Hechos 15:1-41
-
Qhari kay qaracha kuchuchikuymanta ch’aqwa jatarisqanmanta (1, 2)
-
Jerusalenpi parlamusqankumanta (3-5)
-
Umalliqkuna apostolkunapiwan juñunakusqankumanta (6-21)
-
Umalliq t’aqaq apachisqan cartamanta (22-29)
-
Yawarwanqa manan imatapas ruwanachu (28, 29)
-
-
Apachisqanku carta iñiq t’aqakunata kallpachasqanmanta (30-35)
-
Pablowan Barnabewan t’aqanakusqankumanta (36-41)
15 Wakin runakunan Judeamanta uraykamuspa iñiqkunata yachachiyta qallarirqanku: “Manachus Moisespa+ chaskisqan kamachikuy simiman jina qhari kayniykichis qarachata kuchuchikunkichis chayqa, manan salvasqachu kankichis”, nispa.
2 Pablowan Bernabewanmi ichaqa chay runakunawan rimaspa manapuni tupachirqankuchu, jinan sinchi ch’aqwa jatarirqan. Chaymi iñiqkunaqa rimanakurqanku Pablota, Bernabeta, wakin iñiqkunatawan Jerusalenpi+ kaq apostolkunaman umalliqkunamanwan kachanankupaq, chhaynapi chaymanta rimanankupaq.
3 Chaymi iñiq t’aqapi kaqkunaqa juj chhikanta paykunata riysispanku kacharparirqanku. Jinan Pablowan, Bernabewan, wakin iñiqkunapiwanqa Fenicia llaqtanta Samaria llaqtanta ima rirqanku, imaynatachus waj nacionkunamanta runakuna Diosman kutirikurqanku chaykunamanta iñiqkunaman lliuta willaspa; chaywanmi iñiqkunaqa anchata kusikurqanku.
4 Jerusalenman chayaqtinkutaq iñiqkunaqa, apostolkunapas, umalliqkunapas sumaqta paykunata chaskirqanku; paykunataq lliuta willarqanku imakunatachus Dios paykunawan ruwarqan chayta.
5 Wakin iñiqkunan ñaupaqpi fariseo t’aqamanta karqanku, paykunan ichaqa tiyanankumanta jatarispa nirqanku: “Waj nacionkunamanta iñiqkunapas kuchuchikunankun qhari kayninku qarachataqa, kamachinanchismi Moisespa chaskisqan kamachikuy simita waqaychanankupaqpas”,+ nispa.
6 Jinan apostolkunaqa umalliqkunapiwan juñunakurqanku chaymanta rimanankupaq.
7 Ichaqa manapunin acuerdoman jaykuyta atisharqankuchu, jinan Pedroqa sayarispa paykunata nirqan: “Wayqeykuna, yachasqaykichis jina, Diosmi qankuna ukhumanta noqata ajllawarqan waj nacionkunamanta runakuna allin willakuykuna willasqayta uyarispa iñinankupaq.+
8 Sonqota reqsiq Diospunin+ rikuchirqan paykuna chaskisqantaqa paykunamanpas noqanchisman jina santo espirituta qospa.+
9 Payqa noqanchistapas paykunatapas igual-llatan qhawariwanchis,+ chaymi paykunaq sonqonkutapas ch’uyancharqan iñisqankurayku.+
10 Chhaynaqa, ¿imaraykun Diosta phiñachiyta munashankichis paykunaman llasa q’epita churayta munaspa?+ ¿Acaso ñaupa taytanchiskunapas ni noqanchispas chaykunata q’epiyta atirqanchischu?+
11 Aswanpas noqanchisqa Señor Jesuspa sumaq sonqo kayninrayku salvasqa kananchispin iñinchis+ ¿riki?, chayllapitaqmi paykunapas iñinku”,+ nispa.
12 Chayta niqtinmi llapallanku upallarqanku, jinaspa Bernabeta Pablotawan uyariyta qallarirqanku, paykunan willarqanku imaynatas Diosqa waj nacionkunaman rishaqtinku paykunawan señalkunata admirakunapaq kaqkunatawan ruwarqan chayta.
13 Rimayta tukuqtinkutaq Santiagoqa llapankuta nirqan: “Wayqeykuna, uyariwaychis.
14 Uyarisqanchis jina, Simeonmi*+ willakunña imaynatachus Diosqa waj nación runakunata yuyarispa paykuna ukhumanta runakunata sutinpaq ajllakuyta qallarirqan chayta.+
15 Chaykuna kanantaqa profetakunaq qelqasqanpipas willakurqanñan, chaypin nin:
16 Chaykuna qhepatan kutimusaq, jinaspa Davidpa urmasqa karpanta* wajmanta sayarichisaq, thunisqa perqankunatan wajmanta sayarichisaq;
17 chhaynapi puchuq runakuna waj nacionkunamanta runakunawan kuska noqa Jehová* Diosta tukuy sonqowan maskhawanankupaq; paykunan sutiytaqa apanku, noqa Jehová* Diosmi chayta nini, noqan chaykunataqa ruwashani;+
18 ñaupa tiempomantañan chaykunataqa piensarqani,+ nispa.
19 Chhaynaqa, qhawarisqayman jinaqa manan allinchu kanman Diosman kutirikushaq waj nacionkunamanta runakunaman sasachakuyta churayqa.+
20 ¿Manachu aswanpas qelqasunman idolokunawan qhellichasqa kaqkunamanta,+ qhelli juchamanta,*+ yawarmantapas karunchakunankupaq,+ seq’osqa aychatapas ama mijunankupaqwan?
21 Chay kamachikuykunan Moisespa qelqasqan librokunapi tarikun, chaykunatan ñaupa tiempomantapacha lliu llaqtakunapi willakushan sapa samana p’unchay* sinagogakunapi alto kunkawan leekuspa”,+ nispa.
22 Chaymi apostolkunawan umalliqkunawanqa iñiq t’aqapi lliu kaqkunapiwan rimanakurqanku paykuna ukhumanta iskay qharikunata ajllaspa Pablotawan Bernabetawan kuskata Antioquía llaqtaman kachanankupaq. Jinan kacharqanku Barsabás nisqa Judasta Silastawan,+ paykunaqa iñiqkuna ukhupi umalliqkunan karqanku.
23 Paykunawanmi juj cartata apachirqanku, chaypin qelqarqanku:
“Iñiqmasiykichis apostolkunan umalliqkunapiwan qelqamushaykichis Antioquiapi,+ Siriapi, Ciliciapi tarikuq mana judío iñiqmasikunaman. Munasqa wayqeykuna:*
24 Uyariykun noqayku ukhumanta wakin runakuna iñiyniykichista waqllichiyta munaspa yachachikuyninkuwan iskayachisqasuykichista.+ Chaykunata ruwanankupaqqa manan noqaykuchu kamachirqayku.
25 Chaymi juj sonqolla rimanakuyku iskay qharikunata ajllaspa munakusqayku Bernabewan Pablowan kuskata qankunaman kachamunaykupaq,
26 paykunaqa Señor Jesucristoq sutinraykun wañuy patapiraq tarikurqanku.+
27 Judasta Silastawanmi qankunaman kachamushayku, chhaynapi paykunapas kay cartapi qelqamusqaykumanta willanasuykichispaq.+
28 Santo espirituq+ yanapayninwanmi reparayku amaña ima ruwanatapas qankunaman kamachinaykupaq, aswanpas kaykunallatan ruwanaykichista munayku:
29 Aman mijunkichischu idolokunaman jaywasqa mijunakunata+ ni seq’osqa aychatapas;*+ aman qhelli juchapi purinkichischu,+ aman yawarwanpas+ imatapas ruwankichischu. Chaykunamantachus allinta waqaychakunkichis chayqa, allillanmi kankichis. Allillanña wayqeykuna”, nispa.
30 Jinaspan chay runakunata kacharqanku, paykunataq Antioquía llaqtaman chayaspa llapa iñiqkunata juñurqanku, jinaspa chay cartata entregarqanku, iñiqkunaqa askhan chaypi kasharqanku.
31 Chayta leespankun paykunaqa anchata kusikurqanku chay cartaq kallpachasqanwan.
32 Judaswan Silaswanqa profetan karqanku, chaymi paykunapas allin-allinta rimaspanku iñiqkunata yanaparqanku kallpacharqanku ima.+
33 Chaypi juj tiempo kashaqtinkun iñiqkunaqa “sumaqlla kutipuychis” nispa kachapurqanku pikunachus kachamurqanku paykunaman.
34 *——
35 Pablowan Bernabewantaq ichaqa Antioquía llaqtallapi qhepakurqanku yachachispa, jujkunawan kuska Jehová* Diospa siminmanta allin willakuykunata willaspa ima.
36 Chay p’unchaykunapin Pabloqa Bernabeta nirqan: “Jaku kutisun maypichus willarqanchis Jehová* Diospa siminta chay llaqtakunaman, chhaynapi iñiqkunata watukamunanchispaq, imaynachá kashanku”,+ nispa.
37 Bernabeqa pusaytapunin munasharqan Marcos+ nisqa Juanta.
38 Pablon ichaqa mana munasharqanchu, Panfilia provinciapi kashaqtinku paykunamanta t’aqakuspa pasapusqanrayku.+
39 Chay jawan paykunapura nishuta discutirqanku, jinaspa t’aqanakapurqanku; jinan Bernabeqa+ Marcosta pusarikuspa barcopi Chipre islaman ripurqan.
40 Pablotaq Silasta ajllarqan; paykunatan iñiqkunaqa Jehová* Diosman jap’iykachirqanku ancha sumaq sonqowan qhawarinanpaq,+ chaymantataq Pablopas Silasta pusarikuspa ripurqan.
41 Jinaspa iñiq t’aqakunata kallpachaspa Siria provincianta Cilicia provincianta ima purirqan.
Uraypi willakuykuna
^ Paytaqa “Pedro” nikullantaqmi.
^ Chaypiqa “ch’ujllanta” otaq “wasinta” nillanmantaqmi.
^ Qhaway “Astawan yachanapaq A5” nisqata.
^ Qhaway “Astawan yachanapaq A5” nisqata.
^ Qhaway Explicasqa simikuna nisqapi “Qhelli jucha” nisqata.
^ Qhaway Explicasqa simikuna nisqapi “Samana p’unchay” nisqata.
^ Mayninpiqa warmipaq qharipaqwanmi Bibliapiqa “wayqeykuna” nispa nin.
^ Chaypiqa “ni yawarnin mana sut’uchisqa aychatapas” nillanmantaqmi.
^ Kay versiculoqa manan rijurinchu Westcott, Hort runakunaq ruwasqanku griego rimay qelqapi nitaq wakin allin reqsisqa qelqakunapipas. Qhaway “Astawan yachanapaq A3” nisqata.
^ Qhaway “Astawan yachanapaq A5” nisqata.
^ Qhaway “Astawan yachanapaq A5” nisqata.
^ Qhaway “Astawan yachanapaq A5” nisqata.
