La Bib i ansèrv pa lo mo « lavortman » pou koz su in moun i fé tir son zanfan. Parkont, in bonpé vèrsé dan la Bib i di anou sak Bondié i pans su la vi domoun, mèm su la vi in zanfan k’i sar nèt.

 La vi lé in kado Bondié (Jenèz 9:6 ; Psom 36:9). Pou li chak vi néna in bonpé la valèr, mèm sak inn ti bébé k’lé ankor dann vant son momon. Donk, tué inn ti bébé k’lé pa ankor nèt, lé kom tué in moun.

 Lo loi ké Jéova lavé done bann Zisraélit té i di : « Si bann bonom i batay ansanm, ké zot i bouskil in madam ansint é kèl i akouch avan lèr, mé ké laksidan i fé okin mor, i fodra lo koupab i pèy in konpansasion ké lo mari lo madam va oblij ali doné ; li va pèy sa par lo moiyen bann juj. Mé si in moun i mor dan laksidan, i fodra ou done in vi pou in vi a » (Égzod 21:22, 23).

•  Kansa la vi in moun i komans ?

•  Èské Bondié va pardone in moun ké la fé tir son zanfan ?

•  Si la vi lo momon ou sak lo zanfan lé an danjé, èské lé grav fé tir lo zanfan ?

 Pou Bondié la vi in moun i komans kan in spèrmatozoid i fégond in lovul. Dapré la Bib, inn ti bébé i sar nèt na lo mèm valèr ké in not moun. Alon oir détroi lègzanp k’i fé mont anou ké pou Bondié, na poin diférans ant la vi inn ti bébé ké lé ankor dann vant son momon, é sak inn ti bébé la fine nèt.

•   Lo roi David ké lété inspiré par Bondié, la koz ansanm li é la di : « Alor ké mi té viend jus èt formé dann vant, out zié la vu amoin » (Psom 139:16). Bondié té i konsidèr ké David lété déja in moun, avan mèm ké li nèt.

•   Avan ké profèt Jérémi té né, Bondié té i koné li té sar done ali in zafèr èspésial pou fé. Bondié la di ali : « Avan mèm ma la form aou dann vant, mi té koné aou é avan out nésans, ma la rand aou sin. Ma la fé d’ou in profèt pou bann nasion » (Jérémi 1:5).

•   Luk, in moun ké la ékri la Bib é ké té mèdsin, la ansèrv lo mèm mo grèk pou koz d’in bébé té sar nèt é d’in bébé ké té fine nèt (Luk 1:41 ; 2:12,16).

 Bondié i pé pardone bann domoun ké la fé tir zot zanfan. Si astèr, li néna lo mèm fason pansé Bondié su la vi, li dévré pa lès bann santiman k’i rand ali koupab kontinié tourmant ali. « Jéova i fé mont son pitié pou akord son pardon, é li fé mont son pitié pou aport in soulajman [...]. Kom landroi ousa solèy i lèv lé loin landroi ousa solèy i dor, parèy osi, li mèt nout bann fot loin d’nou b » (Psom 103:8-12). Jéova i pardone tout sak i rogrèt vréman zot péché, mèm si sé in lavortman (Psom 86:5).

 Dapré sak la Bib i di su la vi in zanfan k’i sar nèt, mèm si lo momon oubien lo zanfan i pouré gingn in problèm santé, sa sé pa in rézon pou fé tir lo zanfan.

 É si pandan lakouchman néna in problèm médikal k’i oblij choizi ant la vi lo momon é sak lo zanfan ? Kan sa i ariv, sé bann moun k’i viv lo situasion k’i désid kèl vi zot i vé ésèy sové.