Jeschräwen von Lukas 1:1-80
-
Teo̱filus woat aunjerät (1-4)
-
Johanes dän Deepa siene Jeburt woat von Ga̱briel verutjesajcht (5-25)
-
Jesus siene Jeburt woat von Ga̱briel verutjesajcht (26-38)
-
Maria kjemt no Elisabet (39-45)
-
Maria preist Jehowa (46-56)
-
Johanes woat jebuaren un hee kjricht sienen Nomen (57-66)
-
Sacha̱rja siene Profezeiunk (67-80)
1 Väle haben sikj doahinja jelajcht, Sachen opptoschriewen, waut mank ons passieet sent, un wua gaunz opp to veloten es.
2 Un dee, waut daut von Aunfank aun selfst jeseenen haben, un soone, waut Gott sien Wuat vebreeden, haben daut aun ons wiedajejäft.
3 Doawäajen wort ekj mie uk eenich, die, mienen jeachten Teo̱filus, aules ordentlich to schriewen, waut ekj mie krakjt von Aunfank aun unjastonen hab.
4 Soo kaust du die gaunz secha sennen, daut et soo es, waut se die jelieet haben*.
5 En de Tiet von dän Kjennich Hero̱des* von Judä̱a, wia doa een Priesta Sacha̱rja*, waut von de Abi̱ja-Grupp* wia. Siene Fru staumd von Aaron* auf un äa Nomen wia Elisabet.
6 Daut wieren beides jerajchte Menschen ver Gott. Dee wieren met nuscht to beschuljen, wiels dee sikj aun aule Jebooten un Jesazen von Jehowa* hilden.
7 Oba see hauden kjeen Kjint, wiels Elisabet nich kunn Kjinja haben, un dee hauden beid aul een huaget Ella.
8 Nu wia daut soo, daut Sacha̱rja siene Priestaoabeit ver Gott deed, aus daut bat siene Priestagrupp wia.
9 Un soo aus de Priestasch daut jeweenlich deeden, jinkj hee en Jehowa* sien Heilichtum nenn toom Weiruak opfren.
10 Un de gaunze Häad Menschen deed buten bäden en de Stund, aus doa Weiruak jeopfat wort.
11 Un Jehowa* sien Enjel kjeem no Sacha̱rja un stunt aun de rajchte Sied von dän Weiruak-Aultoa.
12 Aus Sacha̱rja daut sach, wort hee orruich un am wort angst.
13 Oba de Enjel säd to am: “Hab nich Angst, Sacha̱rja, wiels dien iernstet bäden es erhieet worden. Diene Fru Elisabet woat die eenen Sän jäwen, un du saust am dän Nomen Johanes jäwen.
14 Du woascht schaftich sennen un die sea freien. Väle woaren sikj freien, daut hee jebuaren woat,
15 wiels hee woat von Jehowa* eene besondre Oppgow kjrieen. Oba hee saul kjeenen Wien un verheipts kjeen Stoakjet drinkjen. Un hee woat voll heiljen Jeist sennen, noch ea hee jebuaren es*.
16 Hee woat daut bat doa brinjen, daut väl Israeliten woaren trigj no Jehowa*, äaren Gott, komen.
17 Un hee woat uk ver am* gonen met Eli̱a sienen Jeist un dän siene Krauft toom de Vodasch äa Hoat soo moaken aus de Kjinja äat*. Un hee woat daut bat doa brinjen, daut de Ojjehuarsome soo weis haundlen aus de Jerajchte, om eene Grupp Menschen fa Jehowa* reedtohaben.”
18 Sacha̱rja säd to dän Enjel: “Woo kaun ekj mie äwa dit secha sennen? Wiels ekj sie aul oolt un miene Fru haft aul een huaget Ella.”
19 Un de Enjel säd to am: “Ekj sie Ga̱briel, dee dicht bie ver Gott steit, un ekj sie jeschekjt, met die to räden un die dise goode Norecht to brinjen.
20 Kjikj, daut woat sikj to de bestemde Tiet erfellen, waut ekj säd. Oba wäajens du daut nich jejleeft hast, woascht du nich räden kjennen un du woascht stell sennen, bat sikj dit soo romnemt.”
21 Äwadäm luaden de Menschen noch emma no Sacha̱rja un wundaden sikj, daut hee soo lang en daut Heilichtum bleef.
22 Aus hee dan rutkjeem un nich räden kunn, moakjten dee daut, daut hee en daut Heilichtum haud waut Butajeweeneljet* jeseenen. Hee räd to de Menschen derch wiesen, un hee bleef wieda stomm.
23 Aus de Doag derch wieren, wua hee sienen heiljen* Deenst deed, wankt hee no Hus.
24 Eenje Doag lota wort siene Fru Elisabet schwanga. Un see bleef fa fief Moonat gaunz tus un säd:
25 “Dits, waut Jehowa* en dise Tiet fa mie jedonen haft. Hee haft sikj om mie jekjemmat, om dise Schaund von mie wajchtonämen.”
26 Aus see en de saste Moonat wia, wort de Enjel Ga̱briel von Gott no eene Staut en Galilä̱a jeschekjt, waut Na̱zaret heet.
27 Doa wort hee no eene Mejal* jeschekjt, waut aul eenen Maun vesproaken wia toom sikj met dän befrieen. Dee heet Jo̱sef un wia een Nokomen von David. Un dise Mejal äa Nomen wia Maria.
28 Un aus de Enjel nennkjeem, säd hee to ar: “Ekj bejreess die! Jehowa* es sea tofräd met die; hee es opp diene Sied.”
29 Oba see wia sea veenjst äwa siene Wieed un wundad, waut daut to bedieden haud, daut dee ar soo bejreest.
30 Dan säd de Enjel to ar: “Hab nich Angst, Maria; Gott es tofräd met die.
31 Un weetst waut? Du woascht schwanga woaren* un eenen Sän to Welt brinjen. Un du saust am dän Nomen Jesus jäwen.
32 Dee woat eene besondre Oppgow kjrieen un woat dän hechsten Gott sien Sän jenant woaren. Un dee woat sienen Voda David sienen Troon kjrieen, waut Jehowa* Gott am jäwen woat.
33 Un dee woat fa emma äwa Jakob siene Nokomen rejieren un sien Kjennichrikj woat kjeen Enj haben.”
34 Oba Maria fruach dän Enjel: “Woo saul dit woaren, wiels ekj hab je noch kjeenmol met eenen Maun Sex* jehaut?”
35 Un de Enjel säd to Maria: “Heilja Jeist woat opp die komen, un dän Hechsten siene Macht woat äwa die komen soo aus een Schauten. Doawäajen woat dee, waut von die jebuaren woat, heilich un Gott sien Sän jenant woaren.
36 Un weetst waut? Elisabet, waut met die em Frintschoft es, es en äa huaget Ella nu uk schwanga met eenen Sän. See es nu en de saste Moonat, wan von ar uk jesajcht wort, daut see nich kunn Kjinja haben.
37 Wiels aules, waut Gott jesajcht haft, es mäajlich*.”
38 Un Maria säd: “Kjikj, ekj sie Jehowa* siene Sklowenmejal. Mucht met mie passieren, waut du jesajcht hast.” Dan veleet de Enjel ar.
39 Een Stootje lota jeef Maria sikj oppem Wajch un reisd bosich no eene Staut en Ju̱da en eene boaje Jäajent.
40 Un see jinkj bie Sacha̱rja em Hus nenn un bejreest Elisabet.
41 Fuaz, aus Elisabet daut hieed, daut Maria ar bejreest, sprunk daut Bäbe en Elisabet äa Muttalief un see wia voll heiljen Jeist.
42 See säd lud: “Jesäajent best du manke Frues un jesäajent es daut Kjint, waut du em Muttalief drajchst!
43 Woo kjemt daut, daut ekj de Iea hab, daut de Mutta von mienen Harn no mie kjemt?
44 Weetst waut? Aus du mie bejreessen deetst, sprunk mien Bäbe fa Freid em Muttalief.
45 Freid haft uk dee Fru, waut doa jleewd, wiels daut woat sikj krakjt soo romnämen, aus Jehowa* to ar jesajcht haft.”
46 Un Maria säd: “Miene Seel* preist Jehowa*
47 un ekj* kaun nich aundasch aus äwaschaftich sennen wäajen Gott, mienen Rada.
48 Wiels hee haft een Uag jehaut opp siene eefache Sklowenmejal. Von nu aun woaren aule Jennerazionen* sajen, daut ekj jesäajent sie,
49 wiels de Majchtja haft besondret fa mie jedonen un sien Nomen es heilich.
50 Hee haft Metleet met dee, waut am ferchten von eene Jennerazion no de aundre.
51 Hee haft met sienen Oarm majchtich jehaundelt; hee haft dee vejoacht, waut Stoltet em Senn* haben;
52 hee haft majchtje Menschen von Troons raufjesat un hee haft de Läach-Aunjeseene erhowen.
53 Hee haft de Hungaje met goode Sachen gaunz saut jemoakt un haft dee, waut rikj wieren, met ladje Henj wajchjeschekjt.
54 Hee es sienen Deena I̱srael to Help jekomen, wäajen hee aun sien ieejnet Metleet docht.
55 Hee haft daut vesproaken, daut hee Abraham un siene Nokomen* wudd fa emma Metleet wiesen. Dauts, waut hee to onse Väavodasch jesajcht haft.”
56 Maria bleef bie Elisabet ojjefäa dree Moonat un dan wankt see trigj no Hus.
57 Nu wia de Tiet jekomen, daut Elisabet äa Bäbe jebuaren wort, un see haud eenen Sän.
58 Un de Nobasch un äa Frintschoft hieeden daut, daut Jehowa* ar haud sien grootet Metleet jewäsen, un dee freiden sikj met ar met.
59 Un aum achten Dach, aus daut Kjint sull beschnäden woaren, kjeemen dee doahan, un dee wullen am dän Nomen Sacha̱rja jäwen soo aus sien Voda.
60 Oba de Mutta säd: “Nä! Dee woat Johanes jenant woaren.”
61 Oba dee säden to ar: “Kjeena von dien Frintschoft haft disen Nomen.”
62 Dan fruagen see dän Voda derch wiesen, woo dee sull heeten.
63 Hee fruach dan no eene Tofel un hee schreef doa nopp: “Johanes es sien Nomen.” Dan tieeden dee sikj aula.
64 Plazlich jinkj sien Mul op un siene Tung wia loos. Un hee funk aun to räden un lowd Gott.
65 Un aul dee, waut doa rom wonden, wieren sea vewundat*, un daut räd sikj en de gaunze Boaj-Jäajent en Judä̱a rom.
66 Un aule, waut doavon hieeden, dochten doaräwa no un wundaden: “Waut woat daut met dit Kjint jäwen?” Daut wia je dietlich, daut Jehowa* siene Haunt dit Kjint unjastetten deed.
67 Dan wia Sacha̱rja, de Voda, voll heiljen Jeist un profezeid un säd:
68 “Mucht Jehowa*, I̱srael äa Gott, jeloft woaren, wiels hee haft wada Metleet met siene Deena un hee haft dee friejemoakt.
69 Un hee haft von sienen Deena David siene Nokomen* eenen majchtjen Rada* verendach jebrocht,
70 soo aus hee daut derch siene heilje Profeeten to jane Tiet jesajcht haft.
71 Daut haft hee jedonen toom ons von onse Fiend raden un von dee, waut ons haussen.
72 Hee woat ons Metleet wiesen, soo aus hee onse Väavodasch daut vespruak, un hee woat sienen heiljen Bunt em Denkj hoolen.
73 Dauts daut iernste Vespräakjen*, waut hee met onsen Väavoda Abraham muak.
74 Hee haft ons von onse Fiend friejemoakt un soo haft hee ons nu de Iea jejäft, fa am onen Angst heiljen Deenst to doonen;
75 eenen Deenst, waut wie ons Läwen lank tru un jerajcht doonen.
76 Oba du kjlienet Kjint, du woascht een Profeet von dän Hechsten jenant woaren, wiels du woascht Jehowa* veroppgonen un siene Wäaj reedmoaken.
77 Du woascht siene Deena daut weeten loten, daut see derch de Sindenvejäwunk kjennen jerat woaren,
78 wäajen ons Gott soo leeftolich metfeelen deit. Wäajen dit Metjefeel woat Gott ons soo aus een Morjenlicht von bowen bedachen,
79 om dee Licht to jäwen, waut em diestren setten un waut en eene Jäajent sent, wua de Doot soo aus een Schauten äwa äant es, un om onse Feet opp dän Frädenswajch to leiden.”
80 Un daut Kjint woss opp un wort een Maun, waut jeistlich jesonnen* wia. Hee bleef wieda enne Wiltnis, bat de Tiet kjeem, daut hee de Israeliten jinkj prädjen.
Footnooten
^ Aulsoo derch vetalen.
^ Eenje Biblen sajen uk “Zachari̱as”.
^ Dauts eene Priestagrupp.
^ Wuatlich: “von Aaron siene Dajchta”.
^ Ooda: noch em Muttalief.
^ Dauts Gott.
^ Ooda: “de Vodasch äa Hoat no de Kjinja dreien”.
^ Ooda: “eene Wision”.
^ Ooda: “effentlichen”.
^ Wuatlich: “Junkfru”. Daut es eene Mejal, waut noch kjeenmol haft Sex jehaut.
^ Ooda: En dien Muttalief woat daut aunsaten.
^ Daut es, wan een Maun un eene Fru jeschlajchtlich toopkomen.
^ Ooda: “bie Gott es aules mäajlich”.
^ Wuatlich: “mien Jeist”.
^ Met daut Wuat “Jennerazion” sent jeweenlich Menschen von een veschiednet Ella jemeent, waut fa een jewesset Stoot en deeselwje Tiet läwen.
^ Ooda: “Hoat”.
^ Wuatlich: “Sot”.
^ Ooda: “hauden Forcht”.
^ Wuatlich: “sien Hus”.
^ Ooda: “de Eit”.
^ Wuatlich: “stoakj em Jeist”.
