Da Jesus hott da reich mann un da oahm Lazarus gyoost in ayns funn sei shtoahris, avvah si voahra nett leit es aekshli glaybt henn. (Lukas 16:19-31) Dee zvay mennah henn kshtanna fa zvay groups funn leit: (1) di shrift-geleahrah un Pharisayah in da Jesus sei dawk un (2) di leit es humble un willing voahra fa du vass da Jesus ksawt hott.

Questions in deah article

•  Vass hott da Jesus ksawt veyyich da reich mann un da oahm Lazarus?

•  Hott dee shtoahri aekshli kaebbend?

•  Dutt dee shtoahri proova es es en feiyahrichi hell hott?

•  Vass maynd di shtoahri funn da reich mann un da oahm Lazarus?

 In Lukas chapter 16, hott da Jesus kshvetzt veyyich di grohsi tshaynshes es dee mennah deich ganga sinn.

 Do sinn di mayni points funn da Jesus sei shtoahri: En reichah mann hott alles katt in layva es eah hott vella. En oahmah mann es Lazarus kaysa hott, voah an da reich mann sei deah kokt. Eah hott koft fa even yusht grimla greeya es ab funn da reich mann sei dish falla. Shpaydah, is da Lazarus kshtauva, un di engel henn een zu da Abraham gnumma. Da reich mann is aw kshtauva un voah fagrawva. In dee shtoahri, dutt’s oh lossa es vann awl zvay funn di mennah noch able gvest voahra fa denka un shvetza nohch es si kshtauva voahra. Da reich mann, es doht voah, voah am brenna inna hays feiyah. Eah hott da Abraham kfrohkt fa da Lazarus zu een shikka fa sei zung abkeela mitt ay drobb vassah funn da Lazarus sei fingah. Da Abraham hott nett gedu vass da reich mann kfrohkt hott difoah, un hott ksawt alles hott nau getshaynsht fa awl zvay funn di mennah, un ’sis en grohsi deefi valley zvishich si zvay es nimmand zrikk un faddi gay kann.

 Nay. Dess is en gleichnis adda en illustration es da Jesus gyoost hott fa lanna difunn. Leit es Bivvel research doon agreeya es dess yusht en gleichnis is un es dee shtoahri nett aekshli kaebbend hott. Fa’n example, en subheading in di 1912 edition funn di Luther Bivvel sawkt es dess en gleichnis is. En footnote in di Catholic Jerusalem Bivvel sawkt, “deah illustration is yusht en shtoahri mitt leit es nett aekshli glaybt henn.”

 Voah da Jesus am sawwa vass haebbend nohch es ebbah shtaubt? Voah eah am sawwa es samm leit zayla brenna inna hell nohch es si shtauva, un es da Abraham un da Lazarus in da himmel voahra? Do sinn dayl sacha es veisa es dess nett voah sei kend.

 Fa’n example:

•   Vann da reich mann aekshli inna feiyah gvest veah, dayt’s feiyah nett’s vassah uf da Lazarus sei fingah ufdrikla?

•   Even vann’s nett ufdrikla dayt, dayt ay drobb vassah da reich mann abkeela vann eah inna recht feiyah veah?

•   Vi kend da Abraham levvich sei in da himmel siddah es da Jesus ksawt hott an selli zeit voah noch selayva nimmand nuff in da himmel ganga?​—Johannes 3:13.

 Nay. Even vann dee shtoahri nett aekshli kaebbend hott, samm leit sawwa es dess maynd es goodi leit zayla zu da himmel gay, un shlechti leit zayla brenna inna feiyahrichi hell. a

 Macht sell even sense? Nay.

 Glawva inna hell macht nett sense mitt vass di Bivvel sawkt es haebbend zu selli es shtauva. Fa’n example, di Bivvel sawkt nett es awl goodi leit layva enjoya zayla in da himmel, adda es shlechti leit brenna zayla inna feiyahrichi hell. Avvah, di Bivvel dutt sawwa: “Di levendicha vissa es si shtauva zayla, avvah di dohda vissa nix.”​—Breddichah 9:5.

 Di shtoahri veist es alles zayld tshaynsha fa zvay groups funn leit.

 Da reich mann hott kshtanna fa di Jewish religious leaders, di shrift-geleahrah un Pharisayah es geld-hungahrich voahra . (Lukas 16:14) Si henn keaht vass da Jesus ksawt hott, avvah si henn nett gedu vass eah ksawt hott. Di shrift-geleahrah un Pharisayah henn nunnah gegukt uf anri leit.​—Johannes 7:49.

 Da oahm Lazarus shtayt fa di leit es gedu henn vass da Jesus ksawt hott, avvah es nunnah gegukt voahra druff bei di shrift-geleahrah un Pharisayah.

 Alles hott getshaynsht fa awl zvay groups funn leit.

•   Di shrift-geleahrah un Pharisayah henn gedenkt si sinn am du vass Gott havva vill. Avvah es voah es vann si kshtauva veahra vann Gott si vekk gedrayt hott koss es si nett gedu henn vass da Jesus ksawt hott. Un vass da Jesus un sei followers gebreddicht henn, hott si geblohkt adda getorment.​—Matthäus 23:29, 30; Apostelgeschichte 5:29-33.

•   Di anri leit es nett am kfeedaht vadda voahra spiritually bei di religious leaders voahra nau am acht-gevva vadda druff. Feel leit henn du vella vass da Jesus si gland hott un’s hott si kolfa. Si henn nau di gleyyaheit katt fa pleesing sei zu Gott un een deena fa’immah.​—Johannes 17:3.