PUNTO 2
Yaya Dios ¿pita an?
1. Yaya Diosta ¿imarasha adurana anchi?
Yaya Dios tucuira rashcamanda, shinallara huiñai huiñai causaj Dios ashcamandas paita aduranami anchi (1 Timoteo 1:17). Yaya Dios partimanda ali gustu cuintashcaunara Bibliai tupanchi (1 Timoteo 1:11). Shinallara ñucanchima causaira cushcamanda paillara sirvina anchi. Leapai Ricuchina (Apocalipsis) 4:11.
2. ¿Imara Biblia Yaya Diosmanda yachachin?
Diosga espíritu ashcamanda, paita maican runa mana ima huras ricushcachu (Juan 1:18; 4:24). Shinajpis pai rurashcaunara ricusha, paimanda yachanara ushanchimi. Caran tunu muyuguna, sisaunas tiajta ricusha yachanchimi, Yaya Dios llaquij, sumaj sabiru ashcara. Astaumbas Allparas, ahua pacharas rurashcamanda ashca ushaira charishcara yachanchi. Leapai Romanos 1:20.
Bibliara leasha Diosta mas ricsina ushanchi. Diospa Shimi yachachinmi, runauna alira, manalira rurajpi, Yaya Dios imasna sintishcara. Leapai Hebreos 8:12.
3. Yaya Dios ¿ima shuti an?
Jesús nicami: “Ñucanchi ahua pachai tiaj Yaya, camba shuti ahuayachishca achu” (Mateo 6:9). Diostaga Señor, Yaya Dios ninujpis, paiga shu quiquin shutira charinmi. Caran shimiunai Diospa shuti shu tunu uyarin. Shinajpis ñucanchi shimii Jehová ninchi. Diospa shutillara huaquin runauna Yavé ninun. Biblia ninmi: “Runauna yachanuchu, camba shuti Jehová ajta, canllami tucui Allpamanda astaun Atun Dios angui” (Salmo 83:18; shuj Bibliagunai Salmo 82:19).
Bibliara shuj shimii pasachijcuna Diospa shutira quillcana randimanda Dios, Señor churanushca. Shinajpis Biblia quillcashca huraspi 7.000 cutin Jehová shutira quillcanuca. Jesús runaunara yachachisha, cutin cutin Diospa shutira uyachica. Leapai Juan 17:26.
Yaya Dios ¿ima shuti an? nishca video ricui.
4. Yaya Dios ¿ñucanchira llaquinzhu?
Cai llaquij yaya cuinta, Yaya Dios munaunmi ñucanchi ali causaira charinuchu
Jehová Dios ñucanchira llaquijpis ¿imarasha ashca llaquiuna tian? Huaquin runauna ninunmi, Diosmi llaquiunara apamun tintangaj, camangaj nisha. Shina ninujpis mana shinachu ashca. Leapai Santiago 1:13.
Jehová Dios saquishcami ñucanchillara alira, manalira ajllangaj. Shina rasha ñucanchira valichinmi. Ñucanchiga Diosta casunara ajllashaga, ali anma (Josué 24:15). Huaquin runaunaga manali ranara ajllashcamanda ashca llaquiunara charinun. Jehová chita ricusha ashcarami llaquirin. Leapai Génesis 6:5, 6.
Jehová Dios ñucanchira ashcara llaquinmi. Shinallara munanmi cai Allpai cushi causai tiachu. Chiraigu ñalla turmindusgunara, nanaigunaras tucuchingaraun. Shinajpis ¿imarasha llaquiuna tiachu saquishca? Caitaga tema 8 yachachinga. Leapai 2 Pedro 2:9; 3:7, 13.
5. ¿Imara rana angui Diospa amigo tucungahua?
Jehová Diosta mañanai paihua amigo tucuna ushanchi. Paiga ñucanchira uyana munan (1 Juan 5:14). Astaumbas ñucanchi uchaunara perdonangaj munan. Ñucanchi paita casunara munajpiga Yaya Dios cushiyangami. Chiraigu uchayuj ashas, paihua amigo tucuna ushanchi. Leapai Romanos 4:7, 8; Santiago 4:8.
Causaira cuj ashcamanda, Jehová Diosllara tucui shunguhua llaquinami anchi (Marcos 12:30). Yaya Diosmanda yachasha, paita casushami paita llaquishcara ricuchinchi. Shina rasha Jehová Diospa amigo tucushun. Leapai 1 Timoteo 2:4; 1 Juan 5:3.
