MIE me ke ese nanpwungen riomw Kristian kan me keseula ehu sahpw tohrohr me mie anahn laud ong sounkalohki Wehio? Mie pak ke pein idek rehmw: ‘Dahme kin kamwakid irail en kohla papah ni sahpw teikan? Ia duwen arail kin kaunopada pwe ren wia soangen doadoahk wet? I pahn kak iang wia soangen doadoahk wet?’ Ehu ahl mwahu en ale pasapengpen peidek pwukat iei en koasoiong riatail Kristian pwukat. Eri kitail pahn wia met.

Dahme kamwakid uhk en tepida medemedewe duwen en papah nan ehu sahpw tohrohr me mie anahn laud ong sounkalohk? Amy, me met sounpar 35 de daulih, kohsang Wehin Amerika. E nda: “Erein sounpar tohto, I kin medewe en papah nan ehu sahpw tohrohr, ahpw e mwomwen me I sohte pahn kak wia met.” Dahme wekidala eh madamadau? “Nan pahr 2004 pwopwoud ehu me kin papah nan Belize luke ie en mwemweitla rehra oh iang ira pioneer erein sounpwong ehu. I wia met oh I uhdahn perenki! Sounpar ehu mwuri, I keseula Ghana pwehn papah wasao nin duwen pioneer men.”

Sounpar kei samwalahro, Stephanie, me met kereniong sounpar 30 oh pil kohsang Wehin Amerika, tehk mwahu duwen eh irairo oh medewehla: ‘I ahneki roson mwahu oh sohte ei pwukoahn peneinei. Mehlel, I kak wia laudsang dahme I wiewia met ong Siohwa.’ Eh wia met kamwakid ih en keseula Ghana pwehn kalaudehla eh doadoahk en kalohk. Filip oh Ida, pwopwoud ehu me ele sounpar 50 de daulih oh wia pioneer kei, sang Denmark, kin ahnsou koaros medemedewe en keseula wasa ehu me mie anahn laud ong sounkalohk. Ira kin rapahki ahl akan en kapwaiada ara ineng en wia met. Filip nda: “Ni ahnsou mwahu en wia met eh pwarada, e mwomwen me Siohwa mahsanihong kiht: ‘Tihengwei!’” Nan pahr 2008 ira keseula Ghana oh papah wasao daulih sounpar siluh.

Hans oh Brook, pwopwoud ehu me sounpar 30 samwa oh wia pioneer kei, kin papah nan Wehin Amerika.  Nan pahr 2005 ira iang sawas nan kahpwal laud me wiawi mwurin melimel laud me adaneki Katrina. Mwuhr, ira audehda doaropwe pwehn iang wia doadoahk en kauwada wasahn kaudok kan nan sahpw teikan ahpw ira sohte ale luhk. Hans nda: “Mwuhr se rong padahk ehu ni ehu mihting tohrohr me kasalehda duwen Nanmwarki Depit eh wehwehkier me e sohte pahn ale mweimwei en kauwada tehnpas sarawio, ih eri wekidala eh mehn akadeio. Ire wet sewese kiht en ese me se kak pilada ehu mehn akadei tohrohr nan sapwellimen Koht doadoahk.” (1 Kron. 17:1-4, 11, 12; 22:5-11) Brook pil nda, “Siohwa ketin kupwurki sen pil pilada ehu mehn akadei tohrohr.”

Mwurin Hans oh Brook rong duwen soahng kaperen kan me wiawi ong kompoakepahra kan me papah nan sahpw teikan, met kamwakid ira en song wia doadoahk en pioneer nan ehu sahpw tohrohr. Nan pahr 2012 ira keseula Ghana oh papah wasao erein sounpwong pahieu, sewese mwomwohdiso ehu me kin doadoahngki pehrail en lokaia. Mendahki ira pwuralahr nan Wehin Amerika, dahme ira lelohng erein ara papah nan Ghana uhdahn kalaudehla ara ineng en wonlahte mwohneki mahs Wehio nan ara mour. Sangete ahnsowo kohdo ira iang sewese doadoahk en kauwada wasahn kaudok pahn ohpis en Sounkadehdehn Siohwa kan nan Micronesia.

Ia duwen omw kaunopada ong papah nan wasa me mie anahn laud ong sounkalohk? Stephanie nda: “I wia roporop nan Kahn Iroir kan me pid en papah nan wasa kan me anahn laud mie ong sounkalohk. * I pil koasoiong elder kan nan mwomwohdiso oh sounapwalih me kin seiloak oh eh pwoudo duwen ei ineng en papah nan ehu sahpw tohrohr. Laudsang met, I kin kalapw patohwanohng Siohwa nan kapakap duwen ei mehn akadeio.” Ni ahnsowohte, Stephanie pilada soangen mour ehu me sohte kedirepwki soahng kan me sohte nohn kesempwal, met kahrehiong ih en kak nekidala mwohni pwehn sewese ih ni eh papah nan ehu sahpw tohrohr.

 Hans nda: “Se kapakapki sapwellimen Siohwa kaweid pwehki se men kohla wasa me e ketin kahluwahla kiht. Se pil kapatahiong nan at kapakap kan iahd ahnsowo me se pahn wia dahme se pilahnehda.” Pwopwoudo kadarala kisinlikou ni ohpis pahieu en Sounkadehdehn Siohwa kan. Mwurin ara alehdi rohng uhdahn mwahu ehu sang ohpis en Sounkadehdehn Siohwa kan nan Ghana, ira seiloakla wasao pwehn mwemweit erein sounpwong riaute. Hans nda: “Se uhdahn perenki at iang tohnmwomwohdiso doadoahk en kalohk, kahrehda se kareireila at mi wasao.”

George oh Adria, pwopwoud ehu sang Canada, me kereniong sounpar 40, kin tamataman me Siohwa kin ketin kapaiada pilipil mwahu kan, a kaidehn ihte ineng mwahu kan. Ira eri wiahda kahk mwahu kan pwehn kak kapwaiada ara mehn akadeio. Ira koasoiong sister men me kin papah nan wasa me anahn laud mie ong sounkalohk nan Ghana oh idek reh peidek tohto. Ira pil ntinglahng ohpis en Sounkadehdehn Siohwa kan nan Canada oh pil Ghana. Adria nda: “Se pil rapahki ahl kan pwe sen kamengeila at mour oh sohte kedirepwki soahng kan me sohte nohn kesempwal laudsang me se wiahier.” Ara pilipil ko kahrehiong ira en kak keseula Ghana nan pahr 2004.

Kahpwal dah kan me ke lelohng mwurin omw keseula, oh ia duwen omw powehdi kahpwal pwukat? Ong Amy, tepin eh kahpwalo iei loaleidki eh peneinei. E nda: “Soahng koaros wasao weksang dahme I tikida loale.” Dahme sewese ih? E nda: “Ei peneineio ar kin call oh ndaiong ie ia uwen arail kalahnganki doadoahk me I wiao kin sewese ie pousehlahte ei kin papah wasao. Mwuhr, ngehi oh ei peneineio tepida doadoahngki Internet en koasoipene oh kilang emenemen. Pwehki at kak  kilang emenemen, mwomwen me ei peneineio kin karanih ie.” Amy koasoia me eh kompoakepahnkihla emen sister en wasao sewese ih en esehla soangsoangen tiahk en wasao. E nda: “Kompoakepahio wiahla emen me I kin likih oh kohla reh ma I anahne sawas ni ahnsou me I sohte wehwehki ia kahrepen aramas en wasao kin mwekidki soahng kan. Pwehki eh sawas, I sukuhlki dahme ien wia oh dahme ien soikala, oh met uhdahn wia kamwahu ong ie en pousehlahte nan ei doadoahk en kalohk ni peren.”

George oh Adria koasoia me ni ara tepin keseula Ghana, e mwomwen me re pwuralahng mahsie. Adria nda: “Se kin doadoahngki pekid kan a kaidehn misihn en lopwolopw. Ei kin kaunopada mwenge kin mwomwen pak eisek wereisang dahme I kin ahn. Ahpw ahnsou kis mwuri, irair kan me mwomwen apwal uhd wiahla soahng kapw kei me se lelohng.” Brook nda: “Mendahki kahpwal kan me kiht pioneer kan kin lelohng, se kin ahneki mour nsenamwahu. Ni at kihpene soahng koaros me se lelohng me kangoange kiht, e rasehng at kihpene mwaramwar en mehn kataman kan me se uhdahn kesempwalki.”

Dahme kahrehda ke men kangoange meteikan en wia soangen doadoahk en kalohki Wehio wet? Stephanie nda: “En kalohk wasa ieu me ke kin tuhwong aramas akan me uhdahn men esehla duwen padahk mehlel kahrehda re kin men onop Paipel rehmw rahn koaros kin uhdahn kaperen. En kohla kalohk wasa me mie anahn laud ong sounkalohk wia ehu pilipil me I wiahda me uhdahn mwahu!” Nan pahr 2014, Stephanie pwoudikihda Aaron, oh rahnwet ira kin papah ni ohpis en Sounkadehdehn Siohwa kan nan Ghana.

Christine, pioneer men sang Germany me met sounpar 30 samwa nda: “Dahme wiawihong ieo uhdahn mwahu.” Christine kin papah nan Bolivia mwohn eh keseula Ghana. E pil nda: “Ei dohsang ei peneineio kahrehda I kin ahnsou koaros kilangwohng Siohwa pwehn sawas. Ei kamehlele me e uhdahn ketin mie laudsang mahs. I pil kilang miniminpene laud nanpwungen sapwellimen Siohwa aramas akan. Doadoahk wet uhdahn kamwahwihala ei mour.” Me keren, Christine pwoudikihda Gideon, oh ira koaros kin pousehlahte papah nan Ghana.

Filip oh Ida koasoia duwen dahme ira wia pwehn sewese neira tohnsukuhl en Paipel kan en kekeirda. “Mahso mie at onop en Paipel meh 15 de daulih, ahpw se uhd kin onop ren meh 10 pwe sen kak padahki mwahu nait tohnsukuhl kan.” Ia duwe, tohnsukuhl ko paiekihda met? Filip nda: “I kin onop rehn mwahnakapw men me adaneki Michael. E kin onop rahn koaros oh uhdahn kaunopada mwahu, met kahrehda se kanekehla pwuhk en Paipel Padahngki nan sounpwong ehute. Mwurin mwo, Michael wiahla sounkalohk men me saikinte papidais. Rahno me e tepin kohla kalohk, e kalelapak rehi, ‘Ke kak sewese ie ong ei onop en Paipel kan?’ I mesen pwuriamweila. Michael kawehwehda me e tepida onop rehn aramas silimen oh e anahne sawas ni eh wia onop rehrail.” Medewehla, uwen laud en anahn ong sounkalohk kan me kahrehda pein tohnsukuhl en Paipel kan wiahlahr sounpadahk en Paipel kei!

Amy koasoiahda ia duwen eh mwadang en esehda me mie anahn laud ehu wasao: “Mwurinte ei lella Ghana, se kalohk nan kisin kousapw ehu oh rapahki irail kan me salengepon. Se tuhwong, kaidehn emente me salengepon, ahpw meh welimen nan kousapwo kelehpw!” Kedekedeo, Amy pwoudikihda Eric, oh ira koaros kin papah nin duwen pioneer tohrohr kei. Ira kin iang ehu mwomwohdiso me kin doadoahngki pehrail pwehn lokaia pwehn sewese ekei nanpwungen sounkalohk oh pil me perenki esehla padahk mehlel me salengepon kan me daulih meh 300 nan sahpwo. Ong George oh Adria, en papah nan Ghana sewese ira en uhdahn pehm mwomwen mour en misineri kan. Ia uwen ara peren ni ara ale luhk en iang towehda Sukuhl en Kilead nempe 126! Rahnwet, ira kin papah nin duwen misineri kei nan Mozambique.

E wia mehkot kaselel en kilang riatail tohto sang sahpw teikan en keseula oh iang riarail kan wasao doadoahk laud pwehn wia, ni karasaras, doadoahk en dolung. (Sohn 4:35) Nan ehuehu wihk nan sounpar ehu, mpen meh 120 kin papidaisla nan Ghana. Duwehte irail meh 17 ko me keseula Ghana, limpoak ong Siohwa kin kamwakid sounkalohk kid kid kei nan sampah pwon pwehn “perenki toukihda pein irail.” Re kin papah wasa kan me mie anahn laud ong sounkalohki Wehio. Ia uwen irail pwukat me kin perenki wia doadoahk wet ar kaperenda kupwuren Siohwa!—Mel. 110:3, NW; Lep. Pad. 27:11.