Jo. Mank Jehova siene Zeijen sent millionende Frues, waut oppe gaunze Welt de goode Norecht von Gott sien Kjennichrikj prädjen. Psalm 68:11 (NW) säd verut: “Jehova sajcht, waut doa jedonen saul. De Frues, waut de goode Norecht bekauntmoaken, sent een grootet Häa.”

Oba waut dise Frues doonen, es nich soo aus daut, waut Frues-Prädja von aundre Kjoakjen doonen. Waut es de Unjascheet?

Soone Frues-Prädja doonen jeweenlich en äare Kjoakj lieren un doa veroppgonen. Oba de Frues bie Jehova siene Zeijen, dee prädjen de Menschen butakaunt Vesaumlunk; aul dee, waut dee trafen, wan dee von Hus to Hus gonen ooda opp aundre Städen.

Noch een Unjascheet es: enne Vesaumlungen von Jehova siene Zeijen, woaren bloos Mana aunjestalt toom lieren. Un doawäajen doonen de Frues bie de Toopkomes nich lieren, wan doa een jedeepta Maun es (1. Timotäus 3:2; Jakobus 3:1).

No de Schreft no sellen doa bloos Mana aunjestalt woaren toom Eltestasch sennen en de Vesaumlunk. De Apostel Paulus säd biejlikj to Titus: “Ekj leet die doawäajen en Kreet, om . . . en jieda Staut Jemeenten Leidasch auntostalen.” Un dan säd hee uk noch, woo soone Mana sullen sennen. Hee säd: “Aun soonen Maun saul nuscht uttosaten sennen. Dee saul mau eene Fru haben” (Titus 1:5-6, PB). Un krakjt daut säd Paulus uk to Timotäus: “Wäa doa sträft Jemeentenleida to woaren sträft no een goodet Aumt. Een Jemeentenleida saul eena sennen äwa däm sien Läwen nuscht uttosaten es. Hee saul mau eene Fru haben . . . un em Staund sennen aundre to belieren” (1. Timotäus 3:1-2, PB).

Wuarom sellen doa bloos Mana en de Vesaumlunk Eltestasch sennen? Paulus säd: “Ekj erlaub eene Fru nich, to liere, uk nich äwa dän Maun to harschen, sonda stell to sennen, dan Adam wort ieescht jeschaufen, doano Eva” (1. Timotäus 2:12-13, JHF). Dit wiest, daut Gott daut soo jemoakt haud, daut de Mana sullen veroppgonen un en de Vesaumlunk lieren.

Jieda eena von Jehova siene Zeijen kjemt daut no, waut äa Leida, Jesus Christus, deed. De Jinja Lukas schreef äwa Jesus sienen Deenst un säd, “daut Jesus boolt doaropp derch aul äare Städa un Darpa jinkj un prädijd daut Evangelium vom Gottesrikj”. Un dan lota schekjt Jesus siene Nofolja ut, daut dee krakjt dautselwje Woakj deeden. Un dee “jinjen derch de Städa un prädijden daut Evangelium” (Lukas 8:1; 9:2-6; PB).

Vondoag dän Dach doonen Jehova siene Zeijen, Mana uk Frues, aules, waut dee kjennen toom daut Woakj derchfieren, waut Jesus verutjesajcht haud. Hee säd: “Daut Evangelium von Gott sien Rikj woat en de gaunze Welt jeprädicht woaren, soo daut aule Velkja daut hieren, un dan woat daut Enj komen” (Matäus 24:14, PB).