CANPISH shuj cꞌuyashca familia huañujpica llaquilla, can solo cashcata, imata mana rurai tucushcatachari sintishcangui. Shinallataj can culpata charishcata, manchaihuan, colera cashcatachari sintishcangui. Chaimantami maipica huañuna imata yuyashcangui.

Cambaj familia huañushcamanta huacanaca mana malochu can. Huacashpami huañuj familiata achcata cꞌuyashcata ricuchingui. Pero tranquilo sintiringapajca ¿imatataj rurai tucungui?

Huañushca familiamanta ama yallitaj llaquilla sintiringapajca cai consejocunatami cati tucungui.

ALLI SINTIRINGACAMA HUACAI

Maijancunaca achca tiempotami llaquilla pasancuna, cutin shujtajcunaca asha tiempollatami llaquilla cancuna. Pero, ima laya cajpipish, mashna tiempo cajpipish huacana cashpaca huacanallami canchij. Chashnami alli sintirishun. Callaripi parlashca Vanesaca: “Ñuca turi huañushcata cungarisha yuyashpami huacaillata huacaj carcani” ninmi. Sofiapish: “Ñuca ñaña huañushcata yuyarinaca dimastij llaquimi carca. Yuyarishpaca chugrita pascacuj shinami carca. Pero dimastij nanai cajpipish chugritaca jambinami canchij” ninmi.

IMA SHINA SINTIRISHCATA, IMATA YUYASHCATA SHUJTAJCUNAMAN PARLAI

Shuj familia huañushca qꞌuipa can solo canata munanaca allimi can. Pero llaquita apanaca shuj sinchi cargata apacushca shinami can. 17 huatacunata charij Juanca: “Ñuca ima shina sintirishcata shujtajcunaman parlanaca mana facilchu carca. Pero qꞌuipaca shujtajcunahuan parlashpami alli sintirij carcani” ninmi. Callaripi parlashca Jimenapish: “Shujtajcunahuan parlashpami ña mana yallitaj llaquilla carcani. Shujtajcuna ñuca ima shina sintirishcata intindijpimi ña mana ñucalla cashcata sintircani” ninmi.

SHUJTAJCUNA AYUDACHUN SAQUI

Shuj doctoraca: “Shuj familia huañushcamanta paipaj amigo o shujtajcuna ayudachun saquishpaca, gentecunaca jahuallami chai llaquitaca chꞌimbapurai tucunga” ninmi. Cambaj amigocunaca canta ayudanatami munangacuna. Chaimantami paicuna canta ima shina ayudai pudishcata huillana cangui (Proverbios 17:17).

YAYA DIOSTA MAÑAI

Taniaca: “Ñuca cusaca cáncer ungüihuanmi huañurca. Ñuca cꞌuyashca cusa huañushcamantami Yaya Diosta achcata mañaj carcani. Tutamantacuna jatarishpaca, tucui punlla fuerzasta cuchunmi Diosta mañaj carcani. Yaya Diosca achcatami ñucata ayudarca” ninmi. Andreapish: ‘Ñuca mama huañujpica 22 huatacunallatami charircani. Pero, Bibliata cada punlla liyishpami alli yuyaicunata charishpa ña mana tanto llaquilla carcani’ ninmi.

HUAÑUSHCACUNA CAUSARINAPI YUYAI

Taniaca: “Ñuca cusa huañujpica causarinapi yuyanaca mana tanto animarcachu. Chai llaqui horaspica ñuca cusahuan canallatami munaj carcani. Ñuca huahuacunapish paipaj yayahuan canatami munarcacuna. Ñuca cusa huañushca punllamantaca chuscu huatacunami ña pasashca. Cunanca huañushcacuna causarinata ashtahuan crishpami ñaupajman cati tucuni. Shamuj punllapi ñuca cusa causarinata yuyarishpami cushilla causai tucuni” ninmi.

Huañushcacuna causarinata yachashpapish mana chai rato animaringuichu. Pero Vanesa parlashca shimicunapi yuyai. Paica: “Callaripica chai llaquita apanaca sinchimi canga. Shinapish ñaupajmanmi cati tucungui” ninmi.

Yuyari, familia huañushcamanta yallitaj llaquilla cashpapish ñaupajmanmi catina cangui. Jehová Dios bendiciajpimi alli amigocunata, shuj sumaj esperanzata chari tucungui. Paica ñallami huañushcacunata causachinga. Yaya Diosca shamuj punllapi huañushca familia causarijpi paihuan cachun, tucui llaquicunata quiquin cungarichunmi munan.