Ishkë tsuriyoq Paulmi kënö willakun: “Nacionnïchö imëkapis chaniyoq tikrakuriptinqa, wallkallana y chaniyoqmi mikï karqan. Mëtsika kutim rantipakuyänäpaq cölata rurayaq kayä, y turnökuna chäramuptinqa manam imatapis tariyaqnatsu kayä. Nunakunaqa qaranwan tullunllam kayaq y mallaqëwanmi cällikunachö ishkiriyaq. Mikïqa mas chaniyoqmi tikrakurirqan, atska qellëwanran rantiyaq kayä y tsëpitaqa millonyëpa qellëwanran, y tsëpitaqa qellëpa valornimpis manam ni imapaq välirqannatsu. Segürüpaq y pencionnïpaq bancuchö guardakunqä llapan qellënïtam oqrarirqä”.

Paulqa alleqmi musyarqan familian kawar sïguinampaqqa imëkanöpapis yanapanampaq kaqta (Proverbius 3:21). Pëmi kënö nin: “Electricistam karqä, peru ichikllata gananä kaptimpis imëkachö trabajanäpaqqa listum këkarqä. Wakin clientikunaqa mikïwan o imallawampis pagayämaqmi. Chusku jabonta qoyämaptinqa, ishkëtam rantikureq kä y ishkëtanam quedakoq kä. Ichikllapa ichikllapam 40 chipikunata (chipshakunata) wätanäpaq rantirirqä. Winariyaptinnam rantikurirqä, y 300 chipi mastam rantirirqä. Tsëpitanam, 50 chipikunata ishkë säcu jara jarinawan trukarirqä. Tsë jarinam yanapamarqan familiäta y wakinkunata atska tiempupa alimentänäpaq”.

Jina Paulqa alleqmi musyarqan yachaq këqa Diosman markäkï kanqanta. Dios mandakunqanta cäsukushqaqa yanapamantsikmi. Jesusqa nirqan, kawanapaq wananqantsikta ashir mana alläpa yarpachakunapaqmi. Jina nirqanmi: ‘Dios Yayaqa musyanmi qamcunapa imequicuna pishenqanta’ (Lücas 12:29-31).

 Llakikïpaqqa, cäsi llapan nunakunata imëkayoq kë alläpa precisanqanta Diospa chikeqnin Satanas creitsinqanmi. Nunakunaqa imëkanöpam ashiyan wanayanqanta o mana wanayanqanta tariyänampaq, peru wakin cösaskunataqa manam wanayantsu kawayänampaq. Mëtsikaqmi jaqa këman chäyan y tsënöpam ‘qellë prestaqnimpa sirweqnin tikrariyan’ (Proverbius 22:7).

Wakinqa mana allitam decidiyarqan. Paulmi nin: “Familiankunata jaqirïkurmi juk nacionta ëwakuyarqan, mas alli kawakïta pensar. Peru tsë nacionchö kayänampaq permïsunkuna mana kaptinmi wakinqa trabäjuta tariyarqantsu. Höraqa policïakunapitam ratakuyaq (tsinkakuyaq) o cällikunachömi punuyaq. Manam Diosman markäkuyarqantsu. Peru noqakunaqa sasa (aja) tiempukunachöpis Diospa yanapakïninwan llapäkuna juntu këkäyänäpaqmi decidiyarqä”.

Jina Paulmi nin: “Jesusmi kënö nirqan: ‘Ama warepaq caqtaqa yarpacachäyëtsu. Porqui warepis yarpacachecunaqa canqam, y cada junaqmi imallapaqpis yarpacachëqa carëcan’. Llapan junaqkunam Diosta mañakoq kä, cada junaqpaq mikïnïkuna qoyämänampaq. Y Jesus ninqannömi Diosqa änikunqanta cumplirqan. Höraqa gustayämanqankunataqa manam tariyaqtsu kayä. Juk kutichönam, tiendachö imata rantikuyanqanta mana musyëkar cölata rurarqä, y yëkurirqa yogurllatam taririrqä. Yogurqa manam ni ichikllapis gustamaqtsu. Peru tsëllatapis cenakuriyarqämi. ¡Diostam alläpa agradecikü tsë sasa tiempukunachö mallaq mana katsiyämanqampita! *

”Kananqa qellë asuntuchö allinam këkäyä. Pasayanqäkunam rikätsiyämashqa sasa tiempukunapa pasarnin alläpa yarpachakurqa, Jehoväman * markäkï mas alli kanqanta. Mandakunqannö kawakushqaqa imëpis yanapamäshunmi. Rikäyarqömi Salmu 34:8 textu ninqan rasumpa kanqanta, kënömi nin: ‘Jehovä alli kanqanta rikäyë y kushikuyë; tsapäkïninchö kaq nunaqa alläpam kushikun’. Tsëmi sasa tiempukuna yapë chämunan kaptimpis, alläpaqa yarpachakuyänatsu.

”Kawanantsikpaqqa manam trabäjutatsu ni qellëtaraqtsu wanantsik, sinöqa mikïtam. Tsëmi alläpa munantsik kë änikï cumplikänanta: ‘Patsachöqa alläpa atska gränu mikïmi kanqa’. Tsë chämunqanyaqqa kushishqam këkäshun mikïnintsik y röpantsik kaptin. Jina Bibliapis kënömi consejakun: ‘Qellepaq ama locuyäyëtsu. Conformacuyë cayäpushonqequicunallawan, porqui Diosnintsicpis quenomi nishqa: “Manam qonqashqequitsu ni jaqirishqequitsu”’. * Kë änikïqa alläpam kushitsikun”.

Dios pushamänata jaqinapaqqa pëman markäkïtam wanantsik, Paulwan familian rurayanqannö (Genesis 6:9). Kanan witsan o shamoq tiempuchö qellëta pishipakurqa, Paul ruranqampitam yachakïta puëdintsik.

Peru familiachö problëmakuna kanqan alläpa yarpakachätsimashqaqa, ¿imataraq rurashwan?