1. Ciëlupaq akrashqa cristiänukunataqa, ¿imatataq apostol Pablu consejarqan?

APOSTOL Pablum punta cristiänukunata kënö consejarqan: “Kanan witsan imëkapis imanö këkanqanmannö kawëta jaqiyë” (Rom. 12:2). ¿Imanirtaq ciëlupaq akrashqa këkäyaptimpis punta cristiänukunata Pablu tsënö consejarqan? (Rom. 1:7).

2, 3. (1) ¿Imatataq Satanasqa ruran Jehoväpa contran churakänapaq? (2) ¿Imataq yanapamäshun mana alli pensënintsikkunata chipyëpa ushakätsinapaq?

² Satanaspa makinchö këkaq nunakuna pensayanqannömi wakin cristiänukunaqa pensar qallëkuyarqan, tsëmi apostol Pabluqa alläpa yarpachakurqan (Efes. 4:17-19). Noqantsiktapis tsëqa pasaramashwanmi. Satanasqa kanampis imëkatam utilizan Jehoväta sirwita jaqitsimänapaq. Tsëpaqqa kikintsikllapaq imatapis munanqantsikta o wakimpita mas alli këta munanqantsiktam utilizan. Jinamampis imanö wätashqa kanqantsikta, imata estudianqantsikta itsa utilizanman, pë munanqannö pensanapaq.

³ ¿Alleq patsakashqa pensëkunata ushakätsita puëdintsikku? (2 Cor. 10:4). Tsëpaqqa apostol Pablum kënö nirqan: “Porqui Diospita musyëpa contran sharkoq alleq patsakashqa käyikïkunata y imëka jatun atäjukunatam juchïkätsiyä, y llapan pensëkunatam juk prësuta llaweqnö dominayä, tsënöpa Cristuta wiyakoq kayänampaq” (2 Cor. 10:5). Jehoväpa yanapakïninwanmi nunakunapa  mana alli yachatsikïninkunata ushakätsita puëdintsik. Imanömi qeshyëkaqkunata juk jampi yanapan, tsënöllam Diospa Palabrampis Satanaspa makinchö këkaq nunakunapa yachatsikïninta ushakätsinapaq yanapamantsik.

4. Bibliapita yachakurninqa, ¿ima cambiukunatataq rurarquntsik?

⁴ Jehoväpita yachakurnin y pëta sirwinapaq decidirninmi cambiukunata rurarqantsik. Y mana alli rurënintsikkunatam dejarquntsik (1 Cor. 6:9-11). Tsëkunata dejanapaq yanapamanqantsikpitaqa alläpam Jehoväta agradecikuntsik.

5. Romänus 12:2 textuqa, ¿imata ruranapaqtaq consejamantsik?

⁵ Cambiukunata rurëta manana wananqantsiktaqa ama pensashuntsu. Manaraq bautizakurnin ruranqantsik jutsakunata dejashqana karnimpis, cuidakunantsikmi tsë jutsa rurëman yapë mana ishkinapaq. Apostol Pablum kënö consejamantsik: “Kanan witsan imëkapis imanö këkanqanmannö kawëta jaqiyë; tsëpa rantinqa, pensënikikunata cambiar jukläyana tikrayë” (Rom. 12:2). Kë textu ninqannömi puntataqa, mana alli pensëkunata dejanantsik. Y tsëpitanam, imanö pensanqantsikta chipyëpa cambianantsik.

6. ¿Imatataq yachakuntsik Mateu 12:43-45 textuchö Jesus ninqampita?

⁶ Pabluqa manam janan janan cambiukunata ruranallapaqtsu nikarqan. Sinöqa imanö pensanqantsikta chipyëpa cambianantsikpaqmi (rikäri “ ¿Pensënikikunata cambiar jukläyana tikrayë?” nishqan recuadruta). Tsëpaqqa mana alli pensënintsikkunata, imanö kanqantsikta y shonquntsikchö imata pensanqantsiktam chipyëpa cambianantsik. Kënömi tapukunantsik: “Jesus ruranqannö ruranäpaqqa, ¿ima cambiukunatataq rurëkä? ¿Wakinkuna rikäyämänanllapaqku cambiukunata  rurëkä? ¿Diosta mas sirwita munarninku llapan shonqüwan cambiukunata rurëkä?”. Imata ruranantsikpaq kaqta Jesus ninqantaqa, Mateu libruchömi tarintsik (leyi Mateu 12:43-45). Jesus ninqanqa rikätsikun, mana alli pensëkunata alli pensëkunawan ushakätsinapaq kaqtam.

7. ¿Imanö pensanqantsikta cambianäpaqqa, imatataq ruranantsik?

⁷ ¿Rasumpaku imata pensanqantsikta y shonquntsikchö imanö kanqantsikta cambiëta puëdintsik? Diospa Palabranmi kënö nin: “Pushayäshoqniki pensënikikunachömi mushoq tikrarnin sïguiyänëki, y mushoq imanöpis këtam imëka röpatanö vistikuyänëki, porqui tsë imanöpis këqa Diospa munëninmannömi kamashqa karqan, y tsëqa alli kaqta rurë y mana jaqikoq këmi” (Efes. 4:23, 24). Kë textu ninqannöpis cambiëtaqa puëdintsikmi. Peru manam fäciltsu, porqui manam mana alli pensënintsikta y rurënintsikta controlëllatsu. Sinöqa imanö pensënintsikta, imata munanqantsikta y imarëkur imatapis ruranqantsiktam chipyëpa cambianantsik. Y tsëpaqqa cada junaqmi kallpachakunantsik.

8, 9. ¿Imanirtaq imanö kanqantsikta chipyëpa cambianantsik? Juk wawqita pasanqanwan willakaramï.

⁸ Juk wawqim manaraq Testïgu karnin mana alli geniuyoq karqan, washkuta upyaq y pelyallachö kakoq. Bibliata estudiarninmi kawëninchö cambiukunata rurarqan y bautizakurirqan, tsëmi täranqan markachö nunakunaqa pëpaq allita parlayarqan. Peru bautizakurinqampita ichik tiempullatam juk machashqa nuna pelyata ashirnin tsë wawqipa wayinta ëwarqan. Qallananchöqa geniunta alleqmi tsarëkarqan, peru Diospa jutimpaq mana allita parlëkuptinmi, wawqintsikqa tsë borrächuta maqëkurqan. ¿Imanirtaq tsëta rurarqan? Bibliata estudianqan geniunta controlanampaq yanapashqa kaptimpis. Pensënintaqa manam chipyëparaqtsu cambiashqa karqan.

⁹ Tsënö kaptimpis kë wawqintsikqa cambiukunata rurarmi sïguirqan (Prov. 24:16). Anciänukuna yanapayaptinmi chipyëpa cambiarirqan, y anciänu këmanmi charqan. Peru juk paqasmi salonpa punkunchö këkaptin, anciänu mayinta juk borrächu maqëta munarqan. Peru kë kutichöqa kë wawqintsikqa manam piñakurqantsu, shumaqllapam tsë borrächuta parlaparqan y wayintam aparqan. Tsëtaqa rurarqan pensëninta chipyëpana cambiashqa karninmi. Porqui kananqa ras mana piñakoq y humildi nunanam karqan. Y tsënö kanqanqa Jehovätapis alabarqanmi.

10. Imanö kanqantsikta cambianäpaqqa, ¿imatataq ruranantsik?

¹⁰ Imanö kanqantsiktaqa manam rastsu cambiarintsik. Porqui cambianapaqqa itsa atska watakunaraq pasanqa (2 Pëd. 1:5). Y manam unëpana Jehoväta sirwinqantsikllapitatsu imanö kanqantsiktaqa cambiashun. Porqui imanö kanqantsikta chipyëpa cambianapaqqa alleqraqmi kallpachakunantsik. ¿Imaraq yanapamäshun? Rikärishun.

11. Pensënintsikta chipyëpa cambianapaqqa, ¿imanötaq Diosman mañakunqantsik yanapamantsik?

¹¹ Puntataqa Diosmanmi mañakunantsik. Salmus libruta escribeqmi kënö  nirqan: “Teyta Diosllä, shonqüta limpiuyätsimi, alli y wiyakoq shonquta qoykallämë” (Sal. 51:10). Kë textuta escribeqnömi Jehoväman mañakunantsik. Jinamampis humildim kanantsik imachö alliyëta wananqantsikta rikänapaq. ¿Imanirtaq Jehovä yanapamänapaq kaqman markäkuntsik o yärakuntsik? Porqui Ezequielpa tiempunchö israelïtakunatam kënö änirqan: “Juk shonqulla kayänëkipaqmi yanapayashqëki [...] y wiyakoq shonqutam qoyashqëki” (Ezeq. 11:19). Jehovä tsënö ninqanqa alläpam yanapamantsik. Porqui israelïtakunata yanapanqannöllam noqantsiktapis yanapamäshun cambiukunata ruranapaq.

12, 13. (1) Salmus 119:59 textu ninqannö, ¿imatataq ruranantsik? (2) ¿Ima tapukïkunatataq tapukunantsik?

¹² Jinamampis Diospa Palabran ninqanmanmi alleq pensanantsik. Cada junaqmi Bibliata leyinantsik y tiempuntsiktam rakinantsik imakunachö alliyëta wananqantsikman pensanapaq (leyi Salmus 119:59 *; Heb. 4:12; Sant. 1:25). Diosta mana sirweq nunakunanö imachö mana alli pensëkanqantsiktam cuentata qokunantsik. Y humildim kanantsik imachö mana alli këkanqantsikta cambianapaq, peru tsëpaqqa kallpachakunantsikmi.

¹³ Kënömi tapukunantsik: “¿Pitapis shonqüllachö chikipëkäku?” (1 Pëd. 2:1). “¿Më markapita, imata estudiashqa kanqäpita o qellëyoq kanqäpitaku allish tukü?” (Prov. 16:5). “¿Noqanö kapoqyoq mana kayaptin o juk markapita kayaptinku wakinkunata mana allipa rikä?” (Sant. 2:2-4). “¿Diosta mana sirweq nunakunanöku imëkayoq këta munä?” (1 Juan 2:15-17). “¿Warmiwan ollqu lluta oqllanakur kakuyanqanta y maqanakïkunata rikätsikoq pelïculakunata rikëku gustaman?” (Sal. 97:10; 101:3; Amos 5:15). Kë tapukïkunata imanö contestanqantsikmi rikätsikunqa imachö mas alliyëta wananqantsikta. Tsëta rurarninqa Jehovä Diosnintsiktam kushitsishun (Sal. 19:14).

14. ¿Imanirtaq amïguntsikkunataqa alleq akranantsik?

¹⁴ Jina alli amïgukunatam akranantsik. Cuentata qokushqa o mana qokushqapis amïguntsikkunaqa alli rurëman o mana alli rurëmanmi chätsimantsik (Prov. 13:20). Escuëlachö o trabäjuntsikchöqa Jehoväta mana sirweq nunakunawanmi këkantsik y pëkunaqa manam yanapamäshuntsu Jehovä pensanqannö pensanapaq. Peru reunionkunachöqa alli amïgukunatam tarintsik, y pëkunaqa kuyakoq kanapaq y allikunata ruranapaqmi yanapamäshun (Heb. 10:24, 25).

15, 16. ¿Imatataq Satanasqa utilizan pensënintsikta cambianapaq?

¹⁵ Diospa Palabranchö yachakunqantsikmannö pensanqantsiktam Satanasqa imëkanöpa cambiatsimënintsikta tïran. Y tsëpaqqa tukï cläsi yachatsikïkunatam utilizan.

¹⁶ Satanasqa Ëvata engañanqannöllam noqantsiktapis engañamënintsikta munan. Kënö nirmi Ëvata engañarqan: “¿Rasumpëpaku Diosqa niyäshurqunki...?” (Gen. 3:1). Satanaspa makinchö këkaq nunakunaqa, itsa llutankunata creiratsimashwan kënö tapupämarnintsik: “¿Rasumpëpaku Diosqa ollqupura y warmipura  casakuyänanta permitintsu? ¿Rasumpëpaku Diosqa Navidäta y cumpleäñuta celebrayänëkita munantsu? ¿Rasumpëpaku Diosqa munantsu yawarta churakuyänëkita? ¿Rasumpëpaku kuyakoq Dios këkarninqa congregacionpita qarqushqa familiëkikunawan manana juntakuyänëkipaq michäyäshunki?”.

17. (1) ¿Imatataq rurashun llutankunata creitsimënintsikta munar nunakuna tapupämashqa? (2) Colosensis 2:6, 7 textu ninqanqa, ¿imanötaq yanapamantsik?

¹⁷ Creinqantsikkunapitaqa segürum këkänantsik. Porqui tapukunqantsikkunapa respuestanta mana ashirqa, Bibliapita yachakunqantsikkunapitam dudar qallëkushun y Diosman markäkunqantsikpis ushakärinmanmi. Jehovämi Palabranchö nimantsik imanö pensanqantsikta cambianapaq, tsënöpa “alli munënin ima kanqanta” kikintsik rikänapaq (Rom. 12:2). Bibliata cada junaq leyinqantsikmi yanapamäshun yachakunqantsikkuna rasumpa kanqanman mas confiakunapaq. Jinamampis Diospa mandamientunkuna mas alli kaq kanqantam següru kashun. Tsëqa juk planta cuentam, ‘creikïnintsikkunachö alli patsakashqa’ kashun (leyi Colosensis 2:6, 7).

18. Satanaspa makinchö këkaq nunakunapa pensëninta ushakätsinapaqqa, ¿imatataq ruranantsik?

¹⁸ Creikïnintsikchö alli patsakashqa kanapaqqa kikintsikmi kallpachakunantsik. Tsëmi pensënintsikta chipyëpa cambiar sïguinantsik, y santu espïritunwan yanapamänapaq cada junaq Jehoväman mañakushun. Cada junaqmi Bibliata leyinantsik y tiempuntsiktam rakinantsik imakunachö alliyëta wananqantsikman pensanapaq. Alli amïgukunatam akranantsik, porqui pëkunaqa Dios pensanqannö pensanapaqmi yanapamäshun. Tsëkunata rurarmi Satanaspa makinchö këkaq nunakunapa pensëninta ushakätsishun (2 Cor. 10:5).