1. ¿Imatataj apóstol Pablo ajllasqa cristianosman nisqa?

APÓSTOL Pabloqa, ñaupa tiempomanta cristianosman nerqa: “Amañataj kay tiempo runas kausasqankuman jinaqa kausaychejchu”, nispa (Rom. 12:2). Chay cristianosqa Jehová Diosta sirvisharqankuña, cieloman rinankupajtaj ajllasqas karqanku. Qhawarina imaraykuchus apóstol Pablo chayta nisqanta (Rom. 1:7).

2. ¿Imaswantaj Satanás Jehová Diosmanta karunchayta munawanchej?

² Ñaupa tiempomanta wakin cristianosqa, kay mundoj yachachiyninwan, yuyayninwan ima, chimpaykuchikorqanku. Apóstol Pablotaj chaymanta llakisqa kasharqa (Efe. 4:17-19). Noqanchejpis ajinapi rikukusunman. Satanasqa “kay mundoj” diosnin kasqanrayku, imaymana tojllaswan Jehová Diosmanta karunchayta munawanchej. Payqa imatachus munasqanchejwan, chayri may rejsisqa kayta munasqanchejwan urmachiyta munawanchej. Supayqa pay jina yuyananchejpaj, imatachus wasinchejpi, lugarninchejpi chayri escuelapi yachakusqanchejmanta valekunman.

3. “Sumaj jarkʼachasqa perqasman rijchʼakoj” yuyaykunata, ¿umanchejmanta orqhoyta atisunmanchu?

³ “Sumaj jarkʼachasqa perqasman rijchʼakoj” yuyaykunata, ¿umanchejmanta orqhoyta atisunmanchu? (2 Cor. 10:4). Apóstol Pablo nerqa: “Noqayku thuñishayku, pantasqa yuyaykunata, Diosmanta yachakuyta jarkʼaj yuyaykunatapis. Chantapis tukuy yuyaykunata atipashayku, Cristota kasuyta yachanankupaj”, nispa (2 Cor. 10:5). Jehová Diosqa pantasqa yuyaykunata atipanapaj yanapawasunman. Imaynatachus uj  inyección, venenota chinkachinman, ajinallatataj Diospa Palabranqa Diabloj mundonpa venenonta yuyayninchejmanta chinkachinman.

4. Diospa Palabranmanta yachakuytawan, ¿imaspitaj cambiarqanchej?

⁴ Diospa Palabranmanta yachakuytawan, Jehová Diosta sirvinapaj kausayninchejta cambiarqanchej. Noqanchejmanta ashkhas, sajra ruwaykunata saqerqanchej (1 Cor. 6:9-11). Jehová Diosman mayta agradecekunchej, kausayninchejta cambianapaj yanapawasqanchejmanta.

5. Romanos 12:2 nisqanman jina, ¿ima iskay imastataj ruwananchej kasqa?

⁵ Bautizasqaña kaspapis, mana yuyananchejchu tiyan niña cambiananchejchu kasqanta. Bautizakunapajqa manaña juchallikorqanchejchu. Jinapis kallpachakunallapuni tiyan mana watejmanta juchallikunapaj. ¿Imaynatá chayta ruwasunman? Apóstol Pablo nerqa: “Amañataj kay tiempo runas kausasqankuman jinaqa kausaychejchu. Astawanpis yuyayniykichejta mosojyachispa, mosoj runaman tukuychej”, nispa (Rom. 12:2). Pablo nisqanman jina, iskay imasta ruwananchej tiyan. Uj kaj, ‘amaña kay tiempomanta runas jina kausanachu’. Iskay kaj, “yuyayninchejta mosojyachispa, mosoj runaman” tukunanchej tiyan.

6. Mateo 12:43-45 versiculospi Jesuspa kikinchayninmanta, ¿imatá yachakusunman?

⁶ Apóstol Pabloqa “mosoj runaman tukuychej” nispa, mana rijchʼayninchejta cambianamantachu parlasharqa, manaqa imayna runachus kasqanchejta cambianamanta (“ ¿Mosoj runamanchu tukunchej chayri rijchʼakullanchejchu?” nisqa recuadrota qhawariy). Chaypajtaj yuyayninchejta mosojyachina tiyan, nisunman imastachus sonqonchejpi munasqanchejta, imaynachus kasqanchejta  ima. Chayrayku kay tapuykunapi piensarina: “Sumaj cristianos kananchejpaj, ¿sonqomantapachachu cambiashanchej? Chayrí, ¿sutillamantachu cristianos kashanchej?”. Jesusqa imatachus ruwananchej kasqanta uj kikinchaywan sutʼincharqa (Mateo 12:43-45 leey). Chay kikinchaymanta yachakunchej, umanchejmanta mana allin yuyaykunata orqhospañapis, Diosta kusichej imaswan yuyayninchejta juntʼachinanchej kasqanta.

7. Sonqonchejpi imayna runachus kasqanchejta cambianapaj, ¿imatá mosojyachinanchej tiyan?

⁷ Sonqonchejpi imayna runachus kasqanchejta, ¿cambiayta atisunmanchu? Biblia nin: “Yuyayniykichejta pusan chay kallpata mosojyachinallaykichejpuni tiyan. Mosoj runa kaywantaj pʼachallikuychej, mayqenchus Diospa munayninman jina ruwasqa karqa, chaywan. Chaytaj ruwasqa karqa, cheqan kajta ruwanapaj, cheqa sonqotaj kanapaj”, nispa (Efe. 4:23 sutʼinchaynin, 24). Rikunchej jina, mana atikullajtinpis, sonqonchejpi imayna runachus kasqanchejta cambiayta atinchej. Ichá ninchej: “Noqaqa sajra munayniyta mana kasunichu”, nispa. Chaywanpis mana chayllatachu ruwananchej tiyan. Astawanqa ‘yuyayninchejta pusaj kallpataʼ mosojyachinanchej tiyan. Chaypajtaj cambiananchej tiyan, imastachus munasqanchejta, imaynachus kasqanchejta, imaraykuchus imatapis ruwayta munasqanchejta ima. Chayta ruwanapajtaj, kallpachakunallanchejpuni tiyan.

8, 9. ¿Yuyayninchejta mosojyachinapunichu kasqa? Uj hermanoj kausayninmanta parlariy.

⁸ Uj hermanonchejmanta parlarina. Payqa niraj bautizakushaspa, machu machu runa karqa, machasqalla purej, maqanakojtaj. Jinapis bautizakunanpajqa, chay ruwaykunata saqeporqa. Lugarninmanta runasqa, kausayninta cambiasqanmanta mayta tʼukorqanku. Jinapis bautizakusqanmanta pisi tiemponman, hermanonchejqa uj pruebapi rikukorqa. Uj tarde, uj machasqa runa paywan maqanakuyta munaspa wasinman risqa. Hermanonchejqa mana maqanakunanpaj sonqonta ñitʼiykukusqa. Jinapis chay runa Jehová Diospa sutinpaj sajrata parlajtin, payqa mayta rabiakusqa. Wasinmanta llojsiytawantaj, machasqata maqaykusqa. ¿Imaraykú chayta ruwarqa? Bibliata estudiasqan, manaña maqanakoj runa kananpaj yanapajtinpis, hermanonchejqa yuyayninta pusaj kallpata manaraj mosojyacherqachu. Payqa sonqonpi imayna runachus kasqanta niraj mosojyacherqachu.

⁹ Jinapis hermanonchejqa kallpachakullarqapuni (Pro. 24:16). Ancianospa yanapayninwantaj ñauparillarqapuni. Aswan qhepamantaj anciano karqa. Jinapis hermanonchejqa, watejmanta uj problemapi rikukusqa. Uj tarde salón punkupi kashajtin, uj machasqa runa waj ancianota maqayta munashasqa. ¿Imatá hermanonchej ruwarqa? Payqa pacienciawan llampʼu sonqowantaj, chay machasqa runawan parlarisqa. Chantá chay runaj sonqonta tiyaykuchiytawan, wasinkama pusapusqa. ¿Imajtintaj hermanonchej chayta ruwarqa? Imajtinchus payqa yuyayninta pusan chay kallpata mosojyacherqaña. Chayrayku manaña phiña runachu karqa, llampʼu sonqomantaj tukorqa. Hermanonchej ajinata cambiasqanqa, Jehová Diosta jatuncharqa.

10. Imayna runachus kasqanchejta, ¿uj ratopichu cambiaj kasqanchej?

¹⁰ Hermanonchejqa mana uj ratopichu cambiarqa, nitaj jinallamantachu, astawanqa kallpachakunan karqa. Ichá noqanchejpis imayna runachus kasqanchejta cambianapaj, watasta tukuy atisqanchejta kallpachakuna  kanqa (2 Ped. 1:5). Ashkha watastaña Jehová Diosta yupaychajtinchejpis, kallpachakunallapuni tiyan. Tukuy atisqanchejtataj ruwana, yuyayninchejta, sonqonchejtawan mosojyachinapaj. ¿Imataj yanapawasun chayta ruwanapaj? Qhepan parrafospi chayta yachakusun.

11. ¿Imaynatataj Jehovamanta mañakuy yanapawasunman?

¹¹ Ñaupaj kaj, Jehová Diosmanta mañakuna. Uj salmista mañakorqa: ‘Diosníy, llimphu sonqota qoway. Ukhuypi mosoj cheqan yuyayta churay’, nispa. Noqanchejpis chay salmista jina mañakuna (Sal. 51:10). Reparakunanchej tiyan, yuyayninchejta pusaj kallpata mosojyachinanchej kasqanta. Chayta ruwanapajtaj Jehová Diospa yanapanta mañakuna. Paytajrí yanapawasunpuni. ¿Imaynatá chayta yachanchej? Imatachus Jehová israelitasman nisqanpi tʼukurina. Jehová Diosqa Ezequielpa tiemponmanta israelitasman nerqa: ‘Noqaqa mosoj yuyayta, mosoj sonqotawan qosqaykichej’, nispa. Chay mosoj sonqoqa, Jehovaj nisqanta kasukunankupaj karqa (Eze. 11:19). Jehová Dios israelitasman chayta nisqanqa, mayta kallpachawanchej. Payqa israelitasta cambianankupaj yanapayta munarqa, noqanchejtapis yanapayta munallawanchejtaj.

12. Salmo 119:59 nisqanman jina, ¿imapitaj tʼukurinanchej tiyan?

¹² Iskay kaj, tʼukurina. Bibliata sapa pʼunchay sumajta leena. Chantá tʼukurina imatachus sonqonchejmanta chayri yuyayninchejmanta cambiananchej kasqanta (Salmo 119:59 leey; Heb. 4:12; Sant. 1:25). Sumajta qhawarikuna, kay mundoj yachachiyninwan chimpaykuchikushanchejchus manachus, chayta. Reparakunanchej tiyan, imapichus pantanapaj jina kashasqanchejta. Chantá mana urmanapaj kallpachakuna.

13. ¿Ima tapukuykunapitaj piensarisunman?

¹³ Kay tapuykunapi piensarina: “¿Sonqonchejpi wajkunamanta envidiakunchejchu?” (1 Ped. 2:1). “Llajtanchejmanta, escuelayoj kasqanchejmanta, chayri qhapaj kasqanchejmanta, ¿jatunchakunchejchu?” (Pro. 16:5). “Qhapaj kanchej chay, ¿wajchasta pisipajchu qhawanchej? Wajchas kanchej chayrí, ¿qhapajkunata chejnikunchejchu? Waj llajtayojkunata, ¿pisipajchu qhawanchej?” (Sant. 2:2-4). “Satanaspa mundonpi kaj imasta, ¿munapayanchejchu?” (1 Juan 2:15-17). “Millay imaswanchu chayri sajra imaswanchu, ¿kusirikuyta munanchej?” (Sal. 97:10; 101:3; Amós 5:15). Chay tapuykunapi tʼukurispaqa, reparakusunman imaspichus cambiananchejraj kasqanta. “Sumaj jarkʼachasqa perqasman rijchʼakoj imasta” noqanchejmanta chinkachisun chayqa, Tatanchej Jehovata kusichisun (Sal. 19:14).

14. ¿Imaraykutaj sumaj amigosta ajllananchej tiyan?

¹⁴ Kinsa kaj, sumaj amigosta ajllana. Reparakojtinchejpis manapis, masichakunchej chay runas jina kanchej (Pro. 13:20). Escuelapi chayri trabajopi kashajtinchej, ashkha runaswan masichakunchej. Paykunataj mana yanapawanchejchu Jehová jina yuyananchejpaj. Jinapis congregacionpeqa, sumaj amigosta tarisunman. Paykunataj ‘munakuyniyoj kanapaj, allin ruwaykunatataj ruwananchejpaj’ yanapawasun (Heb. 10:24, 25).

15, 16. ¿Imaynatá Satanás umanchejta muyuchiyta munawanchej?

¹⁵ Satanasqa tukuy atisqanta ruwashan, yuyayninchejta cambiachinawanchejpaj. Payqa yachan, Diospa Palabran allin yuyayniyoj kananchejpaj yanapawasqanchejta. Chayrayku  Supayqa imaymana pantasqa yachachiykunamanta valekun. Ajinamanta yuyayninchejta cambiachinawanchejpaj, iskayrayachinawanchejpaj ima.

¹⁶ Satanasqa Edén huertapi Evaman nerqa: “¿Nispachu Diosqa nisunkichej?”, nispa. Kunanpis ajina tapuyllawantaj umanchejta muyuchiyta munawanchej (Gén. 3:1). Satanaspa mundonmanta runasqa, iskayrayananchejpaj jina tapuwanchej. Paykunaqa niwanchej: “Qharipura chayri warmipura casarakoyqa jucha, ¿nispachu Diosqa nisunkichej? Ni navidadtapis, ni cumpleañostapis ruwankichejchu, ¿nispachu Diosqa nisunkichej? Ama yawarta churachikunkichejchu, ¿nispachu Diosqa nisunkichej? Iglesiaykichejmanta qharqochikoj familiarniykichejwan chayri amigoykichejwan amaña parlankichejchu, ¿nispachu munakuyniyoj Diosniykichej nisunkichej?”.

17. 1) Pillapis imatachus creesqanchejmanta tapuwajtinchej, ¿imatá ruwananchej tiyan? 2) Colosenses 2:6, 7 nisqanman jina, ¿imaynataj creeyninchej kanqa?

¹⁷ Imaspichus creesqanchejmanta, mana iskaychakunanchejchu tiyan. Bibliamanta yachachiykunata mana sutʼita entiendespaqa, iskayrayayta qallarisunman. Iskayrayajtinchejtaj niña allintachu yuyasunman, Diosmantapis karunchakusunman. Chaypi mana rikukunapaj, ¿imatá ruwasunman? Bibliaqa niwanchej yuyayninchejta mosojyachinanchejta. Ajinamanta noqallanchejtaj sutʼita reparananchejpaj, “Diospa munaynenqa kʼacha, cheqan, payta kusichejtaj kasqanta” (Rom. 12:2). Bibliata sapa kuti estudiaspaqa, imatachus chaypi yachakusqanchejmanta mana iskayrayasunchu. Nillataj iskayrayasunchu, Diospa kamachiykunasnin mana pantayniyoj kasqanmanta. Ajinamanta creeypi “uj sachʼa jina sumaj saphichasqas, sayachisqastaj” kasunchej (Colosenses 2:6, 7 leey).

18. Satanaspa veneno jina yachachiykunasninwan mana chimpachikunapaj, ¿imastá ruwasunman?

¹⁸ Creeypi sinchʼi sayasqa kanapajqa, sapa ujninchej kallpachakunanchej tiyan. Chayrayku yuyayninchejta pusan chay kallpata, mosojyachinallapuni. Jehovamanta atiyninta mana saykʼuspa mañakuna. Sumajta tʼukurina. Chantapis sonqonchejta yuyayninchejtawan sapa kuti qhawarikuna. Sumaj amigosta ajllana, nisunman pikunachus yuyayninchejta mosojyachinapaj yanapawasunchej, chaykunawan masichakuna. Chayta ruwaspaqa, Satanaspa mundonpa veneno jina yachachiykunasninwan, mana chimpachikusunchu. Astawanpis “pantasqa yuyaykunata, Diosmanta yachakuyta jarkʼaj yuyaykunatapis” thuñisun (2 Cor. 10:5).