Fa vissa vann’s end funn di veld sei zayld, missa miah fashtay vi di Bivvel ’s vatt “veld” yoost. ’S Greek vatt koʹsmos is als getrenslayt “veld,” un is oft am shvetza veyyich mensha, especially selli es nett Gott sei villa am du sinn. (Johannes 15:18, 19; 2 Petrus 2:5) Un daylmohls is koʹsmos am shvetza veyyich di veld es ma drinn layva es ufksetzt un groold is bei mensha, including di business veld, politics, un religions.​—1 Korinther 7:31; 1 Johannes 2:15, 16. a

Vass is’s “end funn di veld”?

 Di vadda “end funn di veld” sinn gyoost in feel Bivla. (Matthäus 24:3) Es is nett am shvetza veyyich di eaht adda awl mensha vekk butza, avvah veyyich’s end funn di veld es miah drinn layva nau es uf ksetzt un groold is bei mensha.​—1 Johannes 2:17.

 Di Bivvel teetsht es “di gottlohsa vadda abkshnidda” so es di goodi leit layva enjoya kenna uf di eaht. (Psalm 37:9-11) Dee zayla vekk gebutzt vadda an di ‘grohs dreebsawl’ es zu en end kumd in di war funn Armageddon.​—Matthäus 24:21, 22; Offenbarung 16:14, 16.

Vann zayld di veld enda?

 Da Jesus hott ksawt: “Avvah funn sellem dawk un funn selli shtund vayst nimmand. Even di engel im Himmel vissa’s nett, un aw nett da Sohn, avvah yusht da Faddah.” (Matthäus 24:36, 42) Eah hott aw ksawt es’s end funn di veld zayld kumma an en zeit es leit nett’s ekshpekta zayla, “an en shtund es diah nett visset.”​—Matthäus 24:44.

 Even vann ma nett da dawk adda di shtund vissa, da Jesus hott uns ksawt funn en “zaycha,” adda sacha es haebna zayla, es veisa zayld es miah nayksht an’s end funn di veld sinn. (Matthäus 24:3, 7-14) Di Bivvel hayst dee zeit “di zeit fumm end” adda “di letshta dawwa.”​—Daniel 12:4; 2 Timotheus 3:1-5.

Zayld ennich ebbes ivvahrich sei noch’s end funn di veld?

 Yau. Di eaht zayld noch do sei, koss di Bivvel sawkt es “see kann nee nett gmooft sei.” (Psalm 104:5) Un di eaht zayld foll sei mitt leit, yusht vi di Bivvel fashprecht: “Di gerechta zayla’s land eahva, un drinn voona fa’immah.” (Psalm 37:29) Gott zayld’s macha grawt vi eah hott vella funn da shteaht:

•   Paradise.​—Jesoiya 35:1; Lukas 23:43.

•   Sayf sei un blendi havva.​—Micha 4:4.

•   Eahvet fa alli-ebbah es mayning hott un es ma enjoyt.​—Jesoiya 65:21-23.

•   Nee nett grank adda ald vadda.​—Hiob 33:25; Jesoiya 33:24.