Waut wie en disen Artikjel seenen woaren

•  Aus Jung un Mejal spazieren – Waut es doamet jemeent?

•  Best du reed, met eenen Jung ooda eene Mejal to spazieren?

  Eenje haben bloos doawäajen eenen Jung ooda eene Mejal, wäajen dee wellen toop een Scheengonen haben. Oba en disen Artikjel rät daut doavon, daut een Jung un eene Mejal sikj kjanen lieren toom seenen, aus dee sikj wellen toop befrieen. Daut es, waut dee wellen utfinjen. Eena saul nich bloos doawäajen eenen Jung ooda eene Mejal haben, daut eena sikj wichtich un jeleeft feelt.

 Wan du eenen Jung ooda eene Mejal hast, motst du irjentwanea entscheiden, aus du die met dän befrieen west ooda dän aufsajen woascht. Du motst reed sennen fa beid Mäajlichkjeiten.

 En aundre Wieed: Wan du jleefst, daut du reed best, eenen Jung ooda eene Mejal to haben, dan wurscht du uk sellen reed sennen, die to befrieen.

  Wan een Jung un eene Mejal spazieren, kaun daut bat doa komen, daut dee sikj befrieen. Du wurscht sellen doaräwa nodenkjen: “Wudd ekj een gooda Ehemaun ooda eene goode Ehefru sennen?” Hia sent een poa Biespels, wua du die veleicht wurscht kjennen vebätren:

•   Woo du met diene Famielje omjeist. Woo du diene Elren un diene Breeda un Sestren behaundelst, wiest foaken, woo du met dienen Ehepoatna omgonen woascht, besonda wan du unja Druck best.

   Waut de Schreft sajcht: “Woat nich mea betta un fuchtich äwa eenaunda un vezoajcht junt nich. Hieet opp to schrieen un to beleidjen. Lot von soowaut nuscht mea sennen” (Efeesa 4:31, PB).

   Denkj mol äwa no: “Wan doa wäa miene Elren ooda miene Breeda un Sestren frajcht, aus ekj dee goot behaundlen doo un respakjtvoll sie, waut wudden dee sajen? Wan ekj mie met wäm enne Famielje oneenich sie, kaun ekj daut gaunz ruich oppem kloaren brinjen, ooda woa ekj fuaz doll un doo strieden?”

•   Reed sennen, waut opptojäwen. Wan du ieescht befriet best, motst du doaräwa nodenkjen, waut dienen Ehepoatna jankat. Du motst uk reed sennen, daut to doonen, waut dee well un nich bloos daut, waut die jankat.

   Waut de Schreft sajcht: “Kjeena saul sien ieejnen nutzen sieekjen, oba daut, waut sienem näakjsten goot deit!” (1. Korinta 10:24, PB).

   Denkj mol äwa no: “Mott ekj emma mienen Wellen haben? Wudden aundre sajen, daut ekj utjejlikjt sie? Woo wies ekj, daut ekj mea om aundre bekjemmat sie aus om mie selfst?”

•   Deemootich sennen. Een gooda Ehepoatna mott siene Fäla toostonen un von Hoaten om togoodhoolen froagen.

   Waut de Schreft sajcht: “Wie moaken je aula foaken Fäla” (Jakobus 3:2, NW).

   Denkj mol äwa no: “Sie ekj reed, miene Fäla tootostonen, ooda sieekj ekj emma no eene Uträd? Sie ekj leicht beleidicht, wan aundre mie Rot jäwen ooda wan mie wäa sajcht, woo ekj mie vebätren kaun?”

•   Met Jelt rajcht omgonen. Väl Befriede strieden sikj foaken äwa Jelt, oba wan du daut jelieet hast, met Jelt rajcht omtogonen, dan woa jie junt nich soo leicht äwa Jelt oneenich sennen.

   Waut de Schreft sajcht: “Wan von junt wäa wudd wellen een Torm buen, wudd dee sikj nich ieescht hansaten un de Kosten äwaräakjnen, om to seenen auf hee daut uk betolen kunn?” (Lukas 14:28, PB).

   Denkj mol äwa no: “Kaun ekj daut kontrollen, woo ekj mien Jelt bruck? Mott ekj mie foaken Jelt lieen? Wies ekj, daut ekj met Jelt rajcht omgonen kaun?”

•   Jeistelje Jewanheiten. Wan du eent von Jehova siene Zeijen best, wurscht du sellen goode jeistelje Jewanheiten haben, aulsoo pinkjlich de Schreft studieren un bie de Toopkomes sennen.

   Waut de Schreft sajcht: “Schaftich sent dee, dee sikj doaräwa em kloaren sent, daut an daut jeistelje fält” (Matäus 5:3, NW).

   Denkj mol äwa no: “Doo ekj mie aunstrenjen toom em jeisteljen stoakj bliewen? Es daut jeistelje daut wichtichste en mien Läwen ooda es doa foaken waut aundret wichtja fa mie?”

 En aundre Wieed: Dien Jung ooda diene Mejal vedeent eenen gooden Ehepoatna. Wan du doaraun schaufst, een gooda Ehepoatna to sennen, dan woascht du ea soonen Ehepoatna finjen, waut uk sien bastet deit.