Eclesiastes 7:1-29
-
Allin runa kaywan riqsichikuymanta hinaspa wañusqanchik punchawmanta (1-4)
-
Yachayniyuq runapa rimapayasqanmanta (5-7)
-
Qallariymantaqa tukuynin aswan allin kasqanmanta (8-10)
-
Yachayniyuq kaspa allin kawsakuymanta (11, 12)
-
Allin punchawmanta hinaspa mana allin punchawmanta (13-15)
-
Alli-allin runapaq mana hapikuymanta hinaspa llumpay yachaysapa mana kanamanta (16-22)
-
Yachachiqpa yuyaymanasqanmanta (23-29)
7 Miski asnaq aceitemantapas aswan allinqa allin runa kaywan* riqsichikuymi,+ runapa nacesqan punchawmantaqa wañukusqan punchawmi aswan allinqa.
2 Fiesta ruwasqanku wasiman rinamantaqa wañukuqpa wasinman riymi aswan allinqa,+ runakunaqa wañuypim tukun, chaypim kawsaq runakunaqa yuyaymanananku.
3 Kusisqalla kaymantaqa llakisqa kaymi aswan allinqa,+ llakisqa uyayuq kaymiriki runataqa allin runa kananpaq yanapan*.+
4 Yachayniyuq runaqa wañukuqpa wasinpim yuyaymanan, ruqru uma runam ichaqa kusikuypa kanan wasillapi yuyaymanan.+
5 Mana yachayniyuq runawan alabasqa kaymantaqa yachayniyuq runapa rimapayakuyninta uyariymi aswan allinqa.+
6 Mana yachayniyuqkunapa asisqanqa tullpapi kichkapa rupasqan hinam uyarikun.+ Chaypas yanqam.
7 Yachayniyuq runa pitapas ñakarichispanqa mana yuyayniyuq hinam ruwachkan, imatapas chaskikusqanraykum runaqa mana allinta ruwan.+
8 Imapapas qallariyninmantaqa tukuyninmi aswan allinqa. Hatuntukuq kaymantaqa mana chaylla piñakuruymi aswan allinqa.+
9 Amayá chayllaqa piñakuruychu,+ mana yuyayniyuq runakunallam chayllaqa piñakunku.+
10 Amayá niychu: “¿Imanasqataq ñawpaq tiempokunaqa kunanmanta aswan allin karqa?”, nispaqa. Mana yachayniyuq runakunallam chaynataqa ninku.+
11 Kay pachapi runakunapaqqa yachayniyuq kaywan imapas chaskisqanku kaqmi aswan allinqa.
12 Imaynam runataqa qullqi waqaychan,+ chaynam yachayniyuq runataqa yachaynin waqaychan.+ Yachayniyuq kayninmi runataqa kawsachin, chaymi yachayniyuq kayqa ancha allin.+
13 Yuyaymanay Diospa tukuy ima ruwasqankunapi. ¿Pitaq paypa qiwisqantaqa derechanman?+
14 Allin punchawpiqa qampas allin runayá kay.+ Sasachakuy punchawpiyá ichaqa yuyariy chayna punchawkuna kananta Dios saqisqanmanta,+ chaynapi runakuna hamuq tiempopi ima pasananmanta mana yachanankupaq.+
15 Yanqa kawsakuspaymi+ tukuyta rikurqani, rikurqanim allin ruwaq runa allin ruwaq kachkaspanpas chaylla wañukusqanta.+ Rikurqanim mana allin ruwaq runa mana allinta ruwachkaspanpas una-unay kawsakusqanta.+
16 Amayá alli-allin runapaqqa hapikuychu,+ amataqyá llumpay yachaysapa kasqaykitaqa niychu.+ Chayna kaspaykiqa kikillaykim ñakarinki.+
17 Amayá llumpay mana allin runaqa kaychu, amataqyá paqway mana yachayniyuqpas kaychu.+ Chayna kaspaykiqa manaraq tiempoykipim wañukuwaq.+
18 Allinmi kanman punta kaq* nisusqaykitawan qipa kaq* nisusqaykita kasukuynikiqa,+ Diosta manchakuqqa iskaynintam kasukunqa.
19 Yachayniyuq runaqa llaqtapi kallpasapa chunka runakunamantapas aswan kallpasaparaqmi.+
20 Kay pachapiqa manam pipas kanchu allinllata ruwaspa mana huchallikuqqa.+
21 Amayá runakunapa imapas nisqantaqa kasuychu,+ manachayqa sirvientekipa mana allinkuna nisusqaykitam uyariruwaq.
22 Qamqa allintam sunquykipi yachanki achka kutikama hukkunamanta mana allinta rimasqaykita.+
23 Tukuy chaykunata yachaywan allinta qawaykuspaymi nirqani: “Yachayniyuqmi kasaq”, nispay. Ichaqa manam atirqanichu yachayniyuq kaytaqa.
24 Diospa unanchasqankunaqa* mana entiendey atinam, sasa entiendeymi. ¿Pitaq entiendeyta atinman?+
25 Sunqumantam yachaykuytawan entiendeyta munarqani, yachayniyuq kayta munaspaymi tukuy imapas imanasqa kasqanmanta yachayta munarqani. Chaynapim yacharurqani mana yuyayniyuq kayqa mana allin kasqanta chaynataq yanqakuna ruwayqa mana yuyayniyuq runapa ruwaynin kasqanta.+
26 Kaytapas yacharurqanitaqmi, wañuymantapas aswan ñakarichikuqqa tuqllaman hina wichichikuq warmim. Chay warmipa sunqunqa challwanapaq malla hinam, makinkunañataqmi cadenakuna hina. Diospa munasqanman hina kawsakuq runaqa chay warmimantam ayqikunqa,+ huchallikuq runam ichaqa paypa tuqllanman wichiykunqa.+
27 Yachachiqmi+ nin: “Kaytam yacharuni, tukuytam ruwarqani tukuy ima imayna kasqanta yachanaypaq.
28 Maskasqaytam ichaqa mana tarirqanichu. 1.000 runamantam huk runallata allin ruwaqta tariruni, ichaqa manam chullallatapas allin ruwaq warmitaqa tarirqanichu.
29 Chayllatam yacharuni, Diosqa allin ruwaqtam runataqa unancharqa,+ paykunam ichaqa munasqankuman hina ruwarqaku”, nispa.+
Willakuykuna
^ Hebreo rimaypiqa nichkan: “Sutiwan”, nispam.
^ Hebreo rimaypiqa nichkan: “Llakisqa uyaqa sunqutam allinyachin”, nispam.
^ Kaypiqa 16 versiculopa nisqanmantam rimachkan.
^ Kaypiqa 17 versiculopa nisqanmantam rimachkan.
^ Utaq: “Munayninqa”.
