Pero celularta mana alli yuyashpa utilizashpaca cai llaquicunapimi urmai tucuncuna:

• Paicunapura parlanacungapaj tiempotami quichui tucun.

• Ña mana minishtirishca cajpipish celularpi trabajashpa catinatami munangacuna.

• Cusa o huarmica celularpica imatapish pacallami rurai tucun. Paipaj huarmita o cusatapishmi traicionai tucun.

ISHQUINDIJ CANAMANTA

Michael shuti shuj cusaca cashnami nin: “Maipica ñuca huarmihuan chai ucullapitaj cashpapish paica telefonollata ricushpa ñucahuanca mana parlanchu. Paica ñucataca, ‘disculpahuai, cai ratomi mensajecunata liyi tucuni’ ninmi”. Cutin Jonathan shuti shuj cusaca: “Maipica shuj cusa huarmi chai lugarllapitaj cashpapish carupi cashca shinami sintincuna” ninmi.

CAIPI YUYAI: ¿Mashna cutintaj mensajecunata liyinamanta o llamadata chasquinamanta cambaj cusahuan o huarmihuan parlanata saquishcangui? (EFESIOS 5:33).

TRABAJANAMANTA

Huaquin gentecunaca paicunapaj trabajomantami tuta y punlla telefonota o correocunata cutichina can. Pero shujtajcunaca huasimanta ña mana trabajana cajpipish trabajashpa catinatami munancuna. Lee shuti shuj cusapish: “Ñuca huarmihuan pasacui rato trabajomanta cayajpi o mensajecunata cachajpi chaicunata mana cutichinaca sinchimi ricurin” ninmi. Joy shuti shuj huarmica: “Ñucaca huasimantami trabajani. Chaimantami agllashca tiempollata trabajangapaj achcata esforzarina cani” ninmi.

CAIPI YUYAI: ¿Cambaj cusa o huarmi parlacujpica alli uyanata yachanguichu? (LUCAS 8:18).

CELULAR MATRIMONIOTA LLAQUICHINAMANTA

Achca cusa huarmicunami paipaj cusa o huarmi internetpi imata churashcata yachashpa caishujmanta chaishujmanta dudai callarincuna. Maijancunaca paipaj cusa o paipaj huarmi ama ricuchun nishpa huaquin cosascunata internetpi pacalla churashcatami reconocirincuna.

Achca gentecuna nishca shinaca cusa huarmicuna redes socialescunata utilizashcamantami achca problemacunata chari tucuncuna, hasta huainayana juchapimi urmai tucuncuna. Chaimantami abogadocunapish, “achca cusa huarmicunaca redes socialescunata mana allita utilizashcamantami divorciarishcacuna” nincuna.

CAIPI YUYAI: ¿Shujtaj cꞌarihuan o shujtaj huarmihuan parlashcacunataca quiquinpaj cusamanta o huarmimantachu pacangui? (PROVERBIOS 4:23).

IMA ASHTAHUAN IMPORTANTE CASHCATA YUYARI

Pi alli alimentaringapaj mana esforzarishpaca achca ungüicunatami chari tucun. Shinallataj cusa huarmicunaca ishquindij pasangapaj mana tiempota llujchishpaca achca llaquicunatami chari tucuncuna (Efesios 5:28, 29).

Cai listapi tiyaj yuyaicunamanta maijantaj pajtachisha nishcata ishquindij ricuichij. O celular cambaj matrimoniota ama llaquichichun imata rurasha nishcata quillcaichij.

• Punllapica aunque shuj cutinllami ishquindij micushun ninchij.

• Punllapica celularta o tabletta ama ricungapajmi shuj tiempota agllasha ninchij.

• Ishquindijlla imatapish rurangapaj, o maimanpish llujshingapajmi tiempota llujchisha ninchij.

• Ña dormina horas cajpica celularta huañuchishpami ñucanchijmanta carupi saquisha ninchij.

• Ñucanchijpura tranquilo parlanacungapajmi cada punllaca celularcunataca 15 minutosta huañuchisha ninchij.

• Cada punlla internetta ima horascama utilizai tucushcatami decidisha ninchij.