Obregun markachömi yurirqä, tsëqa këkan Mëxicuchömi. Noqakunaqa kayarqä nuëvim. Papänï chakrachö trabajaptinmi tsëchö täräyaq kayä, y tsëchöqa llapäkunapis yanapakurmi kushishqa kawakuyarqä. Peru pitsqa watayoq këkaptïmi, alläpa vientuwan tsë marka ushakärirqan. Tsëmi juk markaman ëwakuyarqä.

 Papänïqa atska qellëta tarirmi qallëkurqan, peru borrächum tikrakurirqan. Tsëmi, familiächö allinatsu kawakuyarqä. Wawqïkunawanmi, papänïpa cigärrunta suwarir shoquyaq kayä. Y joqta watayoqllaraq këkarmi pasëpa machakurkurqä. Teytäkunaqa rakikäkuriyarqanmi, y noqaqa masmi upyar y cigärruta shoqur qallëkurqä.

 Mamänïqa juk nunawanmi ewkurqan, y noqakunapis pëwanmi ëwayarqä. Tsë nunaqa manam yanapayämaqtsu, y mamänï tarinqan qellëqa manam tinkupayämaqtsu. Tsëmi wawqïkunawan imëkachö trabajayarqä, peru manam gastükunapaq tinkutsiyarqätsu. Noqaqa trabajarqa zapatukunata lustrar, tantata, periödicuta y chiklita rantikurmi. Y qellëyoq nunakuna jitayanqan basürakunachömi, mikuyta ashir pureq kä.

 Chunka watayoq këkaptïmi, juk nuna basürata jitayanqanchö trabajanäpaq nimarqan. Escuëlata dejarirmi, tsëchö trabajanäpaq wayïpita ëwakurqä. 3 sölistanöllam pagamaq, y basüraman jitayanqan mikuytam mikuyaq kayä. Basüraman jitayanqan cösaskunallawanmi, juk tsukllata o chösata rurarqä. Tsëchö nunakunaqa mana allikunata parlaq, jukwan jukwan kakoq, borrächukuna y drögata shoqoqkunam kayarqan. Tsëmi cada paqas waqaq kä alläpa mantsarnin. Waktsa kanqäpita y mana imatapis yachanqäpitam penqakoq kä. Kima watapam tsëchö karqä. Tsëpitaqa juk markatam ëwakurqä. Tsëchöqa wëtata, utkuta, cäña de azucarta y papata murupakurmi trabajarqä.

 Chusku wata pasariptin Obregunman kutirirqa, tiyäpa wayinchömi quedakurqä. Tiyä brujerïata ruraptinmi, mana allikunata suëñukur wayinchöqa punuyta puëdirqätsu. Llakishqalla kakurmi wanuyta munarqä. Tsëmi Teyta Diosman kënö mañakurqä: “Teytallä, yanapëkamë reqinaqpaq y imëyaqpis sirwinaqpaq. Juk alli religion kaptinqa, mëqan kanqanta reqïkatsillämë”.

 Wamra kanqäpitam Teyta Diospitaqa yachakuyta munarqä. Tsëmi atska religionkunaman ëwarqä. Tsë religionkunachöqa manam Bibliapitatsu yachatsikuyaq, y manam Teyta Diosta reqinäpaq yanapayämarqantsu. Tsëpa rantinqa, qellëllamanmi yarparäkuyaq, y wakinnäqa jukwan jukwanmi lluta kakuyaq.

 19 watayoq këkaptïmi, juk kaq cuñädü nimarqan Jehoväpa testïgunkunawan santukunapita parlayanqanta. Exodu 20:4, 5-tam (Teyta Diospa Willakïnin [TDW]) leyipämarqan, y tsëchöqa nin santukunata mana adoranapaqmi. 5 kaq versïculuchömi nin: “Tsëkunamanqa ama qonqurikunkitsu ni adorankitsu. Noqallam [puëdiq] TEYTA DIOSNIKI kä. Noqallata adoramänëkitam munä”. Tsëpitanam cuñädüqa kënö tapumarqan: “Santukunawan milagrukunata rurëkar y santukunawan adoranata munarqä, ¿imanirtan Teyta Diosqa santukunaman mana qonqurikunapaq nimantsik?”. Tsë nimanqanmanmi yarpachakurqä. Teyta Diospita cuñäduwan parlayaptïqa, tiempupis imanöllachi pasareq.

 Tsëpitam, Jehoväpa testïgunkunapa reunionninman cuñädüwan ëwayarqä. Tsëchö rikanqä y wiyanqäqa alläpam gustamarqan. Wamrakunapis shumaqmi yachatsikayämoq. Tsëchömi rikarqä, Testïgukunaqa llapan nunakunata shumaq yachatsiyanqanta. Aqtsasapa y mana alli röpawan ëwashqa kaptïpis shumaqmi chaskiyämarqan. Y juk familianäqa, mikoq ëwayänäpaqmi niyämarqan.

 Testïgukunawan Bibliapita yachakurmi, Teyta Jehoväqa kuyakoq kanqanta rikarqä. Y pëqa mëpita kashqa, waktsa o rïcu kashqapis llapantsiktam igualpa rikämantsik y llapantsikpaqmi yarpachakun (Hëchus 10:34, 35). Unëqa manam musyarqätsu imapaq kawanqäta, peru tsëpitaqa Jehovä Diosta reqirmi kushishqa karqä.

 Bibliapita yachakurirqa jukläya nunanam karqä. Washku upyëta, cigärru fumëta y mana alli parlëkunatapis dejarqämi. Manam unënötsu mana allikunata suëñukur y piñashqanölla kä. Wamra karnin imëka mana allikunapa pasashqa kar y mana imatapis yacharmi, mana imapaqpis sirwinqäta yarpaq kä; peru kananqa manam tsënönatsu yarpä.

 Jehovä Diosta kuyaq y imëkachö yanapamaq warmitam tarirqö. Congregacionkunata watukaqmi kä. Tsëmi kananqa wawqi panikunata imëkachö yanapä y yachatsï. Jehovä Dios yanapamashqa kaptin y imëkanöpa yachatsimashqa kaptinmi, kananqa imanö kanqäpita penqakünatsu.