Beibel ta instruí nos pa no kome òf tuma sanger. Esei ke men ku nos no mester aseptá sanger ni su komponentenan prinsipal den ningun forma, manera den kuminda òf pa medio di transfushon. Wak e siguiente tekstonan di Beibel:

•   Génesis 9:4. Despues di Diluvio Dios a permití Noe i su famia kome karni, pero e no a permití nan kome sanger. El a bisa Noe: “Solamente, boso no mag kome karni ku su bida, esta, su sanger.” (Beibel Santu) E mandamentu akí ta konta pa henter humanidat kuminsando desde e tempu ei padilanti, ya ku tur hende ta desendiente di Noe.

•   Levítiko 17:14. “Boso no mag kome sanger di ningun sorto di karni, pasobra bida di tur karni ta su sanger; ken ku kome esaki mester wòrdu kòrtá kitá afó.” (Beibel Santu) Pa Dios, sanger ta representá bida lokual ta pertenesé na dje. Aunke Dios a duna e lei ei únikamente na e nashon di Israel, nos por komprondé ku e lei ku ta prohibí komementu di sanger ta algu serio den bista di Dios.

•   Echonan 15:20. “Apstené . . . di sanger.” Dios a duna kristiannan e mesun mandamentu ku el a duna Noe. Historia ta mustra ku e kristiannan di promé siglo a nenga di kome sanger, i no a us’é tampoko pa motibunan médiko.

Dikon Dios ta manda nos apstené di sanger?

 Tin bon motibu médiko pa evitá transfushon di sanger. Pero mas importante ainda, Dios a duna nos e mandamentu pa apstené di sanger pasobra loke sanger ta representá ta sagrado p’e.—Levítiko 17:11; Kolosensenan 1:20.