9. POAT
Woo kaun eena een scheenet Famieljenläwen haben?
1. Wuarom es daut wichtich, sikj verem Jesaz truen to loten?
De goode Norecht kjemt von Jehova, dän “jlekjeljen Gott”, un hee well, daut de Famieljes daut scheen jeit (1. Timotäus 1:11, NW). Gott haft met de Ehe dän Aunfank jemoakt. Christen motten doano seenen, daut äare Ehe uk verem Jesaz jeltich es. Daut es wichtich fa een scheenet Famieljenläwen un uk toom Kjinja opptrakjen. Soo kaun de Famielje sikj secha un veeent feelen. Läs Lukas 2:1, 4-5.
Woo sitt Gott de Ehe? Hee well, daut Befriede sikj emma tru sent un äa Läwen lank toopbliewen (Hebräa 13:4). Am es Ehescheedunk sea jäajenaun (Maleachi 2:16). Jehova jeft Christen mau dan Frieheit, sikj scheeden to loten un fresch to befrieen, wan eent von de Ehepoatna de Ehe jebroaken haft. Läs Matäus 19:3-6, 9.
2. Woo saul eena met sienen Ehepoatna omgonen?
Jehova haft Maun un Fru soo jemoakt, daut dee em Ehestaunt fein toopschaufen kjennen (1. Mose 2:18). Aus daut Haupt von de Famielje haft de Maun de Veauntwuatunk, fa de Famielje to sorjen un dee von Gott to lieren. Ut Leew saul hee daut ieeschte om siene Fru bedocht sennen un nich om sikj selfst. De Ehepoatna sellen sikj leewen un achten. Un wiels kjeena volkomen es, kaun dee daut mau dan goot gonen, wan see lieren, sikj to vejäwen. Läs Efeesa 4:31-32; 5:22-25, 33; 1. Petrus 3:7.
3. Saul eena uteneen gonen, wan daut em Ehestaunt Trubbel jeft?
Wan daut em Ehestaunt nich jlei rant, sellen sikj aulebeid bemieejen, unjarenaunda leeftolich to sennen (1. Korinta 13:4-5). Gott sien Wuat rot Ehelied nich too, wäajen Trubbels, waut daut jeweenlich en daut befriede Läwen jeft, uteneen to gonen. Läs Markus 10:9.
4. Waut wenscht Gott sikj fa de Kjinja?
Jehova well, daut Kjinja daut scheen jeit un hee jeft an dän basten Rot, daut see kjennen aum Läwen Freid haben. Hee well uk, daut see no äare Elren horchen, daut an dee äare Erfoarunk un Weisheit togood kjemt (Kolossa 3:20). Jehova wenscht sikj, daut de Kjinja beläwen, woo väl Freid daut jeft, am un sienen Sän to deenen. Läs Liera 11:9 bat 12:1; Matäus 19:13-15; 21:15-16.
5. Waut kjennen Elren doonen, daut de Kjinja daut scheen jeit?
De Elren motten doano seenen, daut de Kjinja Äten, Kjleeda un een Dak äwarem Kopp haben (1. Timotäus 5:8). Oba daut de Kjinja daut kaun scheen gonen, motten de Elren an uk von Gott lieren un an halpen, siene Frind to woaren (Efeesa 6:4). Wan dee seenen, daut äare Elren Gott opp iernst leewen, kaun daut bie an väl doonen. Fa de Kjinja es daut sea toom gooden, wan de Elren de Schreft brucken, om an to belieren. Läs 5. Mose 6:4-7; Spricha 22:6.
Kjinja fält daut, daut de Elren an lowen un Moot moaken. Oba dee motten uk belieet un trajchtjewäsen. Soo kjennen de Elren an halpen, daut dee nich waut doonen, waut an schoden kunn (Spricha 22:15). See sellen met äare Kjinja oba kjeenmol hunjsch ooda hoat omgonen. Läs Kolossa 3:21.
Bie Jehova siene Zeijen sent veschiedne Bieekja to haben fa Elren un Kjinja. Aul dise Bieekja stetten sikj opp de Schreft. Läs Psalm 19:8, 12.
Veleicht jleichst du uk dit
WOO DE EHE UN FAMIELJE KAUN SCHAFTICH SENNEN
Gott sien Rot fa eenen gooden Ehestaunt
Twee eefache Froagen kjennen die halpen, eenen bätren Ehestaunt to haben.
WOO DE EHE UN FAMIELJE KAUN SCHAFTICH SENNEN
Met Trubbels omgonen
Aus een Poa Lied eenen gooden Ehestaunt haft ooda nich, kaun krakjt doano sennen, woo dee aun äare Trubbels naungonen.
