Even vann diah eiyah besht boviahret fa’n haebbi family layva havva, sacha kenna ufkumma es’s hatt macht fa haebbi bleiva. (Jakobus 4:14) Gott hott so feel leevi fa uns es eah gebt uns di hilf es miah braucha vann miah druvla henn. Vann diah doond vi di Bivvel sawkt, kann eiyah family deela mitt even di shlimshti sacha.

VASS DI BIVVEL SAWKT: “Lawdet awl eiyah bekimmahnis uf een, fa eah gebt acht uf eich.” (1 Petrus 5:7) Fagesset nett es Gott nett di shuld is funn eiyah druvla. (Jakobus 1:13) Vann diah zu Jehova gukket, zayld eah eich di hilf gevva es diah brauchet. (Jesoiya 41:10) “Leahret eiyah hatza aus zu eem.”​—Psalm 62:8.

Diah zaylet aw kamfirt finna vann diah di Bivvel layset un shtodyet alli dawk. Un deich sell, zaylet diah sayna vi Jehova uns kamfirt “in awl unsah dreebsawl” (2 Korinther 1:3, 4; Römer 15:4) Eah fashprecht un gebt eich “da fridda funn Gott vo haychah is es alles es miah fashtay kenna.”​—Philipper 4:6, 7, 13.

VASS DU KANSHT:

• Bayt fa Jehova sei hilf fa kawm bleiva, un fa dich helfa grawt denka

• Denk ivvah awl dei options un pikk da besht vann fa dich

VASS DI BIVVEL SAWKT: “Di shmeaht meind grikt noch may lanning, un’s oah mitt veisheit sucht eisicht.” (Shpricha 18:15) Finn alles aus es kansht, so’s du vaysht vass alli ebbah in dei family brauch. Shvetz mitt si. Heich ab zu si.​—Shpricha 20:5.

Vass vann ebbah shtaubt es du leevi hosht difoah? Shemm dich nett brilla vann du shpiahsht es musht. Fagess nett es, even da “Jesus hott keild.” (Johannes 11:35; Breddichah 3:4) ’Sis aw importand fa genunk roo un shlohf greeya. (Breddichah 4:6) Dess zayld’s eesiyah macha vann diah am deela sind mitt en haddi zeit.

VASS DU KANSHT:

• Du reklah zeit shpenda un shvetza mitt dei family nau, eb shlimmi sacha haebna. No, vann problems uf kumma, zayld’s eesiyah sei fa si fa shvetza mitt dich

• Shvetz mitt anri es fleicht deich’s saym ding ganga sinn

VASS DI BIVVEL SAWKT: “En freind gebt leevi di gans zeit, un en broodah is geboahra fa helfa an di zeit funn noht.” (Shpricha 17:17) Eiyah friends vella eich helfa, avvah si vissa fleicht nett vass fa du. Doond nett zrikk hayva funn si sawwa vass diah aekshli brauchet. (Shpricha 12:25) Frohwet selli es di Bivvel goot fashtayn fa eich helfa. Vass si sherra mitt eich funn di Bivvel zayld eich helfa.​—Jakobus 5:14.

Diah zaylet aw’s hilf finna es diah brauchet vann diah reklah zammah kummet mitt leit es en shteikah glawva henn in Gott un es trosta vass eah fashprocha hott. Diah zaylet aw kamfirt finna vann diah anri helfet es encouragement braucha. Sawwet si favass diah glawvet an Jehova un in vass eah fashprocha hott. Bleivet bissi anri leit helfa es hilf braucha un doond nett shtobba zammah kumma mitt selli es leevi henn fa eich un es reeli ebbes drumm gevva veyyich eich.​—Shpricha 18:1; 1 Korinther 15:58.

VASS DU KANSHT:

• Shvetz mitt en friend es trosta kansht un loss een dich helfa

• Sei honest un sawk grawt vass du brauchsht