Vass Sawkt di Bivvel Veyyich Fashta?

SHPEEL

Vass di Bivvel sawkt

Es voah pleesing zu Gott vann leit kfasht henn in Bivvel zeida vann si’s gedu henn fa da recht reesin. Avvah vann’s gedu voah fa da letz reesin, dann voah’s nett pleesing zu Gott. Di Bivvel sawkt nett es leit fashta missa heit, avvah es sawkt aw nett es ma nett dauf.

Favass henn samm leit kfasht in Bivvel zeida?

Vann si am gukka voahra fa hilf un direction funn Gott. Leit es zu Jerusalem am gay voahra henn kfasht fa veisa es si reeli Gott sei hilf henn vella. (Ezra 8:21-23) Da Paulus un da Barnabas henn daylmohls kfasht vann si neiyi elders getshoost henn fa di congregation.—Apostelgeschichte 14:23.
Vann si reeli denka henn vella veyyich Gott sei villa. Noch es da Jesus gedawft vadda is, hott eah kfasht fa 40 dawk so’s eah reddi greeya kann fa du vass Gott havva vill in sei ministry.—Lukas 4:1, 2.
Vann si veisa henn vella vi sorry es si sinn veyyich iahra sinda. Deich da prophet Joel, hott Gott ksawt zu di Israeliddah es vekk gedrayt sinn: “Drayyet zrikk zu miah mitt em gans hatz bei fashta, bedreebt sei un mitt heila.”—Joel 2:12-15.
Vann’s da Sinda-Fagevva-Dawk voah. Es Ksetz es Gott di Israeliddah gevva hott, hott ksawt es si fashta sella ay moll’s yoah uf da Sinda-Fagevva-Dawk. (3 Mosi 16:29-31) Es voah pleesing zu Gott vann si kfasht henn uf da Sinda-Fagevva-Dawk koss es voah en reminder fa di Israeliddah es si nett pirfikt voahra un es si fagevva sei henn missa.

Vass sinn samm letzi reesins fa fashta?

Boviahra goot gukka zu anri. Da Jesus hott geteetsht es vann ebbah fashta vill sett’s yusht sei zvishich een un Gott.—Matthäus 6:16-18.
Fa bessah sei es anri. Fashta macht ebbah nett bessah es anri.—Lukas 18:9-14.
Fa boviahra betzawla fa sinda es poahbes gedu sinn. (Jesoiya 58:3, 4) Gott hott yusht fashtes eksept es gedu voah koss en person hott du vella vass recht is un hott sorry kfeeld funn’s hatz fa di sinda es eah gedu hott.
Yusht koss di gmay havva vill. (Jesoiya 58:5-7) Gott is vi en parent es nett haebbi is vann sei kinnah leevi veisa zu een yusht koss si missa, nett koss si vella.

Missa Christians fashta?

Nay. Gott hott di Israeliddah ksawt si missa fashta uf da Sinda-Fagevva-Dawk, avvah sell hott kshtobt noch es da Jesus kshtauva is fa di sinda funn mensha es repent henn. (Hebräer 9:24-26; 1 Petrus 3:18) Da Sinda-Fagevva-Dawk voah part funn’s Ksetz Mosi, avvah Christians sinn nimmi unnich sell Ksetz. (Römer 10:4; Kolosser 2:13, 14) So, yaydah Christian muss diseiyda fa sich selvaht eb si fashta vella adda nett.—Römer 14:1-4.

Christians vissa es fashta nett importand is fa Gott deena. Di Bivvel sawkt nee nett es fashtes ebbah haebbiyah gmacht hott. Avvah fa Gott deena in da recht vayk bringd joy es kumd funn Jehova, “da haebbi Gott”.—1 Timotheus 1:11, NWT; Breddichah 3:12, 13; Galater 5:22.

Vass mensha denka es di Bivvel sawkt veyyich fashta

Vass mensha denka: Da Paulus hott keiyahri leit ksawt fa fashta.—1 Korinther 7:5.

Di voahret is: Di aldi kabbis funn di Bivvel sawwa nix veyyich fashta an 1 Korinther 7:5. a So, selli es kabbis gmacht henn funn di Bivvel, henn da idea funn fashtes nei gedu, nett yusht in dess verse avvah aw in Matthäus 17:21; Markus 9:29; un Apostelgeschichte 10:30. ’S mensht funn di Bivla heit henn dee falshi ideas veyyich fashta haus glost.

Vass mensha denka: Christians sedda fashta in da saym vayk es da Jesus kfasht hott fa 40 dawk in di vildahnis noch es eah gedawft vadda is.

Di voahret is: Da Jesus hott nee nett ksawt es miah so fashta missa, un ma kann aw nett laysa in di Bivvel es di eahshti Christians kfasht henn vi sell. b

Vass mensha denka: Christians sedda fashta vann si da dawk funn da Jesus sei doht halda.

Di voahret is: Da Jesus hott nett sei yingah ksawt fa fashta vann si’s Ohdenkes funn sei doht halda. (Lukas 22:14-18) Vann da Jesus ksawt hott sei yingah zayla fashta noch es eah shtaubt, voah eah nett am si en gebott gevva avvah voah yusht am sawwa vass haebna zayld. (Matthäus 9:15) Di Bivvel sawkt Christians fa essa dihaym vann si hungahrich sinn eb si zu’s Ohdenkes funn da Jesus sei doht gayn.—1 Korinther 11:33, 34.

a Gukket aw A Textual Commentary on the Greek New Testament, by Bruce M. Metzger, Third Edition, page 554.

b Di New Catholic Encyclopedia sawkt veyyich da history funn da 40 dawk fasht funn Lent: “In di eahshti drei centuries, di zeit es si fashta henn missa fa reddi greeya fa da paschal [Easter] feast voah selayva nett may es en voch; ay adda zvay dawk voah als so lang es’s glaest hott. . . . ’S eahsht moll es ma laysa veyyich 40 dawk lang is in da fifth canon funn di Council of Nicaea (325), even so samm scholars vunra eb si even gmaynd henn Lent datt.”—Second Edition, Volume 8, page 468.