Hopi hende awe, meskos ku Alex, no ta gusta traha kansa kurpa. Un mekániko ku yama Aron a bisa: “Hopi hende ta pensa ku trabou di kansa kurpa ta bou di nan nivel. Nan ta dal bai kuné te ora nan haña algu mihó.”

Pakiko hopi hende ta pensa ku trabou duru no ta pa nan? Kisas pasobra nan ta laga medionan di komunikashon duna nan e impreshon ku un bida “ideal” ta un bida di luho i trankilidat. Matthew, kende ta traha den mantenshon, a bisa ku hende ta kere ku trabou duru ta pa esnan ku a frakasá den bida. Shane, un conciërge, tambe a ripará e tendensia ei. El a bisa: “Aworakí hende ke haña pago pa un dia kompleto di trabou, pero sin hasi muchu esfuerso.”

Di otro banda, hopi hende ku a logra éksito den bida sí ta gusta traha duru. Daniel, di 25 aña, kende ta traha den konstrukshon, a bisa: “Trabou duru ta duna hopi satisfakshon foral ora bo ta traha pa logra un bon meta.” Andre, di 23 aña, ta di akuerdo. El a bisa: “Ami ta kere ku trabou ta hasi bo felis i kontentu. Hende ku ta taha palu lo no sinti nan felis, mas bien laf so.”

Kon hende manera Daniel i Andre a haña un punto di bista positivo di trabou duru? Ku poko palabra, nan a apliká prinsipio di Beibel. En bes di deskurashá trahamentu duru, Beibel ta animá hende pa ta diligente i perseverá den nan trabou. Ma e ta siña nos tambe kiko pa hasi pa gusta nos trabou.

Ki prinsipio di Beibel por yuda bo haña satisfakshon den bo trabou? Nos ta animá bo pa konsiderá algun di nan den e siguiente artíkulo.