OMESODEL A SUOBEL ER A MEDAL TIA EL BABIER | NGSEBECHEM EL MO KMEED ER A DIOS
Kau Ke Medengelii a Ngklel a Dios e Ousbech er Ngii?
Kau ngar er ngii a chad el kmal sechelim engdi ngdiak modengelii a ngklel? Nglocha diak. Me a Irina el redil er a beluu er a Bulgaria a dilu el kmo, “Ngdiak el sebechem el mo kmeed er a Dios a lsekum ngdiak modengelii a ngklel.” Me ngkmal dmeu a rengud e le Dios a soal a bo dekeed er ngii el ua dulsaod er sel mlo merek el suobel. Sei a uchul me nguluuchais er kid er a ngklel el Jehovah el ngar er a Biblia. Ngdilu el kmo: ‘Ngak, el di ngak el tang, a Jehovah * el Dios er kau.’—Isaia 42:8.
A Dios a ouchais er kid er a ngklel el Jehovah el ngar er a Biblia. Ngdmu el kmo: ‘Ngak, el di ngak el tang, a Jehovah el Dios er kau.’—Isaia 42:8
Me a Jehovah ngsoal a cho bo modengelii a ngklel e mousbech er ngii? Ka di molatk: A ngklel a Dios a lulluches er ngii el ousbech a kleuang el llechukl er a Hebru el okedongall el Tetragrammaton. Me tia el ngakl a debetik er ngii el bekord el 7,000 el taem er aike el Bades el tekoi er a Hebru. E tiang a kmal betok el taem el kuk betok er aike el bebil er a ngakl el medung er a Biblia. Me ngbleketakl el kmo, a Jehovah a soal a bo dodengelii a ngklel e dousbech er ngii. *
A klausechelei er a reteru el chad a blechoel el omuchel er sel taem el bo lekaodengei a ngklir. Me kau, ke medengelii a ngklel a Dios?
Engdi te ngar er ngii a rebebil el omdasu el kmo ngdiak el kired el ousbech er a ngklel a Dios e le Ngii a kmal chedaol e olab a bek el klisiich. Me nguaisei el diak el soad el merrekakl er a ngklel a Dios, el di ua omerelled el diak el soad el merrekakl er a ngklel a kmal sechelid. Engdi a Jehovah a soal tirke el betik a rengrir er ngii a bo longebkall er a ngklel e louchais er ngii el mo er a rechad. (Psalm 69:30, 31; 96:2, 8) Me a Jesus a ullisechakl er a ruleltirakl er ngii el mo meluluuch el kmo: “Demmam el ngar a eanged: Bo le modanges a chedaol ngklem.” Me kau me ngdirrek el sebechem el oldanges er a ngklel a Dios el oeak sel mouchais er ngii el mo er a rechad. Sel doruul el uaisei e kede olekeed er kid er Ngii.—Mateus 6:9.
A Biblia a meketeklii el kmo a Dios a ungil el medengelterir “tirkel meluu e mengull er ngii.” (Malakai 3:16) Me a ta er a remilluches er a psalm a milluluuch el mo er a Jehovah el kmo: “Tirkel medengelii a ngklem a oumeral ulsirs er kau, ele kau e RUBAK a diak mchititerir a rusiik er kau.” (Psalm 9:10) Me ngkmal kired el mo medengelii a ngklel a Jehovah e ousbech er ngii a lsoad el okesengii a deleuill er kid me ngii.
^ Momes a footnote er a Genesis 2:4 me a Exodus 3:14.
^ Me alta e a ngklel a Dios a llechukl el kmal betok el taem er aike el Bades el tekoi er a Hebru el dirrek el okedongall el Chuodel el Testament, engdi ngklengiterreng e le betok el oidel a Biblia a diak lousbech er ngii el ngakl. Te bai mla mtechir el ousbech er a dui el ua “Rubak” me a lechub e ng “Dios.” Me a lsoam a lmuut el omesodel, e momes er a 225-227 el llel a babier el Ngerang Mera el Lolisechakl a Biblia? el mirruul er a Resioning er a Jehovah.
