¿IMATAM RUNAKUNA NINKU?

Wakin runakunaqa mana kaqpaqmi animalkunata hapinku, wakinñataqmi runata hina qawanku.

• Animalkunamanta nanachikuq huk runapa nisqanman hinaqa, manam animalkunataqa rantikunallapaq hinallatachu qawana nitaqmi mana kaqpaqpas hinatachu.

• Qullqisapa Leona Helmsley sutiyuq warmim, 12.000.000 dolar qullqita kuyasqan allqunpaq saqirqa. Hinaspapas testamentonpim qillqachirqa allqun wañuptin paypa waqtanpi pampanankupaq.

Chaynaqa, ¿imaynatam animalkunata qawana?

¿IMATAM BIBLIA NIN?

Kawsayta quwaqninchik Jehova Diosmi runakunata nirqa: ‘Munaychakuychikyá lamar qucha challwakunapi, munaychakuychikyá alton pawaq animalkunapi. Munaychakuychikyá allpapa hawanpi, llapallan qasqunpa puriq animalkunapi’, nispa (Genesis 1:​28). Qawasqanchikman hinaqa Jehova Diospaqa runakunam aswan allin animalkunamantaqa.

Chayna kasqantam bibliapa kayna nisqan sutillata qawachin: ‘Diosmi runata unancharqa. Kikinman rikchakuqtam ruwarqa. Qaritawan warmitam unancharqa’ (Genesis 1:27).

Kaypi nisqanman hinaqa, Diosmi runakunata unanchawarqanchik paypa imayna kasqanta qawachinapaq. Chaymi yachayniyuq, imam kaqta ruwaq hinaspa kuyakuyniyuq kanchik. Musyakunchiktaqmi imam allin utaq imam mana allin kasqanmanta. Munanchiktaqmi Diosmanta yachayta, animalkunaqa Diosman mana rikchakusqankuraykum mana chaynachu kanku. Animalkunaqa manamá runakuna hinachu, chaymi Diosqa mana suyanchu runakunata hina qawananchiktaqa.

• ¿Chayraykuchu ñakarichinanchik? Manamá. Diosmi Israel runakunata kamachirqa animalkunata allinta qawanankupaq, mikuchinankupaq hinaspa samachinankupaqpas (Exodo 23:4, 5; Deuteronomio 22:10; 25:4).

‘Suqta punchawmi ruwaynikita ruwanki, qanchis kaq punchawpiñataqmi samanki chaynapi bueyesnikipas, asnoykipas samananpaq’ (Exodo 23:12).

¿IMATAM RUNAKUNA NINKU?

Wakin runakunam animalkunata utaq challwakunata wañuchinku pukllaspanku kusirikunankupaq. Wakin runakunañataqmi Rusia nacionniyuq León Tolstói sutiyuq runapa nisqanman hina, animalkunata wañuchispa mikuyqa llumpay millakuypaq qucha kasqanmanta ninku.

¿IMATAM BIBLIA NIN?

Diosqa manam harkakunchu ima animalpas wañuchiwananchikpaq kaptinqa wañuchiy atisqanchikmanta (Exodo 21:28). Diosqa niwanchiktaqmi: ‘Chaykunatam llapallanta qamkunaman quykichik mikunaykichikpaq’, nispa (Genesis 9:3). Jesuspas qatiqninkunatam challwaypi yanaparqa, chaynapi mikunankupaq (Juan 21:​4-13). Bibliaqa qawachintaqmi pachanchikta ruwanapaq animalkunata wañuchiyqa allin kasqanta (Marcos 1:6).

Ichaqa, bibliaqa sutillatam nin Diosqa ‘daño ruwaqkunata chiqnisqanmanta’ (Salmo 11:5). Chaynaqa, Jehova Diosqa manam munanchu yanqa-yanqalla utaq pukllaspa animalkunata wañuchinanchiktaqa.

Bibliaqa allintam yachachiwanchik animalkunaqa Jehova Diospaq ancha chaninniyuq kasqanta.

• Bibliam nin: ‘Diosmi ruwarqa sapakamata castanman hina: purun animalkunata, uywa animalkunata hinaspa allpapi qasqunpa puriq animalkunata. Diosmi qawarqa chaykunaqa sumaqllaña kasqanta’, nispa (Genesis 1:25).

• Jehova Diosmantam biblia kaynata nin: “Paymi animalkunata mikuchin”, nispa (Salmo 147:9). Arí, tukuy ima unanchasqanpim animalkunaqa waqaychasqa kanku hinaspa hawka mikunku.

• Rey Davidmi Diosta mañakuspan kaynata nirqa: “Dios taytalláy, llapachallan runakunatawan animalkunatam waqaychallankiqa”, nispa (Salmo 36:6). Jehova Diosqa kay pachaman sinchi parata kachamuspanmi, pusaq runakunatawan tukuy rikchaq animalkunata waqaycharqa (Genesis 6:19).

Qawasqanchikman hinaqa, Jehova Diospaqqa ancha chaninniyuqmi animalkunaqa, chaynatataqmi ñuqanchikpas qawananchik.

‘Allin ruwaq runaqa nanachikunmi animalninkunamanta’ (Proverbios 12:10).