Pa neʼ kakoj ronojel achuqʼabʼ rech kʼo kikotemal pa ri afamilia xuqujeʼ pa ri akʼulanem, jujun taq mul kkʼulmataj jastaq che kixuya pa bʼis (Eclesiastés 9:11). Are kʼu ri Dios kojutoʼ chiʼ kojqʼax pa taq kʼax. We kakojo o kabʼan ri pixabʼ re ri Utzij ri Dios che kʼo waral, at xuqujeʼ ri afamilia kixkunik kichʼij ri nimaʼq taq kʼax.

RI KUBʼIJ RI BIBLIA: «Ronojel ri kixok wi il, chiya pa uqʼabʼ ri Dios. Ri areʼ kʼut kixuchajij» (1 Pedro 5:7). Chnaʼtaj chawe che ri Dios man are ta ajmak che ri kʼax kariqo (Santiago 1:13). We katqebʼ rukʼ, ri areʼ qas utz atoʼik kubʼano (Isaías 41:10). «Chixchʼaw rukʼ, rukʼ ronojel jikibʼam kʼuxaj.» (Salmo 62:8.)

Jun chik jastaq che xuqujeʼ kukubʼsaj akʼuʼx are usikʼixik uwach ri Biblia ronojel taq qʼij xuqujeʼ uchomaxik ronojel ri kraj kubʼij. We je riʼ kabʼano, kawilo che qastzij are ri Dios «kukuʼbʼisaj qakʼuʼx pa ronojel» (2 Corintios 1:3, 4; Romanos 15:4). Areʼ kubʼij che kuya «ri ujamaril ri Dios, ri nim na chuwach ronojel noʼj» chawe (Filipenses 4:6, 7, 13).

RI KATKUNIK KABʼANO:

• Chataʼ che ri Jehová che kukubʼsaj akʼuʼx xuqujeʼ rech ksach ta ri achomanik

• Chatchoman chrij ri jastaq che katkunik kabʼano rech kachaʼ ri utz chawe

RI KUBʼIJ RI BIBLIA: «Ri ajnoʼjabʼ xuqujeʼ ri e kʼoxomanelabʼ kakiriq ri etaʼmanik ri kakitzukuj» (Proverbios 18:15). ¿Jas kajwataj che ri familia pa kijujunal? Chatchoman chrij ronojel. Chatchʼaw kukʼ xuqujeʼ cheʼatatabʼej (Proverbios 20:5).

¿Jas kabʼano we kʼo jun winaq che sibʼalaj kaloqʼoqʼej kkamik? Matkʼix che ukʼutik ri kanaʼo. Chnaʼtaj chawe che xuqujeʼ «xoqʼ ri Jesús» (Juan 11:35; Eclesiastés 3:4). Xuqujeʼ sibʼalaj rajawaxik che katuxlanik xuqujeʼ katwarik (Eclesiastés 4:6). Rukʼ wariʼ katkunik kachʼij ri kʼax.

RI KATKUNIK KABʼANO:

• Chiʼ majaʼ kkʼulmataj jun kʼax chanaʼqʼatisaj awibʼ che amaqʼel katchʼaw rukʼ ri afamilia. Rech chiʼ kʼo kʼax, kkaj kechʼaw awukʼ

• Chatchʼaw kukʼ ri winaq che e qʼaxinaq pa kʼax junam rukʼ ri tajin katqʼax wi at

RI KUBʼIJ RI BIBLIA: «Jun achil amaqʼel kel ukʼuʼx, pa taq kʼu ri qʼijol re riqoj kʼax jachaʼ jun achalalaxik» (Proverbios 17:17). Qastzij wi che ri e awachiʼl kkaj katkitoʼ, are kʼu weneʼ ketaʼm taj jas kkibʼan che atoʼik. Chabʼij chke ri rajawaxik chawe (Proverbios 12:25). Xuqujeʼ, rech kkowir ri akojonik chattzijon kukʼ ri ketaʼm chrij ri Biblia. Rumal che katkitoʼ rukʼ ri Biblia, qastzij wi kachʼij ri kʼax (Santiago 5:14).

We qas kawachilaj winaq che kʼo qastzij kikojonik chrij ri Dios xuqujeʼ kkikubʼsaj kikʼuʼx chrij ri kbʼan na, e areʼ katkitoʼ. Xuqujeʼ kuya kubʼsal kʼuʼx chawe we katoʼ chi nikʼaj winaq che e kʼo pa kʼax. Chatzijoj ri akojonik chrij ri Jehová chke ri winaq xuqujeʼ chrij ri kubʼan na. Amaqʼel cheʼatoʼ nikʼaj chik xuqujeʼ katas ta awibʼ chkij ri katkiloqʼoqʼej xuqujeʼ keʼok il chawe (Proverbios 18:1; 1 Corintios 15:58).

RI KATKUNIK KABʼANO:

• Chattzijon rukʼ jun utz awachiʼl xuqujeʼ chayaʼ che katutoʼo

• Qas chabʼij ri kajwataj chawe