i lo kita tur loke ta kousa sufrimentu humano.​—Daniel 2:44; Mateo 25:​31-33, 46; Revelashon 21:​3, 4.

KIKO TA E REKOMPENSA? Esnan ku ta duda ta manera olanan di laman ku ta ser tirá p’aki i p’aya dor di ‘tur bientu di doktrina dor di triki di hende.’ (Efesionan 4:14; 2 Pedro 2:1) Na kontraste ku esei, esnan ku haña kontestanan satisfaktorio pa nan preguntanan por “para firme den fe.”​—1 Korintionan 16:13.

Testigunan di Yehova, kendenan ta publiká e revista akí, lo ke yuda bo haña kontesta riba preguntanan ku kisas ta pone bo duda. Nan ta invitá bo pa asosiá ku nan i analisá nan siñansanan pa bo mes. Ora bo hasi esei, bo fe den Dios lo bira mas i mas fuerte.

Pa mas informashon, wak e buki Kiko Beibel Ta Siña Realmente? kapítulo 8 ku tin e tema “Kiko e Reino di Dios Ta?” i kapítulo 11 ku tin e tema “Dikon Dios Ta Permití Sufrimentu?” *

[Nota]

[Plachi na página 9]

Esnan ku haña kontesta satisfaktorio pa nan preguntanan tin un base sólido pa nan fe