Persunas tullumanta y aichamanta cáysh. Pero Jishu manáraj Ashpapi huachascka cas, suj espíritu cielupi cara (Juan 8:23). Jehová túcuy ʼruasckanmanta payta huámaj ʼruara y pay Jehovát yanapara túcuy imastista ʼruanánpaj. Chayraycu Biblia nin ima Tata Yáyap «huámaj huaan cara» (Juan 1:14). Astaanpas «Palabra» ina ʼrejsiscka can y pay Tatanpa sutinpi ʼrimara. Proverbios 8:22, 23, 30 y Colosenses 1:15, 16 léey.

Tata Yaya Huaanta Ashpaman cachara. Cháypaj, Jishu suj huahuita ina Maríap huicsanpi tianan tiara y huachachiscka cayta, María, suj sipas judía, manáraj ni suj ckarian íquiy apera. Chayraycu, Jishu mana suj tata tullumanta y aichamanta apera (Lucas 1:30-35 cama). Pay Ashpaman amora quimsa imastíspaj: 1) Tata Yayamanta yachachíypaj, 2) ejemplunuan yachachiáyshpaj Tata Yáyap voluntarninta ʼruayta afliciunes apiptíysh y 3) causaynin mana ucháyoj «rescate» ina ckóypaj. Mateo 20:28 léey.

Suj rescate can suj preciu, ima pagaracun, pillapasta ckeshpichíypaj huanchiyta munaptincuna (Éxodo 21:29, 30). Tata Yaya mana munara, persunas ni viejoyanayshta ni huañunayshta. Chayta yacháysh, imajraycu Jehová huámaj ckari Adanta nipora, si uchanqui —o mana casucunqui— huáñoj ʼrinqui. Chayraycu casucuspá, ni aicappas huáñoj ʼrera (Génesis 2:16, 17; 5:5). Biblia nin, huáñuy «yaycora persunaspi»  Adán uchaptin, chayraycu túcuy persunas uchallícoj cancu. Cay niyta munan, Adán túcuy persunasta uchallícoj canancuta ʼruara y chayna tucuycunasta huañuyman pusacora. Chayraycu tucuycunas suj rescate precisáysh. Romanos 5:12 y 6:23 léey.

Cunan, ¿pi chá rescate pagarayta atinman, y huañuymanta ckeshpichiayshta? Áicap huañúysh, pagaráysh uchasniyshllát. Tucuycunas uchallícoj cáysh, chayraycu ni pipas nockayshmanta mana atíysh sujcúnap uchasnincuta pagarayta. Salmo 49:7-9 cama léey.

Jishu mana ucháyoj cara, mana nockáysh ina. Chayraycu mana huañora uchasninta pagaráypaj, manapé sujcunaspa uchasnincuta pagaráypaj. Huaanta cachas nockayshraycu huañunánpaj, Tata Yaya ckaachera munayninta túcuy persunasraycu. Jishupas munayninta ckaachera Tatanta casucus y causayninta ckos ckeshpichianáyshpaj uchamanta y huañuymanta. Juan 3:16 y Romanos 5:18, 19 léey.

Ckáay vidiu ¿Imajchus Jishu huañora?

Áicap Jishu Ashpapi tiara, onckosckasta ampera, huañusckasta causachicora y picunasta usushcarancu yanapara, ckaachis ʼrúaj ʼrisckanta ámoj pachapi picunasraycu casúcoj cancu Tata Yayát (Mateo 15:30, 31; Juan 5:28). Áicap Jishu huañora, Tata Yaya causachera, suj persuna espiritual ina cielupi (1 Pedro 3:18). Chaymantá, Jishu Tatanpa checkanpi suyara autoridar ckopunancama, gobernanánpaj Ashpapi (Hebreos 10:12, 13). Cunan, Jishu cieluspi gobernashcan, y discipulusnin chá alli noticiasta túcuy Ashpapi apashcancu. Daniel 7:13, 14 y Mateo 24:14 léey.

Autoridaruan ima Tata Yaya ckopora, Jishu, cá Gobérnaj atiyníyoj mana unas puchúcaj ʼrin, túcuy mana alli persunasuan y usuyuan ima ckopucushcancu. Tucuycunasta ima Jishupi fe ckaachincu y casupuncu Ashpapi cusisckas causanckancu, na suj jardín ina ʼruascka captin. Salmo 37:9-11 cama léey.