Woo kjenn wie bäden, daut Gott no ons horcht?
Jehova Gott horcht no “onse Jebäda” (Psalm 65:3). Wie kjennen to irjenteene Tiet un opp irjenteene Städ bäden, endoont aus opp ludes ooda opp stelles. Jehova well, daut wie am onsen “Voda” nanen, un hee es de basta Voda, waut daut jeft (Matäus 6:9). Un wäajen hee ons väl räakjent, lieet hee ons, woo wie bäden sellen, daut hee no ons horchen kaun.
BÄD TO JEHOVA GOTT EN JESUS SIENEN NOMEN
“Mien Voda woat junt aules jäwen om waut jie en mienen Nomen froagen” (Johanes 16:23)
Jesus siene Wieed wiesen gaunz kloa, daut wie en sienen Nomen to Jehova bäden sellen. Hee säd nich, daut wie Bilda aunbäden sullen ooda daut wie derch Heilje ooda Enjel ooda derch vestorwne Väafoaren bäden sullen. Wan wie en Jesus sienen Nomen to Gott bäden, dan wies wie, daut wie daut väl räakjnen, waut Jesus fa ons jedonen haft. Jesus säd je: “Kjeena kjemt nom Voda buta derch mie” (Johanes 14:6).
BÄD VON HOATEN
“Schett jun Hoat ver am ut” (Psalm 62:9)
Wan wie to Jehova bäden, dan sell wie daut soo doonen, aus wan wie wudden to eenen leeftoljen Voda räden. Wie sellen von Hoaten un respakjtvoll bäden un nich bloos een Jebäd väaläsen ooda utwendich äwasajen.
BÄD SOO, DAUT ET NO GOTT SIENEN WELLEN ES
“Hee [deit] ons hieren . . ., wan wie am no waut froagen, daut no sienem Wellen es” (1. Johanes 5:14)
Jehova Gott sajcht ons en de Schreft, waut hee fa ons doonen woat un waut wie fa am doonen sellen. Gott woat onse Jebäda aunnämen, wan wie soo bäden, daut et “no sienem Wellen es”. Doawäajen sell wie de Bibel studieren, daut wie am goot kjanen lieren. Dan woat hee aun onse Jebäda eenen Jefaulen haben.
OM WAUT KJENN WIE BÄDEN?
Bäd om daut, waut die fält. Wie kjennen om daut bäden, waut wie jieda Dach brucken, soo aus Äten un Kjleeda un een Dak äwarem Kopp. Wie kjennen Gott uk no Weisheit froagen, daut wie daut rajchte doonen kjennen, un no Krauft, daut wie met onse Trubbels foadich woaren kjennen. Wie kjennen uk om Gloowen bäden un om Vejäwunk un daut Gott ons halpt (Lukas 11:3-4, 13; Jakobus 1:5, 17).
Bäd fa aundre. Leeftolje Elren jleichen daut, wan äare Kjinja sikj unjarenaunda leewen. Krakjt soo jleicht Jehova daut, wan wie aus siene Kjinja omzajcht om ons bekjemmat sent. Wie kjennen aulsoo uk fa onsen Ehepoatna bäden un fa onse Kjinja un Frind un fa daut Frintschoft. De Jinja Jakobus schreef: “Bät eena fa dän aundren” (Jakobus 5:16).
Saj Gott dankscheen. Gott haft ons jemoakt un de Schreft sajcht von am: “Hee deed junt goodet, jeef junt Räajen vom Himmel un fruchtboare Tieden. Hee jeef junt jenuach to äten un muak junt daut Hoat froo” (Aposteljeschicht 14:17). Wan wie doaräwa nodenkjen, waut Gott aul aules fa ons jedonen haft, dan well wie secha to am bäden un am doafäa dankscheen sajen. Un wan wie Gott dankboa sent, dan woa wie am uk wellen jehorchen (Kolossa 3:15).
SIE JEDULDICH UN HIA NICH OPP TO BÄDEN
Eenjemol feel wie ons veleicht mootloos, wiels Gott onse opprechtje Jebäda nich fuaz beauntwuaten deit. Meent daut dan, daut Gott nich om ons bekjemmat es? Nä. Eenjemol mott wie veleicht foakna wäajen eene Sach bäden. See wie doatoo mol een poa Biespels.
Steve, von dän wie en dän ieeschten Artikjel aul jerät haben, sajcht: “Wan ekj oppjehieet haud to bäden, dan haud ekj Joaren trigj aul Hopninj oppjejäft.” Waut holp am, nich opptojäwen? Hee funk aun de Bibel to studieren un lieed, daut eena aunhoolent bäden sull. Steve sajcht: “Ekj dank Gott, daut ekj soone feine Frind hab, waut mie soo leeftolich jeholpen haben. Nu sie ekj väl schaftja aus jeemols ea.”
Woo kjeem daut met Jenny ut, waut sikj daut nich wieet feeld, daut Gott no ar horcht? See sajcht: “Aus ekj gaunz rauf wia, prachad ekj Gott, daut dee mie sull halpen to vestonen, wuarom ekj mie soo wieetloos feeld.” See sajcht wieda: “Daut bäden holp mie, daut ekj kloara denkjen kunn. Ekj wort en, daut Gott mie nich fa schlajcht tald, wan ekj daut selfst uk deed. Daut haft mie jeholpen, daut ekj nich oppjeef.” Woo denkjt see nu? Jenny sajcht: “Derch daut bäden es mie daut kloa jeworden, daut Jehova werkjlich een leeftolja Gott un Voda un Frint es. Ekj weet daut: Wan ekj mie aunstrenj sienen Wellen to doonen, woat hee sikj emma om mie kjemren un mie halpen.”
Isabel äa Sän Gerard es schaftich, wan dee uk behindat es. See sajcht: “Ekj kaun seenen, daut Gott werkjlich no miene Jebäda jehorcht haft”
Well wie mol seenen, waut Isabel beläwd. Aus see sullen een Kjlienet haben, säden de Doktasch, daut daut Bäbe wudd sea behindat sennen. See feeld sikj gaunz doljeschloagen. Eenje säden mau rajcht, see sull sikj daut loten wajchmoaken. See sajcht: “Ekj haud daut soo schwoa doamet, daut ekj docht, daut ekj wudd stoawen motten.” Waut deed see dan? Isabel sajcht: “Ekj deed emma wada bäden, daut Gott mie halpen sull.” Aus daut Junkje dan jebuaren wia, waut Gerard heet, wia daut werkjlich behindat. Haud Isabel daut Jefeel, daut Gott no äare Jebäda jehorcht haud? Jo, see haud. Woo dan? See sajcht: “Nu es ons Jung 14 Joa un dee es schaftich, wan dee uk behindat es. Ekj kaun seenen, daut Gott werkjlich no miene Jebäda jehorcht haft. Daut wie disen Jung haben, es opp iernst een groota Säajen von Jehova Gott.”
Wan eena soone scheene Erfoarungen hieet, dan mott eena eefach aun de Wieed en Psalm denkjen: “HAR, du hast de unjadrekjte äa velangen jehieet. See sent sikj em Hoat secha daut dien Ua daut hieet” (Psalm 10:17). Daut loont sikj werkjlich, daut wie nich opphieren to bäden!
Enne Schreft sent een deel von Jesus siene Jebäda oppjeschräwen. Daut Jebäd, waut daut mieeschte bekaunt es, es secha daut, waut hee siene Jinja lieed. Waut kjenn wie doavon lieren?
Veleicht jleichst du uk dit
DE WOAKTORM
Om waut sell wie bäden?
En daut “Unser Vater”-Jebäd, wees Jesus ons kloa, aun waut wie denkjen sellen, wan wie bäden.
WAUT SAJCHT DE SCHREFT ÄWA ...?
Saul eena to Heilje bäden?
Lia, waut de Schreft sajcht, to wäm wie bäden sellen.
DE WOAKTORM
Bäd wieda om Gott sienen Jefaulen
Oba woo kjenn wie to Gott bäden, daut hee no ons horcht un ons säajent?
