“Llakisqallapunin purini, unphullapunin khuyayllapunin purini” (Salmo 38:6)

¿IMA NINKUN YACHAQKUNA?

Llapanchismi mayninpiqa llakisqa tarikunchis, llaki onqoywan kaqkunan ichaqa sapa kutillan llakiq ñit’isqan kashanku, chaymi pisikallpa tarikunku manataqmi ruwanankutapas allintachu ruwanku. Yachayniyoqkunaqa manan kaqllatachu yuyaykunku hayk’aqchus huk runa llaki onqoywan kashan hayk’aqtaqchus imamantapas llakisqa kashan chaytaqa. Ichaqa wakinqa nishutan mana allinkunallapi yuyaykunku, chaymi mana valeqpaq qhawarikunku imamantapas nishuta huchachakunku ima.

¿IMA NINMI BIBLIA?

Biblian riman askha runakuna llakipi tarikusqankumanta. Anaqa ‘llakisqan sonqonpi’ tarikurqan (1 Samuel 1:10). Profeta Eliaspas huk kutinmi sinchi llakisqa kaspa Diosta nirqan: “Kawsayniyta qechupuway”, nispa (1 Reyes 19:4).

Ñawpa tiempopi cristianokunaqa ‘manchalikunata [llakisqa kaqkunatan, NM] yanapananku’ karqan (1 Tesalonicenses 5:14). Bibliamanta willaq qelqaq nisqanman hinaqa ‘llakisqakunaqa’ kankumanmi “imaynapipas tarikusqankumanta pisikallpayaqkuna”. Diosta serviq runakunapas mayninpiqa sinchi llakisqan karqanku.

“Yachanchismi Diospa tukuy imaymana kamasqankunaqa kunankama waqasqankuta muchusqankutapas” (Romanos 8:22)

¿IMA NINMI BIBLIA?

Adán Evaq huchallikusqankuraykun runakunaqa onqonchis. Salmo 51:5 texton nin: “Cheqaqtapunin huchallantinña nacerqani, huchallantintañan mamay wachakuwarqan”, nispa. Romanos 5:12 textopas ninmi: “Imaynan huk runallawan [Adán] huchaqa kay pachapi qallarirqan, huchawantaq wañuypas rikhurirqan, chay hinallataqmi, wañuyqa llapa runaman chayarqan llapallan huchallikusqankurayku”, nispa. Adanpa miraynin kasqanchisraykun runakunaqa imaymanawan onqonchis. Chayraykun Diosqa willarqan “tukuy imaymana kamasqankunaqa kunankama waqasqankuta” (Romanos 8:22). Ichaqa willawallanchistaqmi qhepa tiempoman sumaq kawsay kananmanta, chaypiqa manañan llaki onqoypas huk onqoykunapas kanqañachu, chhayna suyakuymantaqa manan ima doctorpas niwasunmanchu (Apocalipsis 21:4).

“Señor Diosqa llakisqa sonqoyoqkunaq qayllanpin kashan, payqa llakiq ñit’isqan sonqoyoqkunatan qespichin” (Salmo 34:18)

¿IMARAYKUN KALLPACHAKUNANCHIS ATIPANAPAQ?

Imapas qonqay sucedewasqanchisraykun ima llakipipas tarikusunman (Eclesiastés 9:11, 12). Chhaynapi tarikuspa mana allin yuyaykuykunawan mana atipachikunapaqqa kaykunatan ruwananchis.

¿IMA NINMI BIBLIA?

Onqosqakunaqa doctortan necesitanku (Lucas 5:31). Chayrayku llaki onqoywan kashanki chayqa manan huchachu doctorman riyqa. Diosmanta mañakuypas allinmi. Salmo 55:22 texton nin: “Señor Diosman llakipakuyniykikunata saqey, paymi qaqata sayachisunki, manan hayk’aqpas chanin runataqa urmachisqa kananta munanqachu”, nispa. Diosmanta mañakuyqa manan thak kanallapaqchu, Biblian nin: “Señor Diosqa llakisqa sonqoyoqkunaq qayllanpin kashan”, nispa. Chayraykun mañakuspaqa Dioswanpuni rimanchis (Salmo 34:18).

Huk amigoykiman tukuyta willakuypas yanapasunkimanmi (Proverbios 17:17). Daniela sutiyoq cristianan willakun: “Huk allin iñiyniyoq iñiqmasin sumaq sonqowan tapuwarqan, hinan ñoqaqa willakurqani llaki onqoyniyoq kasqayta. Askha watakunan chhayna onqoyniyoq kasqaymantaqa mana willakurqanichu, chay qhepamanmi ichaqa reparakurqani yanapayta ñawpaqmantaraq maskhanay kasqanta. Willakusqayqa anchatapunin yanapawarqan”, nispa.