Rasunpa caj Dios y Lapanta ruraj Jehová canganta Bibliaga wilacun (Apocalipsis 4:11). Abrahán y Moisés profetacuna y Jesuspis Payta adurapäcoj (Génesis 24:27; Éxodo 15:1, 2; Juan 20:17). Entero Pachapita Diosmi y manami juc marcalapitachu (Salmo 47:2).

Bibliaga wilacun Diospa jutin Jehová canganta y Paylapa chay jutiga (Éxodo 3:15; Salmo 83:18). Chay jutiga hebreo rimaycho ninan: “Ima nishganta ruraj”, y yachaj runacunapis chayno nipäcun. Chay jutiga Jehová imano canganta musyachicun, Payga Lapanta ruraj y lapanta cumplej (Isaías 55:10, 11). Biblia yanapämanchi Jehová imano canganta musyanapaj y masraj musyachimanchi cuyacoj canganpita (Éxodo 34:5-7; Lucas 6:35; 1 Juan 4:8).

Diospa jutin quechua rimaycho Jehová o Yavé ninchi. Hebreo rimaycho Diospa jutinta Tetragrámaton nishganwan escribichej (יהוה), cayga ninan YHWH; cay Hebreo letracunaga imano pashtaramushganta musyanchichu, chayno captinpis quechuachoga Jehová o Yavé nishwan. Tayta Diospa Wilakuynin nishgan traducciunchopis Diospa jutin yurimun. *

¿Imanirtaj hebreo rimaycho Diospa jutin imano pashtaramunganta musyanchichu?

Unay hebreo rimaycho escribishgancho “a e i o u” letracuna utilizajchu, pero liejcunaga quiquincuna leicaptin chay letracunaga utilizapäcoj. Chayno captinpis Diospa Palabran hebreo rimaycho escribiyta ushariptin, waquin judiucunaga Diospa jutinta utilizargannachu mana ali canganta yarpar. Diospa Palabran leipäcuptin, “Señor o Dios” nir Diospa jutinta trucachej. Tiempuwanna Diospa jutinta imano pashtaramunganta runacuna gongacärirgan.

Waquincunaga Diospa jutin “Yahweh” (“Yahvé”) pashtaramunganta nipäcun, y waquincunana jucnopa pashtaramunganta nipäcun. Mar Muerto nishgancho tarishgan rollocunacho, Levítico libro griego rimaycho Diospa jutin “Iao” nir caycan. Unay caj Griego escribejcuna “Iaé”, “Iabé” o “Iaoué” Diospa jutin pashtaramunganta nipäcun, pero rasunpaga hebreo rimaycho imano pashtaramungantaga manami musyacanchu. *

Waquincuna ima yarpapäcushganta Bibliacho caycaj Diospa jutinpita

¿Imataj nipäcun runacuna? Diospa jutin hebreo rimaychoga imano pashtaramushganta mana musyar utilizashwanchu.

Biblia yachachicun: Chayno pensashgaga, ima idiumata parlarpis igual-lapa jutinta utilizanapaj Dios munanganta nishwan, pero manami chaynochu. Unay Diospa sirvejnincunaga may marcapitapis capäcurgan, chaymi juticunata jucnopa parlapäcoj.

Israel marca juez Josué jutinpita ricärishun. Punta cristianucuna hebreo rimajcuna chay jutiga “Yeshúa” nipäcoj y griego rimajcunaga “Iesous” nipäcoj. “Yeshúa” jutiga hebreo rimaycho caycan, pero Bibliachoga griego rimaychopis traducishga caycan, cayga musyachimanchi chay cristianucunaga marcancho parlashganno juticunata utilizapäcunganta (Hechos 7:45; Hebreos 4:8).

Diospa jutinta traducishgaga chaynola ruracanman. Jutin imano pashtaramushganta musyanchichu, chaymi más ali caycan Bibliacho Diospa jutin maycho caycanganta chaycho cananpaj.